រដ្ឋាភិបាលចុះខ្សោយ ក្រោយពីការលាឈប់ពីមុខតំណែងរបស់មន្រ្តីជាន់ខ្ពស់ពីររូប
លោក Hamid Karzaï ប្រធានាធិបតី នៃប្រទេសអាហ្វហ្កានីស្តង់បានយល់ព្រមការសុំលាឈប់ពីមុខតំណែងរបស់ មន្រ្តីជាន់ខ្ពស់ពីររូប គឺ លោក Hanif Atmar រដ្ឋមន្រ្តីក្រសួងមហាផ្ទៃ និងលោក Amrullah Saleh ប្រធានការិយាល័យស៊ើបការសំងាត់កាលពីថ្ងៃ អាទិត្យ ទី៦ មិថុនា ឆ្នំា ២០១០។ ការលាឈប់ពីមុខតំណែងរបស់មន្រ្តីជាន់ខ្ពស់ទំាងពីររូបបានធ្វើ ឡើង បន្ទាប់ពីមានការវាយប្រហារពីសំណាក់ក្រុមឧទ្ទាមតាលីបង់ក្នុងឱកាស ពិធីបើកកិច្ចប្រជុំដើម្បីសន្តិភាពកាលពីថ្ងៃពុធ ទី២ មិថុនាកន្លងទៅ។
ចុះផ្សាយនៅថ្ងៃ៖
សេចក្តីរាយការណ៍របស់ គួច គន្ធារ៉ា
ការសុំលាឈប់ពីមុខតំណែងរបស់មន្រ្តីជាន់ខ្ពស់អាហ្វហ្កានីស្តង់ទំាងពីររូបបានបង្ហាញយ៉ាងច្បាស់ អំពីភាពមិនចុះសំរុងគ្នា ឬក៏ថាភាពមិនទុកចិត្តគ្នានៅក្នុងរដ្ឋាភិបាលរបស់លោកប្រធានាធិបតី Hamid Karzaï។ មានមូលហេតុច្រើនដែលបញ្ជាក់ពីការសុំលាឈប់ពីមុខតំណែងរបស់លោករដ្ឋមន្រ្តីក្រសួងមហាផ្ទៃ និងលោកប្រធានការិយាល័យស៊ើបការសំងាត់។ ប៉ុន្តែលោកប្រធានាធិបតី Hamid Karzaïបានលើកយកហេតុផលថា មកពីមន្រ្តីជាន់ខ្ពស់ទំាងពីររូបបានធ្វេសប្រហែសនឹងការងាររបស់ខ្លួន ដោយទុកបណ្តោយឲ្យក្រុមឧទ្ទាមតាលីបង់អាចវាយប្រហារក្នុងឱកាសពិធីបើកកិច្ចប្រជុំដើម្បីសន្តិភាពកាលពីថ្ងៃពុធ ទី២ មិថុនាកន្លងទៅ។ ជាទូទៅ កិច្ចប្រជុំដើម្បីសន្តិភាពជាពិធីមួយដែលត្រូវបានគេការពារ រក្សាសន្តិសុខយ៉ាងម៉ត់ចត់ជាទីបំផុត។
ដូច្នេះឃើញថា ការសុំលាឈប់ពីមុខតំណែងរបស់មន្រ្តីជាន់ខ្ពស់ទំាងពីររូប អាចជាទណ្ឌកម្មមួយពីសំណាក់លោកប្រធានាធិបតី Hamid Karzaï។ តែបញ្ហានៅត្រង់ថា មន្រ្តីជាន់ខ្ពស់ទំាងពីររូបគឺជាឥស្សរជនដែលត្រូវបានគេគោរព និងកោតសរសើរពីសំណាក់ប្រជាជនអាហ្វហ្កានីស្តង់ និងពីប្រទេសលោកខាងលិច។ សំណួរដែលចោទ ថាតើមន្រ្តីជាន់ខ្ពស់ទំាងពីររូបចំាបាច់ត្រូវតែដើរចេញពីរដ្ឋាភិបាលដោយសារតែការវាយប្រហារសឹងតែរាល់ថ្ងៃរបស់ពួកតាលីបង់ ឬយ៉ាងណា ?
អ្វីដែលគេធ្លាប់បានដឹងកន្លងមកនោះគឺថា ទំាងលោករដ្ឋមន្រ្តីក្រសួងមហាផ្ទៃ និងលោកប្រធានការិយាល័យស៊ើបការសំងាត់ បានប្រឆំាងដាច់ខាតនឹងនយោបាយរបស់លោកប្រធានាធិបតី Hamid Karzaï ដែលបានបោះដៃទៅពួកតាលីបង់តាមរយៈនយោបាយផ្សះផ្សាជាតិ។ តែយ៉ាងណាក៏ដោយ ការសម្រេចចិត្តរបស់លោក Hamid Karzaï ដែលយល់ព្រមតាមការសុំលាឈប់ពីមុខតំណែងរបស់មន្រ្តីជាន់ខ្ពស់ទំាងពីររូប មិនបានធ្វើឲ្យរដ្ឋាភិបាលរបស់លោកពេញចិត្តទេ និងពិតជាមិនបានធ្វើឲ្យថ្នាក់ដឹកនំាមួយចំនួនរបស់បស្ចិមលោកយល់ស្របដែរ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ