វៀតណាមចេញក្រឹត្យថ្មីសម្រាប់បង្កើតក្របខ័ណ្ឌគ្រប់គ្រងអ្នកកាសែតនិងអ្នកបង្កើតBlog
ប្រទេសវៀតណាមបានអនុម័តក្រឹត្យថ្មីមួយសម្រាប់បង្កើតក្របខ័ណ្ឌគ្រប់គ្រងសកម្មភាពរបស់អ្នកកាសែត និងអ្នកបង្កើតBlog ដោយគ្រោងឲ្យមានការផាកពិន័យយ៉ាងធ្ងន់ធ្ងរ។ ទាំងនេះ បន្ថែមពីលើវិធានច្បាប់មួយចំនួនដែលមាន ហើយដែលគណៈកម្មាធិការអាមេរិកាំងខាងការពារអ្នកកាសែត( CPJ )ធ្លាប់បានបរិហារថា ជាវិធានច្បាប់សម្លាប់សិទ្ធិសេរីភាព។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
បើយោងតាមអត្ថបទច្បាប់ដែលបានចុះហត្ថលេខាដោយលោកនាយករដ្ឋមន្ត្រីវៀតណាមNguyen Tan Dungដែលត្រូវចូលជាធរមាននៅខែក្រោយ ហើយដែលគ្រោងមានការផាកពិន័យដល់ទៅ៤០លានដុង ឬត្រូវជា២ ០០០ដុលា្លរដល់ជនណាដែលបានផ្សព្វផ្សាយព័ត៌មានដោយគ្មាន”ការអនុញ្ញាត” ឬពុំសមស្របនឹង”ផលប្រយោជន៍របស់ប្រជាជន”។
នៅក្នុងសេចក្តីថ្លែងការណ៍មួយរបស់គណៈកម្មាធិការអាមេរិកាំងខាងការពារអ្នកកាសែត(CPJ )បានបរិហារថា ក្រឹត្យថ្មីនេះជាក្រឹត្យ ”សម្លាប់សិទ្ធិសេរីភាព” ដាក់បន្ថែមពីលើវិធានច្បាប់ដែលមានលក្ខណៈដូចគ្នានេះ ហើយដែលធ្លាប់មានជាច្រើនរួចទៅហើយ។
លោកShawn Crispin អ្នកតំណាងនៃអង្គការការពារអ្នកកាសែតនៅតំបន់អាស៊ីអាគ្នេយ៍បានថ្លែងបរិហារថា “ ក្រឹត្យថ្មីរបស់អាជ្ញាធរវៀតណាមនេះគឺធ្វើឡើងដើម្បីបង្កើនការក្តោបក្តាប់ត្រួតត្រារបស់រដ្ឋាភិបាលវៀតណាមទៅលើអ្នកកាសែតតែប៉ុណ្ណោះ”។ ហើយគណៈកម្មាធិការអាមេរិកាំងខាងការពារអ្នកកាសែត( CPJ )បានបរិហារទៀតអំពីការបង្ខិតបង្ខំរបស់អាជ្ញាធរវៀតណាមឲ្យអ្នកកាសែតថ្លែងប្រាប់បង្ហាញពីប្រភពព័ត៌មានរបស់ខ្លួនហើយនិងការហាមឃាត់ពុំឲ្យប្រើរហស្សនាម។
ចំណែកឯសារព័ត៌មានThan Nien ដែលជាសារព័ត៌មានមួយដ៏សំខាន់នៅប្រទេសវៀតណាមបានដកស្រង់ពាក្យសំដីរបស់លោកTrinh Thanh ដែលជាមេធាវី នៅទីក្រុងហូជីមិញបង្ហាញឲ្យដឹងថា “អ្នកកាសែតគួរតែមានសិទ្ធិការពារប្រភពព័ត៌មានរបស់ខ្លួននៅក្នុងការស៊ើបអង្កេតទៅលើអំពើពុករលួយ”។
គណៈកម្មាធិការអាមេរិកាំងខាងការពារអ្នកកាសែត( CPJ )បានធ្វើការចោទប្រកាន់ទៀតថា “ ក្រឹត្យថ្មីនេះជាក្រឹត្យ”សម្លាប់សិទ្ធិសេរីភាព”ហើយក៏ធ្វើឡើងដើម្បីសំដៅទៅលើអ្នកបង្កើតBlogដែលប្រើរហស្សនាមដោយពួកគេចង់គេចវេះពីការតាមធ្វើទុក្ខបុកម្នេញរបស់អាជ្ញាធរវៀតណាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ