សន្និសីទស្តីពីអាកាសធាតុ៖ ក្រុមប្រទេសខាងត្បូង និងខាងជើងនៅតែខ្វែងគំនិតគ្នាពីរឿងប្រាក់ជំនួយ
នៅប៉ុន្មានសប្តាហ៍មុនការបើកសន្និសីទអន្តរជាតិស្តីពីអាកាសធាតុ អ្នកតំណាងរបស់ប្រទេសចំនួន១៩៥ ដែលបានជួបប្រជុំគ្នា នៅក្នុងសន្និសីទនៅទីក្រុងប៊នប្រទេសអាល្លឺម៉ង់ បានអនុម័ត កាលពីថ្ងៃសុក្រ ទី ២៣តុលា គម្រោងកិច្ចព្រមព្រៀងមួយ ដែលគេនឹងយកទៅប្រើជាមូលដ្ឋានដើម្បីសម្រេចឲ្យបាននូវកិច្ចព្រមព្រៀងចុងក្រោយ នៅថ្ងៃបិទសន្និសីទអន្តរជាតិក្រុងប៉ារីស ដែលត្រូវប្រព្រឹត្តទៅ ចាប់ពីថ្ងៃទី ៣០វិច្ឆិកា រហូតដល់ថ្ងៃទី ១១ធ្នូចុងឆ្នាំនេះ។
ចុះផ្សាយនៅថ្ងៃ៖
ស្តាប់ - ០៧:៣៦
សេចក្តីព្រាងកិច្ចព្រមព្រៀង ដែលគេបានអនុម័ត កាលពីថ្ងៃម្សិលមិញ មានលក្ខណៈស្មុគស្មាញ និងគ្មានផែនការច្បាស់លាស់។ អ្នកដែលខកចិត្តច្រើន ជាងគេ គឺក្រុមប្រទេសកំពុងអភិវឌ្ឍ និងប្រទេសបារាំងផ្ទាល់ ដែលមាននាទីរៀបចំសន្និសីទរបស់អង្គការសហប្រជាជាតិ ស្តីពីអាកាសធាតុ នៅ៥សប្តាហ៍ខាងមុខ។ តាមគម្រោង សន្និសីទក្រុងប៊ន មានគោលដៅ បើកផ្លូវឲ្យគ្រប់ ភាគី ចរចាជាមួយគ្នា។ នៅក្នុងសន្និសីទក្រុងប៊ន ដែលជាកន្លែងប្រជុំចុងក្រោយ នៅមុនសន្និសីទអង្គការសហប្រជាជាតិចាប់ផ្តើម នៅទីក្រុងប៉ារីស គេមានគម្រោង ចង់ឲ្យគ្រប់ភាគី មិនថា ក្រុមប្រទេស បញ្ចេញឧស្ម័នផ្ទះកញ្ចក់ ឬក្រុមប្រទេសដែលរងគ្រោះដោយសារការប្រែប្រួលអាកាសធាតុ ជួប ចរចាគ្នា ដើម្បី សម្រេចចេញឲ្យបានអត្ថបទព្រាងមួយ ដែលគេនឹងយកទៅប្រើជាមូលដ្ឋានសម្រាប់ការចរចា នៅក្នុងសន្និសីទអន្តរជាតិក្រុងប៉ារីស។
ប៉ុន្តែ នៅទីបំផុត គេខកចិត្ត ព្រោះថា នៅក្នុងសន្និសីទក្រុងប៊ន ប្រទេសអាល្លឺម៉ង់ គេមិនបានចរចាអ្វីធំដុំទេ។ គេគ្រាន់តែបំភ្លឺចំណុចមួយចំនួន ដែលមិនសូវច្បាស់លាស់កន្លងមក ជាពិសេស ការចូលរួមរបស់ប្រទេសឧស្សាហកម្មដើម្បីកាត់បន្ថយ ការបញ្ចេញឧស្ម័នពុលទៅបរិយាកាស។ ឧស្ម័នពុល ឧស្ម័នផ្ទះកញ្ចក់ ដែលជាមូលហេតុចំបងធ្វើឲ្យផែនដីឡើងកំដៅ និងការប្រែប្រួលអាកាសធាតុនៅក្នុងពិភពលោក។
គោលដៅនៃសន្និសីទអន្តរជាតិប៉ារីស ស្តីពីបញ្ហាអាកាសធាតុ គឺធ្វើយ៉ាងណា ឲ្យគ្រប់ប្រទេសសន្យាចូលរួម កាត់បន្ថយ ឲ្យបានច្រើន ការបញ្ចេញឧស្ម័នផ្ទះកញ្ចក់ ដើម្បីកុំឲ្យកំដៅផែនដី កើនឡើង ច្រើនជាង ២អង្សារសេ បើប្រៀបធៀបនឹងកាលមុនសម័យឧស្សាហកម្ម។
ខាងជើង និងខាងត្បូងនៅបន្តខ្វែងគំនិត គ្នា គឺរឿងថវិកា ជំនួយ សម្រាប់ជួយប្រទេសដែលរងគ្រោះដោយសារការប្រែប្រួលអាកាសធាតុ
អ្វីដែលក្រុមប្រទេសខាងត្បូងផែនដី ទាមទារចង់បាន គឺការគិតគូផ្តល់សំណង ផ្តល់ជំនួយ សម្រាប់ពួកខ្លួនដែលរងគ្រោះដោយសារការប្រែប្រួលអាកាសធាតុ ដែលបណ្តាលមកពីការបញ្ចេញឧស្ម័នផ្ទះកញ្ចក់របស់ក្រុមប្រទេសកំពុងអភិវឌ្ឍ។ នៅក្នុងសន្និសីទ ក្រុងប៊ន ដែលត្រូវបញ្ចប់កាលពីថ្ងៃសុក្រ គឺមានការជជែក តវ៉ាតឹងសសៃក មែនទែន ព្រោះថា ចំណុចដែលនិយាយពីការផ្តល់ជំនួយ សម្រាប់ប្រទេសដែលរងគ្រោះដោយសារការប្រែប្រួលអាកាសធាតុ មិនត្រូវបានគេលើកយកមកនិយាយចរចានោះទេ។
តាមគម្រោង ក្រុមប្រទេសខាងត្បូងផែនដី ដែលជាប្រទេសក្រីក្រ និងកំពុងអភិវឌ្ឍ បានទាមទារសំណងជម្ងឺចិត្ត និងជំនួយមិនថា ថវិកា និងបច្ចេកទេសពីក្រុមប្រទេសអ្នកមាន ប្រទេសឧស្សាហកម្ម ដែលទទួលខុសត្រូវបញ្ចេញឧស្ម័នផ្ទះកញ្ចក់។ អ្វីដែលក្រុមប្រទេសកំពុងអភិវឌ្ឍន៍បានរង់ចំាខ្លំាង នោះគឺការសន្យាក្នុងឆ្នំា ២០០៩ ដែលក្នុងនោះ ក្រុមប្រទេសប៉ែកខាងជើងព្រមផ្តល់លុយចំនួន ១០០ ពាន់ដុល្លារក្នុងមួយឆ្នំាៗ សម្រាប់ក្រុមប្រទេសប៉ែកខាងត្បូងពី ពេលនេះដល់ឆ្នំា ២០២០។
នៅក្នុងសន្និសីទក្រុងប៉ារីស ខាងមុខ ក្រុមប្រទេសប៉ែកខាងត្បូងផែនដីចង់ទាមទារថា ជំនួយ សម្រាប់ជួយក្រុមប្រទេសដែលរងគ្រោះដោយសារ ការប្រែប្រួលអាកាសធាតុ ត្រូវកើនឡើង ច្រើនជាង ១០០ ពាន់លានដុល្លារ ក្នុងមួយឆ្នាំ ចាប់តាំងឆ្នាំ ២០២០។
ក្រុមប្រទេសប៉ែកខាងត្បូង ទាមទារជំនួយពីក្រុមប្រទេសប៉ែកខាងជើង ផែនដី ដោយយោងទៅលើអនុសញ្ញា អង្គការសហប្រជាជាតិ ស្តីពីអាកាសធាតុ ឆ្នាំ ១៩៩២ ដែលចុះហត្ថលេខាដោយ ប្រទេសចំនួន ១៩៥។ អនុសញ្ញារបស់អង្គការចែងថា ប្រទេសអភិវឌ្ឍ ប្រទេសអ្នកមាន មានកាតព្វកិច្ចផ្តល់ជំនួយហិរញ្ញវត្ថុ ដើម្បីជួយកាត់បន្ថយ ការបញ្ចេញចោល ឧស្ម័នផ្ទះកញ្ចក់ និងជួយប្រទេសកំពុងអភិវឌ្ឍន៍ ដែលរងគ្រោះដោយសារការប្រែប្រួលអាកាសធាតុ។
សព្វថ្ងៃនេះ ក្រុមប្រទេសអ្នកមាន បានតវ៉ា លែងចង់គោរពតាមអនុសញ្ញា របស់អង្គការសហប្រជាជាតិ ដែលគេចាត់ទុក ថា ចាស់គំរិល មិនទាន់សម័យ ជាពិសេស គឺបញ្ជីឈ្មោះរបស់ប្រទេសអភិវឌ្ឍដែលទទួលខុសត្រូវខាងផ្តល់ជំនួយ។ អ្នកតំណាងអឺរ៉ុប សម្រាប់ការចរចាផ្នែកអាកាសធាតុ បាននិយាយថា ពិភពលោកបានផ្លាស់ប្តូរ។ ក្រុមប្រទេសដែលទើបមានសេដ្ឋកិច្ចរីកលូតលាស់ថ្មី ដូចជាចិន ឥណ្ឌា ឬប្រេស៊ីលជាដើម សុទ្ធតែបានបញ្ចេញឧស្ម័នពុលទៅក្នុងបរិយាកាស ដូច្នេះ ប្រទេសទាំងនោះ ក៏ត្រូវមានកាតព្វកិច្ចផ្តល់ជំនួយ ជាមួយប្រទេសអភិវឌ្ឍ គឺមិនមែនចាំតែទទួលប្រយោជន៍ នោះទេ។ គេចង់និយាយសំដៅប្រទេសចិន ដែលកំពុងចូលរួមជាមួយក្រុមប្រទេសប៉ែកខាងត្បូង ទាមទារសំណង ជំនួយពីក្រុមប្រទេសអ្នកមាន។
គ្រប់គ្នាកំពុងដាក់សម្ពាធ យ៉ាងខ្លាំង ទៅលើសន្និសីទក្រុងប៉ារីស។ ប៉ុន្តែ គេមិនត្រូវសង្ឃឹមច្រើនទេ ថា រាល់បញ្ហានឹងអាចដោះស្រាយ នៅក្នុងរយៈពេល ២សប្តាហ៍នៃសន្និសីទអន្តរជាតិក្រុងប៉ារីសនោះ។ រាល់កិច្ចប្រជុំ ឬសន្និសីទកន្លងមក ត្រូវរៀបចំឡើង ដើម្បី អនុញ្ញាតឲ្យគ្រប់ភាគីចរចា ចុះសម្រុងគ្នា ឲ្យបានមុនសន្និសីទស្តីពីអាកាសធាតុក្រុងប៉ារីស។ ប្រទេសអ្នកមាន ដែលជំនាញខាងបញ្ចេញឧស្ម័នពុល ទៅក្នុងបរិយាកាស មិនថា អាមេរិក ចិន កាណាដា អូស្ត្រាលី ឬឥណ្ឌា សុទ្ធ បានប្រកាសសន្យាកាត់បន្ថយការបញ្ចេញឧស្ម័នផ្ទះកញ្ចក់ ដែលជាអ្នកបង្កឲ្យផែនដីឡើងកំដៅ និងការប្រែប្រួលអាកាសធាតុ។ នេះជាចំនុចវិជ្ជមាន ដែលអាចឲ្យគេសង្ឃឹមថា កិច្ចព្រមព្រៀងមួយដើម្បីទប់ស្កាត់កុំឲ្យផែនដី ឡើងកំដៅ ច្រើនជាង ២អង្សាសេ ដែលគេជឿថា ជាគ្រោះថ្នាក់ធ្ងន់ធ្ងរ សម្រាប់អនាគតជីវិតមនុស្សលើផែនដី នឹងអាចចេញរូបរាង នៅក្នុងសន្និសីទអន្តរជាតិ ក្រុងប៉ារីសស្តីពី អាកាសធាតុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ