ក្បួនរថយន្តដឹកគ្រឿងផ្គត់ផ្គង់របស់អូតង់ត្រូវបានពួកតាលីបង់វាយប្រហារ
ពួកតាលីបង់ នៅល្ងាចថ្ងៃអង្គារម្សិលមិញ បានដុតបំផ្លាញក្បួនឡានcamionដឹកគ្រឿងផ្គត់ផ្គង់សំដៅយកទៅឱ្យកង កម្លាំងទ័ពអូតង់ នៅអាហ្វហ្កានិស្តង់ ដោយបានសម្លាប់មនុស្សអស់យ៉ាងតិច៧នាក់ នៅក្នុងការវាយប្រហារជាលើកទីមួយរបៀបបែបនេះ នៅតំបន់ជិតខាងរដ្ឋធានីIslamabad -យោងតាមព័ត៌មានរបស់ប៉ូលិសប៉ាគីស្តង់ឱ្យដឹងនៅថ្ងៃពុធ៩មិថុនានេះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ វីនស្តុន រតនា
យ៉ាងតិច មានជនប្រដាប់អាវុធដប់នាក់ ខ្លះបានជិះម៉ូតូ ខ្លះទៀតបានជិះឡានcamionតូចៗមកដល់ឃ្លាំងមួយស្ថិតនៅមិនឆ្ងាយប៉ុន្មានពីភូមិTarnolជាទីដែលពួកវាបានបាញ់សម្លាប់ពួកអ្នកបើកឡានរត់ផ្លូវឆ្ងាយនិងពួកនិយោជិត ហើយក៏បានគេចខ្លួនបាត់ទៅ។
"មនុស្ស៧នាក់បានស្លាប់និងឡានcamionជាង៥០គ្រឿងត្រូវបានដុតកំទេច “ -នេះជាសំដីរបស់អ្នកទទួលខុសត្រូវម្នាក់នៃប៉ូលិសប៉ាគីស្តង់។ការវាយប្រហារក៏បានបណ្តាលឱ្យមានអ្នកត្រូវរបួស៦នាក់ដែរ។
ក្បួនឡានcamionត្រូវដឹកប្រេងឥន្ធនៈ ស្បៀងអាហារនិងគ្រឿងផ្គត់ផ្គង់ដទៃទៀត ទៅឱ្យកងទ័ពអូតង់ប្រចាំការ នៅអាហ្វហ្កានិស្តង់។ជាទូទៅ ឡានcamionបែបនេះមិនដឹកអាវុធទេ។
កងទ័ពអាមេរិកាំង តាមរយៈប៉ាគីស្តង់ ដឹកពស្តុភារចំនួន៧៥% យកទៅឱ្យកងទ័ពខ្លួន ប្រចាំការ នៅអាហ្វហ្កានិស្តង់ដែលក្នុងចំណោមនេះ មានប្រេងឥន្ធនៈចំនួន៤០%។
ពួកឩទ្ទាមតាលីបង់ដែលមានមូលដ្ឋានក្រោយ នៅប៉ែកពាយ័ព្យនៃប្រទេសប៉ាគីស្តង់ ច្រើនតែធ្វើប្រតិបត្តិការវាយប្រហារទៅលើក្បួនឡានអូតង់ដែលដឹកពស្តុភារយកទៅឱ្យកងកម្លាំងទ័ពបរទេស ប្រចាំការ នៅអាហ្វហ្កានិស្តង់។
ប៉ុន្តែ ជាលើកទីមួយហើយដែលពួកតាលីបង់វាយសំពងនៅជិតរដ្ឋធានីIslamabad ហើយការវាយប្រហារនេះសង្កត់ធ្ងន់ទៅលើបញ្ហាអសន្តិសុខកាន់តែរីកធំឡើង នៅប៉ាគីស្តង់ជាទីដែលពួកតាលីបង់បានធ្វើអំពើភេរវកម្មអត្តឃាតជាបន្តបន្ទាប់គ្នា ជាការសងសឹកតប-តចំពោះការវាយលុករបស់កងទ័ពប៉ាគីស្តង់ទៅលើមូលដ្ឋានរបស់ខ្លួន នៅប៉ែកពាយ័ព្យប្រទេស។
នៅចុងខែឩសភា ពួកសកម្មជនជាសម្ព័ន្ធមិត្តរបស់ពួកតាលីបង់ប៉ាគីស្តង់បានសម្លាប់ជនជាង៨០នាក់ នៅឱកាសវាយប្រហារពីរលើកទៅលើនិកាយសាសនាអ៊ីស្លាមភាគតិចAhmadis នៅទីក្រុង Lahoreខាងកើតប៉ាគីស្តង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ