អាមេរិកចង្អុលមុខថៃរឿងសន្តិសុខវិស័យអាកាសចរណ៍ស៊ីវិល
នៅថ្ងៃពុធទី ២ ធ្នូនេះ របបដឹកនាំសឹកថៃ បានប្រកាសសន្យាជាថ្មី ថានឹងខិតខំរៀបចំដំណើរការសន្តិសុខវិស័យអាកាសចរណ៍ឱ្យបានប្រសើរឡើងវិញ ស្របតាមបទដ្ឋានអន្តរជាតិ។ ពាក្យសន្យាត្រូវបានធ្វើឡើង បន្ទាប់ពីសហរដ្ឋអាមេរិកបានព្រមាននិងបញ្ចុះចំណាត់ថ្នាក់ថៃក្នុងវិស័យសន្តិសុខអាកាសចរណ៍ កាលពីម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
អាជ្ញាធរអាមេរិកផ្នែកអាកាសចរណ៍ស៊ីវិល បានបញ្ចុះចំណាត់ថ្នាក់ប្រទេសថៃមកលំដាប់ទីពីរ ដោយយល់ថាថៃគោរពតាមបទដ្ឋានសុវត្ថិភាពសន្តិសុខអាកាសចរណ៍អន្តរជាតិ តិចតួចបំផុត។ បើតាមរបាយការណ៍អាមេរិក ថៃមានកង្វះខាតយ៉ាងខ្លាំង ផ្នែកជំនាញការបច្ចេកទេស ការបំពាក់បំប៉នបុគ្គលិក និងដំណើរការរក្សាសន្តិសុខ។
ជាមួយនឹងសេចក្តីសម្រេចចិត្តបែបនេះ អាមេរិកបានហាមឃាត់មិនឱ្យក្រុមហ៊ុនអាកាសចរណ៍ថៃបើកការហោះហើរថ្មី ទៅមកអាមេរិកទេ។ ក្នុងពេលភ្លាមៗនេះ បម្រាមអាមេរិកមិនបានធ្វើឱ្យបង្កផលវិបាកអ្វីធ្ងន់ធ្ងរដល់ក្រុមហ៊ុនហោះហើរថៃទេ ដ្បិតថៃគ្មានជើងហោះហើរទៅចុះចតដោយផ្ទាល់លើទឹកដីអាមេរិកឡើយ។
ប៉ុន្តែថៃអាចនឹងរងគ្រោះខ្លាំង ដោយសារអឺរ៉ុប! ជាទូទៅ និងដែលធ្លាប់មានជាញឹកញយមករួចមកហើយ ក្រោយពីមានការហាមឃាត់របស់អាមេរិក អាជ្ញាធរអឺរ៉ុប អាចនឹងធ្វើសេចក្តីសម្រេចចិត្តដូចគ្នាតាមពីក្រោយ។ ប្រសិនបើដូច្នេះមែននោះថៃនឹងត្រូវខូចខាតខ្លាំង ជាពិសេស ចំពោះវិស័យទេសចរណ៍។
ថៃប្រទេសទេសចរណ៍ដ៏ល្បីនៅអាស៊ី គឺជាស្នូលបង្វិលអាកាសចរណ៍ស៊ីវិលដ៏ធំនិងសំខាន់ជាងគេប្រចាំតំបន់ មានបាននិងរស់រំពឹងយ៉ាងខ្លាំងលើសកម្មភាពទេសចរណ៍ ដែលតំណាងឱ្យដល់ទៅ១០%នៃផលិតផលសរុបក្នុងស្រុក និងដែលបន្តផលវិជ្ជមានរហូតមក ទោះបីជាសេដ្ឋកិច្ចទូទៅអាប់អួរយ៉ាងណាក៏ដោយ។
ហេតុដូច្នេះហើយបានជា អាជ្ញាធរថៃមិនអាចធ្វេសប្រហែសបានឡើយ ចំពោះការព្រមានរបស់អាមេរិក ទើបប្រកាសសន្យាភ្លាមថានឹងប្រឹងស្វែងរកបុគ្គលិកមានសមត្ថិភាពកាន់ខ្ពស់ និងគ្រប់គ្រាន់ ឆ្លើយតបទៅនឹងតម្រូវការជាក់ស្តែង ព្រមទាំងសើរើមើលច្បាប់អាកាសចរណ៍ចំណាស់ជាង៦០ឆ្នាំ (ច្បាប់បង្កើតឡើងតាំងពីឆ្នាំ១៩៥៤)ឡើងវិញ។
កាលពីខែមីនាកន្លងទៅ អង្គការអាកាសចរណ៍ស៊ីវិលអន្តរជាតិ បានសម្តែងការព្រួយបារម្ភយ៉ាងខ្លាំងចំពោះបញ្ហាសន្តិសុខដ៏ធ្ងន់ធ្ងររបស់អាកាសចរណ៍ស៊ីវិលថៃ។ កាលណោះ ជប៉ុន ចិន និងកូរ៉េខាងត្បូង បានបញ្ចេញប្រតិកម្មហាមឃាត់ជាបណ្តោះអាសន្នមិនឱ្យមានជើងហោះហើរថ្មីបន្ថែមពីថៃមកចុះចតក្នុងអាកាសយានដ្ឋានរបស់ខ្លួនឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ