តារាភាពយន្តអាមេរិកំាង Angelina Jolie បានចេញមុខការពារស្រី្តរងគ្រោះផ្លូវភេទនៅភូមា
នាដំណើរទស្សនកិច្ចក្នុងប្រទេសភូមា តារាភាពយន្តអាមេរិកំាង Angelina Jolie បានអំពាវនាវកាលពីថ្ងៃសុក្រ ទី៣១ កក្កដាឲ្យរដ្ឋាភិបាលភូមាចាត់វិធានការចាប់ជនដៃដល់ដែលប្រព្រឹត្តិអំពើហិង្សាផ្លូវភេរលើស្រ្តីទៅកាត់ទោសតាមច្បាប់។ ការអំពាវនាវរបស់លោកស្រី Jolie របៀបនេះបានធ្វើឡើង បន្ទាប់ពីលោកស្រីបានទទួលជួបសន្ទនាផ្ទាល់ជាមួយក្រុមស្រ្តីរងគ្រោះផ្លូវភេទនៅក្នុងរដ្ឋរ៉ាក់ឃីន។ ទន្ទឹមគ្នានេះ លោកស្រី Jolie ក៏បានសម្តែងការតក់ស្លុតចំពោះស្ថានភាពរស់នៅដ៏លំបាកលំបិនរបស់ក្រុមជនជាតិភាគតិចរ៉ូហ៊ីងយ៉ា អ្នកកាន់សាសនាអ៊ីស្លាមដែរ។
ចុះផ្សាយនៅថ្ងៃ៖ កែប្រែថ្ងៃទី៖
គឺតាមរយៈសេចក្តីជូនដំណឹងមួយផ្សព្វផ្សាយដោយស្ថានទូតអង់គ្លេសប្រចំាប្រទេសភូមាដែលលោកស្រី Angelina Jolie បានរៀបរាប់ពីទុក្ខលំបាកវេទនារបស់ស្រ្តី និងក្មេងស្រីភូមាដែលកំពុងរស់នៅដោយប្រឈមនឹងអំពើហិង្សាផ្លូវភេទ និងទង្វើរំលោភសិទ្ធិមនុស្សផ្សេងទៀត។ គឺនៅក្នុងន័យនេះហើយបានជាលោកស្រី Jolie បានអំពាវនាវឲ្យរដ្ឋាភិបាលភូមាចាត់វិធានការវែកមុខរកជនដៃដល់ប្រព្រឹត្តិអំពើហិង្សាផ្លូវភេទទៅកាត់ទោសតាមច្បាប់។
គួរជម្រាបជូនថា ក្រៅពីជាតារាភាពយន្តអាមេរិកំាងម្នាក់ដ៏ល្បីល្បាញ លោកស្រី Angelina Jolie ក៏ជាប្រេសិតពិសេសរបស់អង្គការសហប្រជាជាតិទទួលបន្ទុកជនភៀសខ្លួនដែរ ហើយដំណើរទៅកាន់ប្រទេសភូមារបស់លោកស្រីពេលនេះបានធ្វើឡើង តាមការអញ្ជើញរបស់លោកស្រីអ៊ុង សានស៊ូជី ប្រធានគណបក្សប្រឆំាងនៅភូមា និងក៏ជាជ័យលាភីរង្វាន់ណូបែលសន្តិភាព។
នៅថ្ងៃទី១ នៃដំណើរទស្សនកិច្ចក្នុងថ្ងៃពុធ ទី២៩ កក្កដា លោកស្រី Jolie បានចូលជួបសន្ទនាជាមួយលោកប្រធានាធិបតីភូមាថេន សេន មុននឹងទៅទស្សនកិច្ចក្នុងរដ្ឋរ៉ាក់ឃីនដែលជាតំបន់គ្របដណ្តប់ដោយសង្រ្គាមស៊ីវិលតំាងពីឆ្នំា ២០១១ ដោយបានបណ្តាលឲ្យមានជនភៀសខ្លួនជាង ១០០ ០០០នាក់។ លោកស្រី Jolie បានកត់សម្គាល់ឃើញថា អង្គការក្រៅរដ្ឋាភិបាលក្នុងស្រុកពិតជាបានបំពេញការងារគួរឲ្យកោតសរសើរ តែកង្វះខាតនៅមានច្រើនសន្ធឹកសន្ធាប់ ពិសេសតម្រូវការជាបន្ទាន់ផ្នែកសុខាភិបាល ការគំាទ្រផ្លូវច្បាប់ និងផ្លូវចិត្តសាស្រ្ត។
ទន្ទឹមគ្នានេះ លោកស្រី Joilie មិនភ្លេចនិយាយទេពីស្ថានភាពលំបាក់លំបិនរបស់ជនជាតិភាគតិចរ៉ូហ៊ីងយ៉ា អ្នកកាន់សាសនាអ៊ីស្លាមដែលបាន និងកំពុងទទួលរងការធ្វើទុក្ខបុកម្នេញយ៉ាងខ្លំាង។ កន្លងទៅ ពោលនៅពេលលោកស្រី Jolie បានទៅទស្សនកិច្ចនៅជំរំជនភៀសខ្លួនស្ថិតតាមបណ្តាយប្រទេសថៃ និងភូមា លោកស្រី Jolie ធ្លាប់បានរិះគន់រដ្ឋាភិបាលថៃចំមុខពីបទមិនបានជួយយកអាសារពួករ៉ូហ៊ីងយ៉ាឲ្យអស់ពីសមត្ថភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ