ហេតុអ្វីប៉ូលិសអាមេរិកចាត់ទុកការបាញ់សម្លាប់មនុស្សនៅសាំង ប៊ែណាឌីណូជាសកម្មភាពភេរវកម្ម?
បីថ្ងៃក្រោយការបាញ់រះសម្លាប់មនុស្សនៅរដ្ឋកាលីហ្វនីញ៉ា ប៉ូលិសស៊ើបអង្កេត FBIនៅថ្ងៃសុក្រម្សិលមិញ បានប្រកាសចាត់ទុកសកម្មភាពរបស់ប្តីប្រពន្ធដើមកំណើតប៉ាគីស្ថាន ថា ជាសកម្មភាពភេរវកម្ម។ ប្រធានFBIនៅបានបញ្ជាក់ថា នៅមួយថ្ងៃមុនបាញ់សម្លាប់ស្ត្រីឧក្រិដ្ឋជន ជាប្រពន្ធបានសរសេរនៅលើទំព័រសង្គមហ្វេសប៊ុក ភ្ជាប់ខ្លួនទៅនឹងក្រុមជីហាតនៃអង្គការរដ្ឋអ៊ីស្លាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:០០
ក្នុងករណីបាញ់សម្លាប់មនុស្ស១៤នាក់ កាលពីថ្ងៃពុធ នៅទីក្រុងសាន់ ប៊ែរណាឌីណូ ប៉ូលិសមិនទាន់ហ៊ានសន្និដ្ឋានភ្លាមថា ជាសកម្មភាពភេរវកម្ម ដោយសារតែឧក្រិដ្ឋជនជាប្តីប្រពន្ធ គ្មានឈ្មោះ ក្នុងបញ្ជីឈ្មោះរបស់ប៉ូលិស ក្នុងនាមជាជនសង្ស័យ ដែលគ្រោះថ្នាក់ បង្កភេរវកម្ម របស់ប៉ូលិស។ ប៉ូលិសបានចំណាយពេលបីថ្ងៃដើម្បីស៊ើបអង្កេត មុននឹងអះអាង នៅថ្ងៃសុក្រ ចាត់ទុកជាសកម្មភាពភេរវកម្ម។
នៅក្រោយចូលទៅឆែកឆេរ ក្នុងផ្ទះរបស់ជនដៃដល់ ប៉ូលិសភ្ញាក់ផ្អើលមែនទែន ដែលបានឃើញ អាវុធ គ្រឿងផ្ទុះយ៉ាងច្រើនសម្បើម ដែលប្តីប្រពន្ធទាំងពីរ ទុកដាក់ នៅបន្ទប់ចតឡាន។ ប្រធានប៉ូលិសសហព័ន្ធអាមេរិក លោកDavid Bowdich ប្រចាំនៅLos Angeles បាននិយាយថា ប្តីប្រពន្ធទាំងពីរបានប្រែក្លាយបន្ទប់ដាក់ឡាន ទៅជាឃ្លាំងស្តុកអាវុធដ៏ធំមួយ។ ប្រជាជនអាមេរិកមានសិទ្ធិស្របច្បាប់ ទិញអាវុធ សម្រាប់ការពារខ្លួន។ ប៉ុន្តែគឺការមានអាវុធច្រើន លើសធម្មតា ហើយនិងការប៉ុនប៉ងបំផ្លាញទូរស័ព្ទ រួមទាំងឯកសារ កុំព្យូរទ័ររបស់ឧក្រិដ្ឋជន ដែលធ្វើឲ្យប៉ូលិសហ៊ានសន្និដ្ឋានថា ការបាញ់សម្លាប់មនុស្ស របស់ប្តីប្រពន្ធ Syed Farook អាយុ ២៨ឆ្នាំ និងTashfeen Malik អាយុ២៩ឆ្នាំ គឺជាសកម្មភាពធ្វើភេរវកម្ម គិតទុកជាមុន។
ទីភ្នាក់ងារព័ត៌មានអាម៉ាគ ដែលគាំទ្រក្រុមជីហាតរដ្ឋអ៊ីស្លាមក្នុងទឹកដីស៊ីរីបានបញ្ជាក់ នៅថ្ងៃសុក្រម្សិលមិញដែរថា ភេរវជនជាប្តីប្រពន្ធជាសមាជិករបស់ក្រុមខ្លួន។
ការសន្និដ្ឋាន របស់ប៉ូលិសសបញ្ជាក់ឲ្យឃើញថា នេះជាលើកទី១ ដែលភេរវកម្មបង្កឡើងដោយក្រុមមនុស្សភ្ជាប់ខ្លួនទៅនឹងក្រុមជីហាតនៃអង្គការរដ្ឋអ៊ីស្លាម កើតមាន នៅក្នុងទឹកដីអាមេរិក។ អាមេរិកដែលធ្លាប់តែរងគ្រោះដោយសារការវាយប្រហារភេរវកម្មពីក្រុមអាល់កៃដា។
ប្រធានក្រុមប្រឹក្សាសន្តិសុខជាតិអាមេរិកទើបបាននិយាយថា គ្មានទេ ការគំរាមកំហែងធ្វើភេរវកម្មពីសំណាក់ក្រុមជីហាតអង្គការរដ្ឋអ៊ីស្លាម នៅក្នុងទឹកដីអាមេរិក។
នៅក្រោយប្រជុំជាមួយលោកប្រធានាធិបតីអាមេរិក នៅសេតវិមាន កាលពីថ្ងៃ ទី ២៤វិច្ឆិកា កន្លងទៅ ប្រធានក្រុមប្រឹក្សាសន្តិសុខជាតិអាមេរិកបាននិយាយថា អាមេរិកមិនកំពុងប្រឈមនឹងការវាយប្រហារភេរវកម្ម ពីក្រុមជីហាតរដ្ឋអ៊ីស្លាម ក្នុងទឹកដីអាមេរិកនោះទេ។ ការប្រកាសនេះធ្វើឡើងនៅក្រោយទីក្រុងប៉ារីសរងការវាយប្រហារភេរវកម្ម របស់ក្រុមជីហាត ដែលបានសម្លាប់មនុស្ស១៣០នាក់។
ប្រធានប៉ូលិសFBI វិញបានបន្ថែមថា គ្មានទេ ភេរវកម្មប្រភេទភេរវកម្ម ទីក្រុងប៉ារីស ក្នុងទឹកដីអាមេរិក។
ដោយសារតែការត្រួតពិនិត្យ រឹតបន្តឹងនៅច្រកព្រំដែន អាមេរិកប្រហែលជាគ្មានសមាជិករបស់ក្រុមជីហាត អង្គការរដ្ឋអ៊ីស្លាមចូលទៅធ្វើភេរវកម្មក្នុងទឹកដីអាមេរិកមែន ប៉ុន្តែ មិនមែនមានន័យថា អាមេរិកអាចជៀសផុត ពីការវាយប្រហារភេរវកម្មរបស់ក្រុមជីហាតនោះដែរ។ ប៉ូលិសFBIខ្លួនឯង កាលពីថ្ងៃម្សិលមិញ បានទទួលស្គាល់ថា ភេរវជនទាំងពីរមិនមែនជាសមាជិករបស់ក្រុមជីហាតមែន ប៉ុន្តែ បានស័្មគ្រចិត្ត ធ្វើសកម្មភាពភេរវកម្ម ដើម្បីបុព្វហេតុក្រុមជីហាតអង្គការរដ្ឋអ៊ីស្លាម។
ជាក់ស្តែង នៅលើទំព័រសង្គមហ្វេសប៊ុក របស់ខ្លួន ស្ត្រីជាប្រពន្ធ ដែលបាញ់សម្លាប់មនុស្សជាមួយប្តីរបស់ខ្លួន ទើបបានប្រកាសភ្ជាប់ខ្លួន ទៅនឹងក្រុមជីហាតនៃអង្គការរដ្ឋអ៊ីស្លាម នៅមួយថ្ងៃមុនធ្វើសកម្មភាពបាញ់សម្លាប់មនុស្សនៅមជ្ឈមណ្ឌលជនពិការនៅទីក្រុងសាំង ប៊ែរណាឌីណូ ក្នុងរដ្ឋកាលីហ្វនីញ៉ា។
តាមការសិក្សាស្រាវជ្រាវរបស់សកលវិទ្យាល័យGeorge Washingtonទៅលើសកម្មភាពជ្រុលនិយម ចាប់តាំងពីឆ្នាំ២០១៤មនុស្ស ៧៩នាក់ ក្នុងនោះ មាន៩នាក់ ជាស្ត្រី ត្រូវបានតុលាការជំនុំជម្រះ ក្នុងបទគាំទ្រក្រុមជីហាតអង្គការរដ្ឋអ៊ីស្លាម។ ក្នុងចំណោមនោះ មនុស្ស ៥៦នាក់ ត្រូវបានចាប់ខ្លួន នៅឆ្នាំ២០១៥។
តើTashfeen Malik ជាអ្នកណា?
នៅថ្ងៃសុក្រ ប៉ូលិស FBIបានកែអាយុរបស់ស្រ្តីភេរវជនពី ២៧ ទៅ ២៩ឆ្នាំ។ តាមប៉ូលិស Tashfeen Malik កើតនៅប៉ាគីស្ថាន ប៉ុន្តែ ធំដឹងក្តីនៅប្រទេសអារ៉ាប៊ី សាអូឌីត។ ម៉ាលីក បានចូលមកក្នុងទឹកដីអាមេរិក នៅឆ្នាំ ២០១៤ តាមរយៈទិដ្ឋាការ ជាគូដណ្តឹង។ នាងបានរៀបការជាមួយ Syed Farook និងឆ្នាំ នោះ និងទើបមានកូនអាយុ ៦ខែនៅឆ្នាំនេះ។ តាមក្រុមគ្រួសារខាងប្រុស ម៉ាលីក ស្ងៀមស្ងាត់ និងប្រកាន់ខ្លួនតាមទំនៀមទំលាប់ជាស្រ្តីអារ៉ាប់ មេផ្ទះ។ ប៉ុន្តែ អ្វីដែលធ្វើឲ្យគេកត់សំគាល់ គឺនាងពាក់ស្បៃបាំងមុខជាប់ជានិច្ច បដិសេធមិនបើកឡាន និងអង្គុយឡូកឡំជាមួយមនុស្សប្រុសផ្សេងទៀត។
តាមអ្នកស្គាល់ Syed Farook ដែលជាប្តី បុរសរូបនេះ គឺស្លូត និងត្រឹមត្រូវ ហើយនិងមានប្រាក់ខែ ជាង ៧ម៉ឺនដុល្លារ ក្នុងមួយឆ្នាំ។ ប៉ុន្តែ Syed Farook បានផ្លាស់ប្តូ ចាប់តាំងពីស្គាល់ និងរៀបការជាមួយ ម៉ាលីក។ អ្នកខ្លះនៅបាននិយាយថា គឺស្ត្រីជាប្រពន្ធដែលលើកទឹកចិត្តឲ្យប្តីបាញ់សម្លាប់មនុស្សនៅ ទីក្រុង សាន់ ប៊ែរណាឌីណូ។
តាមអ្នកជំនាញខ្លះ ក្រុមអ៊ីស្លាមជ្រុលនិយមកំពុងឆ្លៀតចូលមកបន្លំ ខ្លួន ចូលមកក្នុងទឹកដីអាមេរិកដោយស្របច្បាប់ ដើម្បីទន្ទឹងរង់ចាំធ្វើភេរវកម្ម ក្នុងទឹកដីអាមេរិក។ នៅអាមេរិក ដោយសារតែច្បាប់ប្រឆាំងភេរវកម្មតឹងតែង គេអាចទប់ស្កាត់គម្រោងធ្វើភេរវកម្មរបស់បណ្តាញអាល់កៃដា ឬរបស់ក្រុមជីហាត។ ប៉ុន្តែ អ្នកនាំពាក្យរបស់សេតវិមាន វិញ កាលពីថ្ងៃសុក្រថា បានទទួលស្គាល់ថា គេមានការលំបាកក្នុងការទប់ស្កាត់សកម្មភាពរបស់ចចកទោស ឬក្រុមជ្រុលនិយម ដែលធ្វើភេរវកម្ម គ្មានការបញ្ជារពីក្រុមភេរវនិយមណាទេ ប៉ុន្តែ ធ្វើដោយស្ម័គ្រ ដោយខ្លួនឯង ដើម្បីបុព្វហេតុក្រុមជីហាត អង្គការរដ្ឋអ៊ីស្លាម។ ដូច្នេះ បើទោះជាច្បាប់ប្រឆាំងភេរវកម្មរបស់អាមេរិកតឹងតែង គេនៅតែមិនអាចជឿជាក់ និងច្បាស់ថា អាមេរិកអាចជៀសផុត ពីភេរវកម្មនោះទេ។ បន្ទាប់ពីអឺរ៉ុប ក្រុមមានសមានចិត្តគំាំទ្រ និងធ្វើភេរវកម្ម ដើម្បីបុព្វហេតុក្រុមជីហាត អាចចាប់មានមុខបន្ត នៅក្នុងទឹកដីអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ