ទឹកជំនន់នៅតែបន្តកើនឡើងនៅរដ្ឋQueensland
នៅអូស្ត្រាលី Queenslandជារដ្ឋនៅប៉ែកឦសានតាមបណ្តោយសមុទ្រCorail នៅតែលិចទឹកជានិច្ច បណ្តាលមកពីភ្លៀងរំលាចាប់តាំងពីមួយខែមកហើយ។រហូតមកទល់ពេលនេះ ជន២០ម៉ឺននាក់បានរងគ្រោះដោយទឹកជំនន់នេះនៅទីក្រុងចំនួន២៣។នៅ ថ្ងៃចន្ទម្សិលមិញ៣មករា កន្លែងដែលមានទឹកជំនន់ខ្លាំងបំផុតបែរជាបានរំកិលទៅកណ្តាលរដ្ឋ Queensland។អាជ្ញាធរបានកេណ្ឌកងទ័ពដើម្បីដឹកជញ្ជូនស្បៀងអាហារនិង ថ្នាំពេទ្យយកទៅចែកជូនឱ្យអ្នកក្រុងRockhamptonដែលត្រូវទឹកជំនន់ កាត់ផ្តាច់ពីគេឯងទាំងអស់នៃប្រទេស។ស្ថានភាពនេះអាចនឹងមាន រយៈពេលពីរសប្តាហ៍ទៀត។
ចុះផ្សាយនៅថ្ងៃ៖
សេចក្តីរាយការណ៍របស់ Caroline LAFARGUEប្រែសម្រួលដោយ វីនស្តុន រតនា
នៅRockhamptonជាទីក្រុងធំនៃកណ្តាលរដ្ឋQueensland ទឹកជំនន់នៅស្ទឹងFitzroyនឹងឡើងដល់កំរិតខ្ពស់បំផុតនៅល្ងាចថ្ងៃអង្គារ៤មករានេះ។អ្នកផ្ទះ៥០០ខ្នងត្រូវបានជម្លៀសចេញនៅក្នុងទីក្រុងដែលមានបណ្តាជន៧ម៉ឺន៥០០០នាក់។អាកាសយានដ្ឋានត្រូវបានបិទ ចរន្តអគ្គិសនីត្រូវបានកាត់ផ្តាច់ដោយវិធានការបង្ការទុកជាមុន។
មួយភាគធំនៃកណ្តាលរដ្ឋQueenslandបានលិចទឹករួចស្រេចទៅហើយៗមានតែផ្លូវថ្នល់មួយគត់នៅអាចធ្វើចរាចរណ៍បាននៅព្រឹកថ្ងៃអង្គារនេះដែលអាចឱ្យធ្វើដំណើរទៅកាន់ភាគខាងជើងនៃទីក្រុង។Rockhamptonនឹងត្រូវកាត់ផ្តាច់ពីទីដទៃទៀតនៃរដ្ឋQueenslandក្នុងអំឡុងពេល២សប្តាហ៍។
កងទ័ពអូស្ត្រាលីបានចាត់តាំងឱ្យមានស្ពានអាកាសទៅកាន់ទីក្រុងជិតខាងMackay។បន្ទាប់មក គ្រឿងឩបភោគបរិភោគចាំបាច់បំផុតនឹងត្រូវដឹកតាមកប៉ាល់ទៅកាន់កណ្តាលក្រុង។គ្រោះធម្មជាតិធំបំផុតដែលរដ្ឋQueenslandបានជួបប្រទះជាលើកទី១ក៏គឺជាគ្រោះមហន្តរាយខាងសេដ្ឋកិច្ចដែរ។
កសិករនិងម្ចាស់សហគ្រាសតូចតាចនឹងទទួលប្រាក់ជួយឩបត្ថម្ភចំនួន២ម៉ឺន៥០០០ដុល្លារអូស្ត្រាលីពីរដ្ឋាភិបាលនៃរដ្ឋQueensland ។ចំនួន៣/៤នៃអណ្តូងធ្យូងថ្មពុំអាចដំណើរការបានទៀតឡើយ។ហើយសុបិនអាក្រក់មិនងាយនឹងចប់បាត់ទៅទេ ពីព្រោះក្រសួងឩតុនិយមអូស្ត្រាលីបានប្រមើលទុកថា នឹងមានភ្លៀងធ្លាក់ខ្លាំង ចាប់ពីល្ងាចថ្ងៃអង្គារនេះទៅលើភាគខាងត្បូងនៃរដ្ឋQueensland៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ