Twitter បដិសេធមិនបិទគណនីរបស់មេដឹកនាំ ដែលសរសេរសារពន្យុះឲ្យមានហិង្សា
ឆ្លើយតបចំពោះការរិះគន់ជាច្រើន ស្តីពីការបណ្តែតបណ្តោយបើកដៃ ឲ្យមេដឹកនាំមួយចំនួន សរសេរ និងចែកផ្សាយ នូវសារដែលមានខ្លឹមសារពន្យុះអំពើហិង្សា រើសអើងប្រកាន់ពូជសាសន៍ជាដើម ក្រុមហ៊ុនបណ្តាញសង្គម Twitter បានឆ្លើយតបមកវិញថា ខ្លួនធ្វើគ្រប់យ៉ាង គឺដើម្បីធានាឲ្យមានការជជែកផ្លាស់ប្តូរ យោបល់គ្នា រវាងអ្នកប្រើប្រាស់ទាំងអស់។ ដូច្នេះ ក្រុមហ៊ុនTwitter មិនអាចទៅបិទគណនី ឬសាររបស់ ថ្នាក់ដឹកនាំណាទាំងអស់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
ថ្មីៗនេះ មានការរិះគន់ជាខ្លាំង ទាក់ទិននឹងសាររបស់បុគ្គលសាធារណៈ ឬថ្នាក់ដឹកនាំនយោបាយមួយចំនួន នៅលើទំព័រ Twitter ។ ក្រុមហ៊ុនTwitter សូមឆ្លើយបំភ្លឺអំពីការយល់ឃើញរបស់ខ្លួនថា៖ ការលុបចោលសារ ឬក៏បិទខ្ទប់គណនី របស់មេដឹកនាំ ឬបុគ្គលសាធារណៈមួយចំនួន គឺមិនខុសពីការ ដែលក្រុមហ៊ុន Twitter ធ្វើការលាក់កំបាំងព័ត៌មានទាំងនោះ ទៅវិញទេ។
នៅក្នុងទំព័រblogផ្លូវការរបស់Twitter បានសរសេរបន្ថែមទៀតថា “ខ្លួនប្រឹងប្រែងធ្វើការ ដោយអព្យាក្រិត្យបំផុត ហើយកម្មវត្ថុរបស់Twitter គឺជំរុញ ឲ្យមានការជជែក ដេញដោល ដោះដូរយោបល់គ្នា តាមរយៈសេរីភាពបញ្ចេញមតិរៀងៗខ្លួន។ Twitter ខិតខំប្រឹងប្រែងត្រួតពិនិត្យ សារនីមួយៗ របស់មេដឹកនាំ ឬបុគ្គលសាធារណៈ ដោយយោងទៅលើបរិបទនយោបាយ និងដោយគោរពតាមបទវិធានរួមនៃការប្រើប្រាស់បណ្តាញTwitter។”
សូមបញ្ជាក់ថា មានថ្នាក់ដឹកនាំប្រទេស អ្នកនយោបាយ ឬបុគ្គលសាធារណៈជាច្រើន ដែលបានប្រើប្រាស់ បណ្តាញ Twitter ជាវេទិកា ដើម្បីសម្តែងមតិ សរសេរសារនយោបាយ ឬក៏ការយល់ឃើញ ការប្រតិកម្មនានា។ សារខ្លះ មានខ្លឹមសាររើសអើងប្រកាន់ពូជសាសន៍ ពន្យុះឲ្យមនុស្សស្អប់គុំគួនគ្នា និងពន្យុះឲ្យមានអំពើហិង្សាជាដើម ។ល។ គឺសាររបស់អ្នកនយោបាយ ឬរបស់មេដឹកនាំទាំងអស់នេះហើយ ដែលបានបណ្តាល ឲ្យកើតជាចរន្តតវ៉ា រិះគន់ទៅលើក្រុមហ៊ុនTwitter តែម្តង។ សកម្មជនតវ៉ា បានទាំងសរសេរនៅលើជញ្ជាំងស្នាក់ការក្រុមហ៊ុនTwitter ថាលោក Jack Dorsey អគ្គនាយកក្រុមហ៊ុននេះ គឺជាជនផ្សំគំនិតទៀតផង។
ដោយឡែក បើទោះបីក្នុងចំលើយឆ្លើយតបរបស់Twitter គេមិនបានលើកឡើងឲ្យចំឈ្មោះក៏ដោយ តែគ្រប់គ្នាដឹងយ៉ាងច្បាស់ ថាគេចង់សំដៅទៅលើ លោក ដូណាល់ ត្រាំ ប្រធានាធិបតីអាមេរិក ដែលតែងតែសរសេរសារ លើទំព័រTwitter ជារៀងរាល់ថ្ងៃ ហើយសារនីមួយៗ មានខ្លឹមសារអុចអាល ពន្យុះអំពើហិង្សា ព្រមទាំងប្រកាន់ពូជសាសន៍។
ជាក់ស្តែង កាលពីថ្ងៃអង្គារ បន្ទាប់ពីមេដឹកនាំកូរ៉េខាងជើង បានប្រកាសថា ខ្លួនចង់ចុចប៊ូតុងនុយក្លេអ៊ែរពេលណាក៏បាន លោកដូណាល់ត្រាំ ក៏បានសរសេរលើTwitter ឆ្លើយតបទៅវិញថា សូមផ្តាំប្រាប់ទៅគីមជុងអ៊ុនវិញផង លោកក៏ចង់ចុចប៉ូតុងគ្រាប់នុយក្លេអ៊ែរ ពេលណាក៏បានដែរ ហើយគ្រាប់នុយក្លេអ៊ែររបស់អាមេរិក ធំសម្បើម និងសាហាវជាងរបស់កូរ៉េខាងជើងទៅទៀត។
North Korean Leader Kim Jong Un just stated that the “Nuclear Button is on his desk at all times.” Will someone from his depleted and food starved regime please inform him that I too have a Nuclear Button, but it is a much bigger & more powerful one than his, and my Button works!
Donald J. Trump (@realDonaldTrump) 3 janvier 2018
យ៉ាងណាមិញ សារTwitter និយាយតែផ្តេសតែផ្តាស របស់លោកដូណាល់ត្រាំ នេះ ក៏ត្រូវបានសមាជិកសភាអាមេរិក មួយចំនួនចោទសួរ ហើយបានទាមទារទៅភ្នាក់ងារសន្តិសុខជាតិអាមេរិក ឲ្យពិចារណាថាតើ វាអាចជះផលប៉ះពាល់មិនល្អអ្វីខ្លះ ទៅលើសន្តិសុខជាតិ របស់សហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ