អង់គ្លេស៖ញត្តិប្រឆាំងលោក Donald Trump មិនឲ្យចូលទឹកដីអង់គ្លេស
ពាក្យសម្តីរបស់លោក Donald Trump បេក្ខជនប្រធានាធិបតីអាមេរិកមកពីគណបក្សសាធារណរដ្ឋបាននិងកំពុងបន្តបំផុសឲ្យមានសង្រ្គាមប៉ាកាយ៉ាងខ្លាំងក្លានៅទូទាំងពិភពលោក។ នៅថ្ងៃពុធ ទី៩ ធ្នូ មានញត្តិមួយនៅលើគេហទំព័ររដ្ឋសភាអង់គ្លេសបានអំពាវនាវកុំឲ្យលោក Donald Trump ដាក់ជើងជាន់ទឹកដីអង់គ្លេស។ គួររម្លឹកជូនថានាថ្ងៃចន្ទ ទី៧ ធ្នូដើមសប្តាហ៍នេះ លោក Donald Trump បានថ្លែងទាមទារឲ្យហាមឃាត់ជនបរទេសដែលកាន់សាសនាអ៊ីស្លាមធ្វើដំណើរទៅកាន់ទឹកដីអាមេរិក។ គោលដៅរបស់ លោក Donald Trump គឺដើម្បីទប់ស្កាត់ការវាយប្រហារភេរវកម្ម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
ក្រៅពីប្រតិកម្មប្រឆាំងនៅអាមេរិក ពាក្យសម្តីរបស់លោក Donald Trump ក៏បានបង្កឲ្យមានប្រតិកម្មប្រឆាំងកាន់តែច្រើននៅបរទេសដែរ ពិសេសនៅក្នុងប្រទេសអង់គ្លេស។ នៅថ្ងៃពុធ ទី៩ ធ្នូ មានញត្តិមួយដែលបង្ហោះនៅលើគេហទំព័ររដ្ឋសភាអង់គ្លេសបានអំពាវនាវរារាំងកុំឲ្យលោក Donald Trump ដាក់ជើងជាន់ក្នុងទឹកដីអង់គ្លេស។ គិតត្រឹមថ្ងៃពុធដដែលនោះ ញត្តិប្រឆាំងលោក Donald Trump ទទួលបាន ១០០ ០០០ហត្ថលេខា ហើយបើយោងតាមច្បាប់អង់គ្លេស ញត្តិណាដែលមានទទួលបាន ១០០ ០០០ហត្ថលេខានឹងអាចដាក់ឲ្យសភាជជែកពិភាក្សា។
គួរជម្រាបជូនថា ក្រៅពីថ្លែងទាមទារមិនឲ្យជនបរទេសអ្នកកាន់សាសនាអ៊ីស្លាមទាំងអស់ដាក់ជើងជាន់ទឹកដីអាមេរិក បេក្ខជនប្រធានាធិបតីអាមេរិកមកពីគណបក្សសាធារណរដ្ឋ Donald Trump ក៏បាននិយាយពីអ្វីដែលបានកើតឡើងនៅក្នុងទីក្រុងប៉ារីស ប្រទេសបារាំង និងទីក្រុងឡុងដ៏ ប្រទេសអង់គ្លេសដែរ។ យោងតាមលោក Donald trump នៅប៉ារីស ក៏ដូចនៅឡុងដ៏ គឺមានតំបន់ខ្លះសំបូរទៅដោយជនផ្តាច់ខ្លួនរួមគំនិតជាមួយពួកជីហាតអង្គការរដ្ឋអ៊ីស្លាម និងដែលកម្លាំងប៉ូលិសមិនហ៊ានចូលជិតដោយបារម្ភពីសុវត្ថិភាព និងសន្តិសុខផ្ទាល់ខ្លួន។
នៅមិនទាន់មានប្រតិកម្មយ៉ាងណាពីប៉ារីសទេ តែចៅហ្វាយក្រុងនៅឡុងដ៏លោក Boris Johnson បានចាត់ទុកសម្តីរបស់លោក Donald Trump ថាជាសម្តីភ្លើសុទ្ធសាធ និងថា ហេតុផលដែលលោកនឹងចៀសវាងទៅតំបន់ខ្លះក្នុងទីក្រុងញូយ៉ក គឺខ្លាចជួបមុខលោក Donald Trump។ ចំណែកអ្នកនាំពាក្យប៉ូលិសក្នុងទីក្រុងឡុងដ៏បានបញ្ចេញប្រតិកម្មថា អ្វីដែលសំខាន់ត្រូវនិយាយប្រាប់ប្រជារាសស្រ្តអង់គ្លេសរស់ក្នុងទីក្រុងឡុងដ៏នោះ គឺពាក្យសម្តីមិនត្រឹមត្រូវរបស់លោក Donald Trump។
ខុសពីនៅអង់គ្លេស មានសម្លេងប្រតិកម្មពីរខុសគ្នានៅអ៊ីស្រាអែលទាក់ទងនឹងពាក្យសម្តីរបស់លោក Donald Trump។ អ៊ីស្រាអែលដែលលោក Donald Trump គ្រោងនឹងទៅបំពេញទស្សនកិច្ចនៅថ្ងៃទី២៨ ធ្នូខាងមុខ។ ថ្នាក់ដឹកនាំអ៊ីស្រាអែលបានបញ្ជាក់ថា លោកនាយករដ្ឋមន្រ្តីអ៊ីស្រាអែលបិនយ៉ាមីន នេតាន់យ៉ាហ៊ូនឹងទទួលលោក Donald Trump ព្រោះជាទស្សនកិច្ចដែលបានគ្រោងទុកតំាងពីមុនការថ្លែងរបស់លោក Donald Trump ទៅទៀត។ តែមានមតិរបស់ក្រុមអ្នកប្រឆាំង រួមទាំងថ្នាក់ដឹកនាំរដ្ឋាភិបាលខ្លះបានរិះគន់ការថ្លែងរបស់លោក Donald Trump ដោយចាត់ទុកជាសម្តីប្រកាន់ពូជសាសន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ