យន្តហោះម៉ាឡេស៊ីបាត់ ៖ ថៃរកឃើញសញ្ញាយានយន្តហោះហើរគ្មានអត្តសញ្ញាណ
តើអាចចាត់ទុកថាជាតម្រុយថ្មី សម្រាប់ជួយធ្វើការអង្កេតរកយន្តហោះម៉ាឡេស៊ីអ៊ែរឡាញ ដែលបាត់ខ្លួនតាំងពីថ្ងៃទី ៨ មីនា បានជឿនលឿនទៅមុខ ឬ ? នៅថ្ងៃពុធនេះ អាជ្ញាធរថៃ អះអាងថា ចាប់បានសញ្ញា វត្ថុមួយគ្មានអត្តសញ្ញាណហោះ ប្តូរទិសដៅជាច្រើនលើកច្រើនសារ ពីរបីនាទី មុនការបាត់ស្រមោលយន្តហោះទាំងស្រុង។ ហើយទន្ទឹមគ្នានេះ ប៉ូលិស ម៉ាល់ឌីវ ក៏បានផ្ទៀងផ្ទាត់សំដីសាក្សីបានឃើញយន្តហោះហោះទាបចម្លែក ឆ្លងកាត់កោះកាលពីថ្ងៃទី៨មីនា ថ្ងៃបាត់យន្តហោះMH៣៧០។
ចុះផ្សាយនៅថ្ងៃ៖
ស្តាប់ - ០២:០៨
ដោយមានការស្នើសុំពីអាជ្ញាធរម៉ាឡេស៊ី កងទ័ពអាកាសថៃបានផ្ទៀងផ្ទាត់ឡើងវិញ ទិន្នន័យព័ត៌មាននៃប្រព័ន្ធរ៉ាដាភាគខាងត្បូងប្រទេស។ ជាលទ្ធផល នៅវេលាម៉ោង ០០និង២៨នាទី ពោលគឺ៦នាទីមុនយន្តហោះបាត់ស្រមោលទាំងស្រុង រ៉ាដាយោធាថៃបានរកឃើញសញ្ញាយានយន្តគ្មានអត្តសញ្ញាណមួយ បានហោះហើរទៅកាន់ទិសនិរតី សំដៅ សមុទ្ទ អង់ដាម៉ង់ ភាគខាងលិចប្រទេសម៉ាឡេស៊ី បញ្ចាសទិសរបស់យន្តហោះប៊ូអ៊ីន ៧៧៧ ដែលត្រូវហោះទៅប៉េកាំង។
យន្តហោះទំនងជាបានហោះចុះទៅភាគខាងត្បូង ឆ្ពោះទៅក្រុងកូឡាឡាំពួរ មុននឹងហោះឡើងមកវិញ សំដៅសមុទ្ទអង់ដាម៉ង់ ក៏ប៉ុន្តែសញ្ញានោះមិនច្បាស់លាស់ និងចេះតែដាច់ឥតឈប់ មុននឹងរលត់ឈឹងរហូតទៅ។ នេះបើតាមប្រភពរ៉ាដាថៃដដែល។
បើផ្អែកទៅពេលម៉ោង ព័ត៌មាននេះត្រូវគ្នានឹងការបញ្ជូនដំណឹងចុងក្រោយរបស់យន្តហោះMH៣៧០ ដែលបញ្ជាក់ថាកំពុងស្ថិតនៅលើឆ្នេរខាងកើតរបស់ម៉ាឡេស៊ី។ ប៉ុន្តែហេតុអ្វីបានជាទើបទម្លាយព័ត៌មាននៅថ្ងៃនេះ ?! អាជ្ញាធរថៃបានអះអាង ថាគ្មានចេតនាបិទខ្ទប់ដំណឹងទេ ប៉ុន្តែមកពីយន្តហោះនោះមិនស្ថិតក្នុងដែនអាកាសថៃ ដូច្នេះមិនមែនជាការគំរាមកំហែងសន្តិសុខថៃឡើយ ហើយថៃមិនបញ្ជាក់ដាច់ខាតថាសញ្ញាយានយន្តនោះជាយន្តហោះម៉ាឡេស៊ីបាត់ខ្លួន។
យន្តហោះប៊ូអ៊ីននៃក្រុមហ៊ុនអាកាសចរណ៍ម៉ាឡេស៊ីអ៊ែរឡាញ បាត់ស្រមោលឈឹងអស់១២ថ្ងៃ បានក្លាយជារឿងដ៏ចម្លែកបំផុតមួយ ក្នុងប្រវត្តិអាកាសចរណ៍ពិភពលោក និងបំផុសបំផុលឱ្យមានការបំបោងព័ត៌មានគ្រប់បែបយ៉ាង ព្រមទាំងប្រទេសចូលរួមរុករកដល់២៥ប្រទេស។ ហើយនៅថ្ងៃនេះ ប្រទេសម៉ាល់ឌីវ បានអះអាងកំពុងត្រួតពិនិត្យសក្សីកម្មជាច្រើនរបស់ប្រជាពលរដ្ឋ ដែលថាបានឃើញយន្តហោះដ៏ធំ ហោះទាបយ៉ាងចម្លែក រហូតអាចមើលរាប់ទ្វារបាន កាលពីថ្ងៃទី ៨ មីនា។ ប៉ុន្តែក្រុមអ្នកអង្កេតនៅប្រុងប្រយ័ត្នខ្លាំង ព្រោះធ្លាប់បានទទួលតម្រុយខុសជាច្រើនមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ