ការប្រកាសអាសន្នកំរិតខ្ពស់បំផុតនៅលើកោះស៊ូម៉ាត្រា
ភ្នំភ្លើងនៃភ្នំSinabung នៅលើកោះស៊ូម៉ាត្រា នៅឥណ្ឌូនេស៊ីបានចាប់ផ្ទុះនៅព្រឹកថ្ងៃ២៩សីហានេះ។អ្នករស់នៅ ក្បែរភ្នំភ្លើងហ្នឹងជាច្រើនពាន់នាក់ត្រូវបានជម្លៀសចេញ ហើយអាជ្ញាធរបានប្រកាសអាសន្នកំរិតខ្ពស់បំផុត។ពួកអ្នកឯកទេសខាង ភ្នំភ្លើង នៅខណៈនេះពុំអាចប៉ាន់ស្មានឱ្យបានជាក់លាក់ទេអំពីសក្តានុពលនៃ ភ្នំភ្លើងSinabung។ភ្នំភ្លើងនេះបានស្ថិតនៅស្ងប់ស្ងៀមពុំបានផ្ទុះ ៤០០ឆ្នាំមកហើយ។
ចុះផ្សាយនៅថ្ងៃ៖
សេចក្តីរាយការណ៍របស់Solenn Honorineពីទីក្រុងហ្សាកាតាប្រែសម្រួលដោយវីនស្តុន រតនា
២ថ្ងៃហើយដែលភ្នំSinabungបានចាប់ផ្តើមឱ្យសញ្ញានៃការចាប់មានសកម្មភាពឡើងវិញ។ស្របតាមសារព័ត៌មានក្នុងស្រុក បណ្តាជននៃភូមិទាំង៤ជិតជាងគេមានអារម្មណ៍បានដឹងឮការរញ្ជួយដី ល្ងាចមិញ។ជាការរញ្ជួយដីដែលបណ្តាលមកពីសកម្មភាពនៃភ្នំភ្លើង។បន្ទាប់មក ភ្នំកំពស់២៥០០ម៉ែត្របានចាប់ផ្តើមខ្ជាក់កំអែរបស់ខ្លួន។ព្រៃឈើនៅលើចង្កេះភ្នំក៏បានផ្តើមឆេះ។នៅថ្ងៃនេះទៀត ភ្នំភ្លើងនៅតែបន្តបញ្ចេញផេះរហូតដល់កំពស់១៥០០ម៉ែត្រ។ផ្សែងឡើងក្រាស់ ទាល់តែតំបន់នៅជុំវិញភ្នំភ្លើងចាប់ផ្តើមធុំក្លិនស្ពាន់ធ័រ។
អាជ្ញាធរបានចែកម៉ាស់( masque )គឺរបាំងមុខចំនួន៥០០ ឱ្យបណ្តាជន ដើម្បីបង្ការទល់នឹងបញ្ហាដកដង្ហើមដែលអាចកើតមានឡើង។បណ្តាជនរហូតដល់ចំនួន១ម៉ឺន២០០០នាក់ត្រូវបានជម្លៀសចេញ នៅក្នុងតំបន់នេះ ភាគច្រើនជាអ្នកធ្វើស្រែចម្ការនិងពុំសូវមានបណ្តាជនប៉ុន្មានទេ។ឥណ្ឌូនេស៊ីមានភ្នំភ្លើងសកម្មចំនួនជាង៨០ នៅលើដែនដីខ្លួន ប៉ុន្តែភ្នំSinabungពុំមែនជាភ្នំដែលធ្វើឱ្យគេភ័យខ្លាចខ្លាំងបំផុត ដោយហេតុសក្តានុពលបំផ្លិចបំផ្លាញរបស់វានោះទេ។ប៉ុន្តែ វាស្ថិតនៅស្ងប់ស្ងៀមពុំបានផ្ទុះ៤០០ឆ្នាំមកហើយ ហេតុនេះហើយបានជាពួកអ្នកឯកទេសខាងភ្នំភ្លើងស្គាល់ពុំច្បាស់ទេចំនួនកើតមានជារឿយៗនៃការផ្ទុះរបស់វា។ការនេះធ្វើឱ្យពិបាកស្មុគស្មាញដល់ភារកិច្ចរបស់ពួកគេ ដើម្បីប៉ាន់ស្មានសក្តានុពលនៃសកម្មភាពរបស់វា។ដោយមានការមន្ទិលសង្ស័យ ការប្រកាសអាសន្នកំរិតខ្ពស់បំផុតត្រូវបានធ្វើ នៅក្នុងតំបន់ទាំងមូលដែលស្ថិតនៅជិតភ្នំភ្លើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ