ទួរគីបង្កើនទម្ងន់ការទូតរបស់ខ្លួននៅក្នុងតំបន់
ថ្ងៃនេះប្រទេសទួរគីជាម្ចាស់ផ្ទះ អ្នករៀបចំជំនួបកំពូលស្តីពីសន្តិសុខតំបន់អាស៊ីដែលចូលរួមដោយ ប្រមុខរដ្ឋនិងប្រមុខរដ្ឋាភិបាលជាង២០ប្លាយប្រទេស ក្នុងនោះរួមមានជាអាទិ៍ ប្រធានាធិបតីអៀរ៉ង់ ស៊ីរី អាហ្វហ្កានីស្តង់ និងប្រធានរដ្ឋអំណាចប៉ាលេស្ទីន ព្រមទាំងនាយករដ្ឋមន្ត្រីរុស្ស៊ី។ អង្គប្រជុំនេះ ជាឱកាសមួយសម្រាប់អាជ្ញាធរទួរគីក្នុងការបង្កើនសម្ពាធទៅលើ អ៊ីស្រាអែលមួយសប្តាហ៍ក្រោយពីកងទ័ពនៃប្រទេសនេះបានប្រព្រឹត្តអំពើ ហិង្សាទៅលើកប៉ាល់ដឹកជំនួយមនុស្សធម៌ទៅឲ្យប្រជាជនប៉ាលេស្ទីននៅ ហ្កាសា (Gaza)រួចមក។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ តាន់ ហ្សង់-ហ្វ្រង់ស្វ័រ
នៅលើវេទិកានៃជំនួបកំពូលអ្នកដឹកនាំប៉ាលេស្ទីន ស៊ីរី អៀរ៉ង់ ។ល។និង។ល។បាននាំគ្នាថ្កោលទោសទៅលើអ៊ីស្រាអែល។ រីឯថ្នាក់ដឹកនាំទួរគីវិញបានទាមទារជាថ្មីឲ្យបង្កើតគណៈកម្មាការអន្តរជាតិមួយដើម្បីស៊ើបអង្កេតជុំវិញអំពើហឹង្សាបង្កឡើងដោយកងទ័ពអ៊ីស្រាអែលនៅលើកប៉ាល់ដឹកជំនួយមនុស្សធម៌ អំពើហឹង្សាកាលពីសប្តាហ៍មុនដែលបានបណ្តាលឲ្យសកម្មជនដើម្បីបុព្វហេតុប៉ាលេស្ទីនសញ្ជាតិទួរគី៩នាក់ស្លាប់បាត់បង់ជីវិត។
ចំពោះនាយករដ្ឋមន្ត្រីទួរគីគឺជាការកាប់សម្លាប់រង្គាលបង្កឡើងដោយរដ្ឋភេរវនិយមមួយ។ សម្រាប់លោកប្រធានាធិបតីស៊ីរីវិញ គឺជាឧក្រិដ្ឋកម្មដោយចេតនាមួយដែលបង្ហាញឲ្យឃើញជាថ្មីនូវជំហរប្រឆាំងនឹងសន្តិភាពរបស់ប្រទេសអ៊ីស្រាអែល។
អ្វីដែលទួរគីចង់បានគឺសេចក្តីថ្លែងការណ៍រួមមួយនៅពេលបិទបញ្ចប់អង្គប្រជុំសេចក្តីថ្លែងការណ៍រួមដែលថ្កោលទោសយ៉ាងខ្លាំងក្លាទៅលើអ៊ីស្រាអែល។ យ៉ាងណាក៏ដោយជំនួបកំពូលស្ដីពីសន្តិសុខតំបន់អាស៊ីនេះ ក៏ជាឱកាសមួយដែលស្តែងឲ្យឃើញនូវមហិច្ឆតាការទូតថ្មីរបស់ទួរគីដែលបាននិងកំពុងបន្តបែរខ្នងដាក់អ៊ីស្រាអែល ដើម្បីងាកមកគាំទ្រនិងការពារបុព្វហេតុប៉ាលេស្ទីន ក្នុងគោលដៅទាក់ទាញសមានចិត្តរបស់បណ្តាប្រទេសអ្នកកាន់សាសនាអ៊ីស្លាមនៅក្នុងលោក។
នៅក្នុងន័យនេះ នាយករដ្ឋមន្ត្រីទួរគីនិងប្រធានរដ្ឋអំណាចប៉ាលេស្ទីនបានសម្រេចបង្កើតនៅថ្ងៃនេះគណៈកម្មការចម្រុះមួយដើម្បីពង្រឹងសហប្រតិបត្តិការរវាងប្រទេសទាំងពីរ។ គណៈកម្មការចម្រុះនេះនឹងរួមប្រជុំគ្នាមួយឆ្នាំពីរដងត្រឹមថ្នាក់រដ្ឋមន្ត្រីក្រសួងការបរទេស ដើម្បីពិនិត្យមើលកិច្ចសហប្រតិបត្តិការមួយចំនួននៅលើវិស័យ អប់រំ សុខភាព កសិកម្ម វិទ្យាសាស្រ្ត និងវប្បធម៌៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ