លោក អូបាម៉ា ថ្កោលទោសសកម្មភាពហិង្សាបំផ្លិចបំផ្លាញនៅហ្វែហ្គូសិន
កំហឹងរបស់ប្រជាជន បន្ទាប់ពីសេចក្តីសម្រេចចិត្តរបស់ក្រុមប្រឹក្សាតុលាការមិនចោទប្រកាន់ប៉ូលិសស្បែកស បាញ់សម្លាប់យុវជនស្បែកខ្មៅ បានរាលដាលស្ទើរពេញសហរដ្ឋអាមេរិក។ បាតុកម្មបានផ្ទុះឡើងនៅតាមក្រុងធំជាច្រើន។ ប៉ូលិសជាងពីរពាន់នាក់ត្រូវបានដាក់ពង្រាយនៅយប់មិញ នៅFerguson រដ្ឋមីស៊ូរី និងដោយមិនបង្អង់យូរ លោកប្រធានាធិបតីអាមេរិក ដែលមានស្បែកខ្មៅដែរ បានប្រកាសថ្កោលទោសសកម្មភាពហិង្សាលួចបំផ្លិចបំផ្លាញ ដោយហៅថាជាទង្វើឧក្រិដ្ឋ។
ចុះផ្សាយនៅថ្ងៃ៖
ស្តាប់ - ០១:៣៩
សម្រែកកំហឹងរបស់ប្រជាជននៅ Ferguson បានលាន់ឮពេញផ្ទៃសហរដ្ឋ! ជាសរុបបើតាមទូរទស្សន៍អាមេរិកCNN បាតុកម្មបានផ្ទុះឡើងនៅយប់ថ្ងៃអង្គារម្សិលមិញ ក្នុងរដ្ឋប្រមាណ៣៧ ដើម្បីទាមទារយុត្តិធម៌ឱ្យយុវជនស្បែក Michael Brown បាញ់សម្លាប់ដោយប៉ូលិសស្បែកស កាលពីថ្ងៃទី ៩ សីហា ឆ្នាំ២០១៤។
បាតុកម្មបានកើតឡើងស្ទើរនៅតាមគ្រប់ទីក្រុងធំៗរបស់អាមេរិក ពីញូវយ៉ក ទៅ Los Angeles ដោយឆ្លងកាត់ក្រុងឈីកាហ្គោ។ ទីដែលលោកអូបាម៉ា ប្រធានាធិបតីអាមេរិក បានប្រកាសថ្កោលទោសយ៉ាងខ្លាំង ជនដៃដល់បង្កបាតុកម្មហិង្សា បំផ្លិចបំផ្លាញប្រយោជន៍សាធារណៈ។ "ដុតអគារ ដុតរថយន្ត បំផ្លាញទ្រព្យសម្បត្តិអ្នកដទៃ បង្កគ្រោះភ័យដល់ជនទូទៅ ៖ គ្មានហេតុផលអ្វីដែលត្រូវធ្វើដូច្នេះទេ ! ទង្វើនេះ ជាសកម្មភាពឧក្រិដ្ឋ ! »
ក៏ប៉ុន្តែលោកអូបាម៉ា ក៏បានថ្លែងបែបសម្របសម្រួលដែរ ដោយប្រកាសត្រៀមធ្វើការជាមួយនឹងជនណាដែលត្រូវការមធ្យោបាយសម្រាប់ផ្សះផ្សា បង្កើតទំនាក់ទំនងល្អប្រសើរឡើងវិញរវាងប៉ូលិស។ រដ្ឋមន្ត្រីក្រសួងយុត្តិធម៌Eric Holder មានបន្ទុកទទួលខុសត្រូវកិច្ចការនេះ ! « អ្វីដែលយើងឃើញនៅFerguson មិនបញ្ចប់ត្រឹម Fergusonទេ ហើយ ក្រសួងយុត្តិធម៌ បានសម្រេចចិត្តធ្វើគ្រប់យ៉ាង តាមដែលអាចធ្វើទៅបាន ដើម្បីបន្ធូរបន្ថយសម្ពាធតានតឹងពេលនេះ។
នៅក្នុងបទសម្ភាសន៍ជាលើកទីមួយ តាមកញ្ចក់ទូរទស្សន៍ABC ប៉ូលិសបានរៀបរាប់ថា “នៅពេលប្រឈមមុខជាមួយ Michael Brown ក្នុងឡាន លោកបានសាកល្បងបាញ់យុវជនស្បែកខ្មៅពីរដង តែរាល់បាញ់មិនចេញ លោកបានគិតក្នុងចិត្តថានៅលើកទីបី បើកាំភ្លើងគាំងទៀត គឺរូបលោកផ្ទាល់តែម្តងដែលនឹងត្រូវស្លាប់បាត់បង់ជីវិត។” Darren Wilson បានអះអាងដែរនៅក្នុងបទសម្ភាសន៍ថា នៅពេលនោះ បើសិនជា Michael Brown ជាស្បែកស ក៏លោកនៅតែបញ្ចេញប្រតិកម្មដូចគ្នា »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ