មនុស្ស ១៧នាក់ស្លាប់ ដោយសារការបាញ់សងសឹករបស់អតីតសិស្សម្នាក់ ចំថ្ងៃ Valentine’s Day
អតីតសិស្សវិទ្យាល័យវ័យ ១៩ឆ្នាំម្នាក់ បានកាន់កាំភ្លើងវែងប្រភេទ AR-15 ចូលទៅបើកការបាញ់ប្រហារក្នុងវិទ្យាល័យដែលគេធ្លាប់រៀន ឈ្មោះ Marjory Stoneman Douglas ស្ថិតក្នុងទីក្រុង Parkland រដ្ឋ Florida សហរដ្ឋអាមេរិក នៅរសៀលថ្ងៃពុធម្សិលមិញ។ មន្ត្រីប៉ូលីសជាន់ខ្ពស់ក្នុងតំបន់ បានឲ្យដឹងថា ក្រោយហេតុការណ៍នោះ សិស្សសាលា រួមទាំងគ្រូយ៉ាងហោចណាស់ ១៧នាក់ បានស្លាប់ និងជាច្រើននាក់ទៀត ត្រូវរងរបួស និងបញ្ជូនទៅមន្ទីរពេទ្យ។ ព្រឹត្តិការណ៍បាញ់ប្រហារនេះ បាននិងកំពុងបង្កើនឲ្យមានការពិភាក្សា ជុំវិញសិទ្ធិក្នុងការប្រើប្រាស់អាវុធ នៅសហរដ្ឋអាមេរិក ព្រោះថាសោកនាដកម្មរបៀបនេះ វាបានកើតឡើងស្ទើរតែក្លាយជារឿងធម្មតាទៅហើយ។
ចុះផ្សាយនៅថ្ងៃ៖
ស្តាប់ - ០២:២៩
វាស្ទើរតែជារឿងដដែលៗទៅហើយ ដែលសហរដ្ឋអាមេរិក មានមនុស្សកាន់កាំភ្លើង ចូលទៅបាញ់ប្រហារសម្លាប់មនុស្សជាច្រើននាក់ នៅតាមសាលារៀន ឬ តាមកន្លែងកម្សាន្តនានា។ នេះក៏ព្រោះតែរដ្ឋខ្លះ ក្នុងប្រទេសមហាអំណាចនេះ បានអនុញ្ញាតឲ្យពលរដ្ឋអាចប្រើប្រាស់កាំភ្លើងដោយស្របច្បាប់ ដើម្បីការពារខ្លួន។ តួយ៉ាងករណីនៅរដ្ឋ Florida នៅពេលនេះ គឺយុវជនម្នាក់ ដែលប៉ូលីសបានកំណត់អត្តសញ្ញាណថាឈ្មោះ Nikolas Cruz ជាអតីតសិស្ស ដែលត្រូវបានសាលាបណ្តេញចេញ ព្រោះតែមិនគោរពវិន័យសាលានោះ បានកើតចិត្តគុំខឹង ហើយបានកាន់កាំភ្លើង សម្រុកចូលទៅបាញ់ប្រហារសម្លាប់មនុស្ស ក្នុងសាលាដែលគេធ្លាប់រៀនសូត្រ នៅចំថ្ងៃនៃក្តីស្រលាញ់ ១៤កុម្ភៈ។
បាញ់សម្លាប់មនុស្សហើយ យុវជនម្នាក់នេះ បានរត់គេចខ្លួន ប៉ុន្តែត្រូវប៉ូលីសចាប់បាន រួចបញ្ជូនទៅមន្ទីរពេទ្យ ព្រោះខ្លួនប្រាណរបស់គេក៏មានសភាពរបួសផងដែរ។ ដំបូងឡើយ យុវជននេះ បានបន្លំខ្លួនចូលក្នុងសាលា រួចហើយចុចកណ្តឹងប្រកាសអាសន្ន ហើយក៏ចាប់ផ្តើមសកម្មភាពបាញ់សម្លាប់មនុស្សមិនញញើតដៃតែម្តង។ សិស្សសាលា គ្រូបង្រៀនជាច្រើននាក់ បានរត់ពួន និងរត់គេចខ្លួន រហូតទាល់តែក្រុមកងកម្លាំងសមត្ថកិច្ចពិសេស ចូលទៅសង្គ្រោះស្ថានការណ៍នោះបាន។
រដ្ឋ Florida ដែលមានប្រជាជនរស់នៅប្រមាណ ២១លាននាក់ ត្រូវបានគេមើលឃើញថាជារដ្ឋដែលមានការអនុញ្ញាតឲ្យពលរដ្ឋអាចប្រើកាំភ្លើងច្រើនជាងគេ ព្រោះវាជារដ្ឋ ដែលមានការយុទ្ធនាការទាមទារឲ្យមានសិទ្ធិប្រើកាំភ្លើងស្របច្បាប់មុនគេ តាំងពីឆ្នាំ ២០០៥មក។ បើតាមទិន្នន័យផ្លូវការកាលពីខែមករា បានបង្ហាញថា មានពលរដ្ឋជិត ២លាននាក់ កំពុងមានកាំភ្លើងក្នុងដៃ។
ភ្លាមៗក្រោយដំណឹងនេះ លោកប្រធានាធិបតីអាមេរិក ដូណាល់ ត្រាំ បានសម្តែងការសោកស្តាយ និងចូលរួមមរណទុកជាមួយក្រុមគ្រួសារជនរងគ្រោះ ដោយនិយាយថា «មិនគួរមានកុមារ គ្រូបង្រៀន ឬ នរណាម្នាក់ ត្រូវប្រឈមនឹងអារម្មណ៍អសុវត្ថិភាព ក្នុងសាលារៀននៅសហរដ្ឋអាមេរិកនោះទេ»។
បើនិយាយពីព្រឹត្តិការណ៍បាញ់ប្រហារក្នុងសាលាបណ្តាលឲ្យស្លាប់មនុស្សច្រើនបែបនេះ វាមានមិនតិចនោះទេ នៅសហរដ្ឋអាមេរិក តាំងពីឆ្នាំ ២០១២មក។ ក្នុងរបាយការណ៍របស់ក្រុមអង្គការក្រៅរដ្ឋាភិបាល បានបង្ហាញថា តាំងពីខែមករាឆ្នាំ ២០១៣មក ករណីបាញ់ប្រហារក្នុងសាលារៀន បានកើតឡើងយ៉ាងហោចណាស់ ២៩១លើក ទូទាំងប្រទេស។
គួររម្លឹកជូនដែរថា កាលពីខែមិថុនា ឆ្នាំ ២០១៦កន្លងទៅ Florida ក៏បានប្រឈមនឹងការបាញ់ប្រហារដោយបុរសខ្មាន់កាំភ្លើងម្នាក់ ទៅលើក្លឹបកម្សាន្តមនុស្សភេទទី៣ ក្នុងទីក្រុង Orlando ដែលបានសម្លាប់មនុស្ស ៤៩នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ