ជនជាតិទួរគីបញ្ចេញមតិខ្លួននៅក្នុងប្រជាមតិស្តីពីរដ្ឋធម្មនុញ្ញ
ថ្ងៃអាទិត្យ១២កញ្ញានេះគម្រប់៣០ឆ្នាំគត់ បន្ទាប់ពីមានរដ្ឋប្រហារយោធា។រដ្ឋាភិបាលទួរគីអំពាវនាវសូមឱ្យពលរដ្ឋ ខ្លួនអញ្ជើញទៅកាន់ហិបឆ្នោត។នៅឱកាសប្រជាមតិ រដ្ឋាភិបាលនៃគណបក្សអ៊ីស្លាមអភិរក្សនិយមAKPចង់ឱ្យមានការពិនិត្យ សើរើឡើងវិញដ៏សំខាន់នូវរដ្ឋធម្មនុញ្ញដែលជាកេរមរតកបន្សល់ទុកឱ្យ ដោយរបបសឹកផ្តាច់ការនៅឆ្នាំ១៩៨០។នៅក្នុងដំណៅទិសធំៗរបស់ខ្លួន កំណែទម្រង់នេះត្រូវតែកាត់បន្ថយឥទ្ធិពលរបស់ពួកទាហាននិងចៅក្រម ដែលជាគូប្រឆាំងដ៏ឃោរឃៅបំផុតរបស់លោកនាយករដ្ឋមន្ត្រី Recep Tayyip Erdoganដែលបានកាន់រដ្ឋអំណាចចាប់ពីឆ្នាំ២០០៣មកម្ល៉េះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ វីនស្តុន រតនា
ចាប់ពីប៉ុន្មានខែមកហើយ លោកនាយករដ្ឋមន្ត្រីRecep Tayyip Erdogan បានធ្វើឱ្យលេចចេញមកវិញនូវអតីតបិសាចនៃប្រទេសទួរគី។
នៅក្នុងសុន្ទរកថាយុទ្ធនាការឃោសនាបំផុសបំផុលរបស់ខ្លួន លោកប្រមុខរដ្ឋាភិបាលទួរគីបានរំលឹកឡើងវិញ ឥតឈប់ឈររដ្ឋប្រហារយោធា នៅថ្ងៃ១២កញ្ញាឆ្នាំ១៩៨០ ដើម្បីប្រមូលយកសំឡេងឆ្នោតឱ្យបានច្រើនបំផុត នៅឱកាសប្រជាមតិ។” ថ្ងៃ១២កញ្ញាឆ្នាំ២០១០ យើងមានជម្រើសពីរនៅពីមុខយើងគឺឬមួយ យើងនឹងស្ថិតនៅខាងរដ្ឋធម្មនុញ្ញនៃរដ្ឋប្រហារ ឬមួយ យើងនឹងស្ថិតនៅខាងប្រជាជន។ហេតុនេះហើយ យើងនិយាយថា ប្រជាជនជាទីស្រឡាញ់ ចូរយើងបោះឆ្នោតគាំទ្រប្រជាមតិសើរើរដ្ឋធម្មនុញ្ញ !”។
កាត់បន្ថយឥទ្ធិពលរបស់ពួកទាហាននិងពង្រីកដែនសេរីភាពរបស់ពលរដ្ឋ -នេះហើយជាសសរទ្រូងពីរនៃការសើរើរដ្ឋធម្មនុញ្ញ។
ប៉ុន្តែតាមរយៈកំណែទម្រង់នេះដែលត្រូវបានសហភាពអឺរ៉ូបទន្ទឹងរង់ចាំជាយូរមកហើយ លោកRecep Tayyip Erdogan ប្រឈមមុខនឹងបញ្ហាមួយទៀតដែលត្រូវពុះពារជំនះ។សំរាប់លោកប្រធានគណបក្សយុត្តិធម៌និងអភិវឌ្ឍន៍ហៅកាត់ថាAKPគឺជាតេស្ត(test)ឆ្នោតដ៏ធំចុងក្រោយ មុនការបោះឆ្នោតសភា នៅឆ្នាំក្រោយ២០១១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ