ក្រោយផ្ទុះអាវុធជាមួយប៉ាគីស្ថាន នាយករដ្ឋមន្ត្រីឥណ្ឌា ប្រកាសឲ្យឥណ្ឌាកុំចុះចាញ់សត្រូវ
ដូចអ្វីដែលគេព្រួយបារម្ភ ការផ្ទុះអាវុធដាក់គ្នា បានកើតឡើង រវាងកងទ័ពឥណ្ឌា និងប៉ាគីស្ថាន នៅឯតំបន់កាស្មៀរប្រមាណ២ថ្ងៃមកហើយ។ កងទ័ពប្រទេសទាំង២ បានបាញ់កំទេចយន្តហោះទំលាក់គ្រាប់បែកទាំងសងខាង។ នៅថ្ងៃព្រហស្បតិ៍ទី២៨កុម្ភៈនេះ សម្លេងគ្រាប់កាំភ្លើងបាញ់តបតគ្នា នៅតាមបណ្តោយព្រំដែនតំបន់កាស្មៀរ នៅតែបន្តបន្លឺឡើង។ ខណៈដែល រដ្ឋមន្ត្រីប៉ាគីស្ថាន អំពាវនាវឲ្យមានការជួបចរចាគ្នា លោកនាយករដ្ឋមន្ត្រីឥណ្ឌាឯនោះ បានប្រកាសក្រើនរំលឹកប្រជាជនឥណ្ឌាម្នាក់ៗ ឲ្យក្រោកឈរឡើងធ្វើជាជញ្ជាំង ទប់ទល់ជាមួយសត្រូវឈ្លានពាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
អ្នកនាំពាក្យ ក្រសួងការពារជាតិឥណ្ឌា បានអះអាងថា កងទ័ពឥណ្ឌាត្រៀមខ្លួន តតាំងដោយអង់អាចក្លាយហានបំផុត។ តែយ៉ាងណា ការបាញ់តគ្នានៅថ្ងៃព្រហស្បតិ៍ មានកំរិតតិចតួចណាស់ បើប្រៀបធៀបទៅនឹង ការបាញ់ផ្លោងដោយកាំផ្លើងធំ និងប្រតិបត្តិការទំលាក់គ្រាប់បែក កាលពីថ្ងៃអង្គារ និងថ្ងៃពុធ។
នៅថ្ងៃអង្គារ កងទ័ពឥណ្ឌា គឺជាអ្នកចាប់ផ្តើម ដោយបានបាញ់កំទេចទីតាំងមួយកន្លែង នៅក្នុងទឹកដីប៉ាគីស្ថាន ដែលឥណ្ឌាអះអាងថា គឺជាមូលដ្ឋានហ្វឹកហាត់ របស់ក្រុមភេរវកម្មអ៊ីស្លាម Jaish-e-Mohammed។ គឺក្រុមនេះហើយ ដែលបានចេញមុខអះអាង ថាបានធ្វើភេរវកម្ម សម្លាប់ទាហានឥណ្ឌា ចំនួនជាង៤០នាក់ កាលពីថ្ងៃទី១៤កុម្ភៈ។
ជាការឆ្លើយតបនឹងការទម្លាក់គ្រាប់បែករបស់ឥណ្ឌា កងទ័ពអាកាសប៉ាគីស្ថាន បានហោះមកទំលាក់គ្រាប់បែក ក្នុងតំបន់កាស្មៀរឥណ្ឌា។ កងទ័ពប៉ាគីស្ថាន អះអាងថាខ្លួន បានបាញ់កម្ទេចយន្តហោះចំបាំងឥណ្ឌា ចំនួន២គ្រឿង ព្រមទាំងចាប់បានអ្នកបើកយន្តហោះឥណ្ឌាម្នាក់ផង។ ដោយឡែកឥណ្ឌា វិញបានអះអាងថា នៅថ្ងៃពុធ ខ្លួនបានបាត់បង់យន្តហោះចំបាំងមួយ តែក៏បានបាញ់កំទេចយន្តហោះចំបាំងរបស់ប៉ាគីស្ថានមួយគ្រឿងវិញដែរ។
ប្រឈមមុខនឹងបញ្ហានេះ ប៉ាគីស្ថានបានសម្រេច បិទដែនអាកាសរបស់ខ្លួន បណ្តោះអាសន្នសិន។ ក្រុមហ៊ុនអាកាសចរណ៍បរទេស ដែលត្រូវហោះទៅកាន់ប៉ាគីស្ថាន ឬត្រូវហោះកាត់ពីលើប៉ាគីស្ថាន ត្រូវបង្ខំចិត្តលុបជើងហោះហើរ ឬត្រូវប្តូរផ្លូវហោះហើរ។ លោក Imran Khan នាយករដ្ឋមន្ត្រីប៉ាគីស្ថាន បានអំពាវនាវឲ្យមានការចរចាគ្នា ដើម្បីបញ្ចៀសសង្រ្គាម ដែលកើតឡើងពីការយល់ច្រឡំណាមួយ។ ជាមួយនឹងអាវុធ នុយក្លេអ៊ែរ ដែលប្រទេសទាំង២មាន បើសិនជាមានសង្រ្គាមមែននោះ នោះគឺជាការគិតខុសធ្ងន់ធ្ងរណាស់។
ដោយឡែក នៅថ្ងៃព្រហស្បតិ៍ទី២៨កុម្ភៈនេះ លោកណារិន្ទ្រ ម៉ូឌី នាយករដ្ឋមន្ត្រីឥណ្ឌា បាននិយាយនៅក្នុងវីដេអូ ដែលចាក់ផ្សាយទូទាំងប្រទេសថា៖ “សត្រូវមានបំណងបំផ្លាញការរីកចំរើន ស្ថិរភាព និងឯកភាពជាតិឥណ្ឌា។ ដូច្នេះ ចូរប្រជាជនឥណ្ឌាម្នាក់ៗ ក្រោកឈរឡើងដើម្បីធ្វើជាជញ្ជាំង ទប់ទល់ជាមួយនឹងការឈ្លានពានរបស់សត្រូវ។ ឥណ្ឌាឯកភាពគ្នា ឥណ្ឌានឹងឈ្នះ!”។
គួរកត់សំគាល់ថា សម្តីអំពាវនាវបែបជាតិនិយម ពន្យុះកំហឹងទៅក្នុងស្រទាប់យុវជនឥណ្ឌា ពីសំណាក់លោកណារិន្ទ្រ ម៉ូឌីនេះ ត្រូវបានអ្នកវិភាគយល់ឃើញថា គឺជាការកេងចំណេញនយោបាយសុទ្ធសាធ។ ជាមួយនឹងការបោះឆ្នោត នៅខែឧសភាខាងមុខ លោកណារិន្ទ្រ ម៉ូឌី សង្ឃឹមយកឈ្នះ តាមរយៈការអះអាងខ្លួន ថាជាអ្នកតំណាងឯកភាពជាតិឥណ្ឌា និងជាមនុស្សតែម្នាក់ ដែលអាចការពារឥណ្ឌា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ