ចិន៖ ធ្វើពហិការ មិនប្រើផលិតផលរបស់អាមេរិក តើអាចទៅរួចដែរឬទេ?
ប៉ុន្មានថ្ងៃចុងក្រោយនេះ នៅតាមបណ្តាញសង្គមរបស់ចិន គេបានសង្កេតឃើញ មានលេចឡើងនូវសារអំពាវនាវ ឲ្យប្រជាជនចិន នាំគ្នាធ្វើពហិការ ឈប់ប្រើផលិតផលរបស់អាមេរិក តទៅទៀត។ ការអំពាវនាវ ឲ្យធ្វើពហិការនេះ គឺធ្វើឡើង បន្ទាប់ពីរដ្ឋាភិបាលអាមេរិក ទើបតែបានប្រកាសសង្រ្គាមពាណិជ្ជកម្ម ជាមួយចិន ដោយបានកំណត់ដំឡើងពន្ធនាំចូលយ៉ាងធ្ងន់ ទៅលើផលិតផលចិន មានដូចជាដែកថែបជាដើម។ តើការឆ្លើយតបវិញ ដោយការធ្វើពហិការ ពីសំណាក់ ប្រជាជនចិននេះ អាចមានផលប៉ះពាល់កំរិតណាដែរ?
ចុះផ្សាយនៅថ្ងៃ៖
“ជនរួមជាតិទាំងអស់ ក្រោកឡើង ត្រូវតែឈប់ប្រើផលិតផលអាមេរិក ហើយងាកមកប្រើប្រាស់ ផលិតផលក្នុងស្រុកវិញ ដើម្បីការពារមហាកំផែងសេដ្ឋកិច្ច របស់យើង!”។ នេះគឺជាសំរង់សារអំពាវនាវ ដែលគេបានចែកចាយតៗគ្នា នៅលើបណ្តាញសង្គម WeChat នៅចិន។ សារជាច្រើនទៀត ដែលមានខ្លឹមសារប្រហាក់ប្រហែលនេះ ក៏ត្រូវបានគេចែកចាយ នៅលើបណ្តាញWeibo ដែរ។ ដូចគ្នាដែរ កាសែតជាតិនិយមចិន ឈ្មោះ Global Times បានសរសេរថា៖ “អំណាចទិញរបស់ប្រជាជនចិន ជាពិសេសប្រជាជនចិន ដែលរស់នៅបរទេស គឺមានទំហំធំណាស់។ ដូច្នេះបើយើងស្រាក់គ្នា នោះយើងអាចវាយបំបាក់ ឲ្យសេដ្ឋកិច្ចរបស់អាមេរិក ឈឺបានដោយងាយ។”
ជាការពិតណាស់ចិនជាទីផ្សារធំណាស់ តែសួរថា តើសារអំពានាវ ឲ្យធ្វើពហិការ ឈប់ប្រើផលិតផលអាមេរិកនេះ អាចទៅរួចដល់កម្រិតណា? តើប្រជាជនចិន អាចសុខចិត្ត ឈប់ប្រើ ផលិតផលរបស់ក្រុមហ៊ុនAppel និង Google ឬឈប់បរិភោគ ចំណីអាហារ លក់នៅហាង McDonald KFC ឬ Dunkin’ Donuts ដែរឬទេ?
លោក Wang Zhiyi រស់នៅក្រុងប៉េកាំង ដែលតែងតែទៅបរិភោគHumburger នៅMcDonald បាននិយាយថា លោកក៏បានទទួលសារអំពាវនាវទាំងនោះដែរ។ តែលោកយល់ថា វាជារឿងគ្មានប្រយោជន៍ ព្រោះមនុស្សដែលចែកចាយសារបំផុសបំផុសទាំងនោះ គ្មានចង់បានអ្វីក្រៅតែពីចង់ល្បី ចេញមុខចេញមាត់តែប៉ុណ្ណោះ។ លោកលើកឡើងថា សម្ភារៈ ឬនំចំណីផ្លាកយីហោររបស់អាមេរិកទាំងនេះ មិនមែនតំណាងឲ្យអំណាចចក្រព័ត្ររបស់អាមេរិកនោះទេ។
ចំណែកលោក Ben Cavender អ្នកជំនាញសេដ្ឋកិច្ច នៅChina Market Research Group នៅសៀងហៃ បានលើកឡើងថា ការធ្វើពហិការឈប់ប្រើផលិតផលអាមេរិក គឺជារឿងពិបាកធ្វើណាស់។ បើតាមការវិភាគរបស់លោក ទោះបីជាមានសារអំពាវនាវ បំផុសបំផុល តាមបណ្តាញសង្គមនៅចិនក៏ដោយ តែការទំនាក់ទំនងការងារ រវាងបុគ្គលិក ក៏ដូចជាក្រុមហ៊ុនចិន និងអាមេរិក គឺនៅតែល្អប្រសើរដដែល។ ក៏ប៉ុន្តែលោក Jim Boyce អ្នកជំនាញពាណិជកម្មស្រាទំពាំងបាយជូរ ទទួលស្គាល់ថា ស្រាទំពាំងបាយជូរ នាំចូលពីអាមេរិកកំពុងតែជួបបញ្ហា ដោយសារតែរដ្ឋាភិបាលចិន បានសម្រេចដំឡើងពន្ធបន្ថែម១៥%ទៀត។
គួរបញ្ជាក់ថា បន្ទាប់ពីរដ្ឋាភិបាលអាមេរិក សម្រេចបន្ថែមពន្ធលើផលិតផលចិន រដ្ឋាភិបាលចិន ក៏បានរៀបចំធ្វើតារាងមុខទំនិញមួយចំនួនរបស់អាមេរិក ដើម្បីដាក់ពិន័យវិញដែរ។ កាលពីឆ្នាំ២០១០ រដ្ឋាភិបាលចិន បានដាក់ពិន័យ លើការនាំចូលត្រីសូម៉ុង របស់ន័រវេហ្ស បន្ទាប់ពីគណកម្មការពានរង្វាន់ណូបែល បានប្រគល់មេដាយ ជូនលោក Liu Xiaobo។ ហើយកាលពីឆ្នាំ២០០៨ បន្ទាប់ពីលោក Nicolas Sarkozy បានទទួលជួប សម្តេចសង្ឃដាឡៃឡាម៉ា អាជ្ញាធរចិន បានបំផុសបំផុល ឲ្យប្រជាជនធ្វើបាតុកម្មនៅមុខផ្សារទំនើប Carrefour របស់បារាំង។
គួរកត់សម្គាល់ថា បើក្រឡេកមើលទៅអតីតកាល ការធ្វើពហិការ របស់ប្រជាជនចិន អាចធ្វើទៅរួច និងមានប្រសិទ្ធិភាព បើសិនជាមានការបើកដៃ ពីសំណាក់រដ្ឋាភិបាលចិន ហើយធ្វើក្នុងរយៈពេលវែង។ ជាក់ស្តែង ការធ្វើពហិការ ទៅលើផលិតផលកូរ៉េខាងត្បូង កាលពីឆ្នាំ២០១៧។ តែយ៉ាងណា ការបង្កការលំបាកលើទីផ្សារ គឺវាប៉ះពាល់ ទាំងទៅលើក្រុមហ៊ុនអាមេរិក និងក្រុមហ៊ុនចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ