អាមេរិកចង់បញ្ចៀសភាពប្រឈមនៅសមុទ្ទចិនខាងត្បូង ជំរុញឱ្យហ្វីលីពីនចរចាជាមួយចិន
ក្នុងខណៈដែលចិនបដិសេធមិនទទួលស្គាល់សេចក្តីសម្រេចចិត្តរបស់តុលាការក្រុងឡាអេ និងព្រមានអំពីហានិភ័យប៉ះទង្គិចដល់ទំនាក់ទំនងយោធារវាងចិន-អាមេរិក លោក ចនឃែរី បានប្រកាសនៅថ្ងៃពុធនេះ ពីទីក្រុងម៉ានីល ថា វ៉ាស៊ីនតោន ចង់បញ្ចៀសឱ្យបានរាល់ភាពប្រឈមមុខដាក់គ្នា នៅក្នុងជម្លោះនៅសមុទ្ទចិនខាងត្បូង និងជំរុញឱ្យហ្វីលីពីនចូលចរចាជាមួយចិន។
ចុះផ្សាយនៅថ្ងៃ៖
ស្តាប់ - ០២:០៧
សេចក្តីប្រកាសរបស់លោកឃែរី នេះ ធ្វើឡើងក្រោយពីលោកបានចូលជួបសមភាគីហ្វីលីពីនរួច។ សម្រាប់លោកប្រមុខការទូតអាមេរិក ប៉េកាំងនិងម៉ានីលត្រូវតែចាប់ផ្តើមចរចាគ្នាដោះស្រាយជម្លោះ ពីព្រោះថ្វីបើគ្រប់គ្នាត្រូវគោរពសេចក្តីសម្រេចចិត្តរបស់តុលាការក្រុងឡាអេមែន ប៉ុន្តែយើងក៏មិនត្រូវស្វែងរកភាពប្រឈមមុខដាក់គ្នាដែរ។
វ៉ាស៊ីនតោនមើលឃើញសាលក្រមរបស់តុលាការឡាអេ ថាជាឱកាសដ៏ប្រពៃសម្រាប់គ្រប់ប្រទេសជាប់ជម្លោះ ផ្តើមដោះស្រាយវិវាទដោយសន្តិវិធី។ នេះជាការគូសបញ្ជាក់បន្ថែមរបស់លោក ឃែរី ដោយថែមទាំងអះអាងថា អាមេរិកសង្ឃឹមបានចូលរួមក្នុងដំណើរការចរចានោះដើម្បីបង្រួមរង្វង់ដែនទឹកជាប់ជម្លោះផង និងស្តារក្រមប្រតិបត្តិឡើងវិញផង ឬឈានដល់ការកំណត់វិធានដែលអាចទទួលយកដោយគ្រប់ភាគី និងដោយមានទំនុកចិត្ត។
វៀតណាម ម៉ាឡេស៊ី ព្រុយណេ តែវ៉ាន់ និងហ្វីលីពីន ឈ្លោះជាមួយចិនទាមទារចំណែកខ្លះគ្រប់គ្រងសមុទ្ទចិនខាងត្បូង ដែលសម្បូរទៅដោយធនធានធម្មជាតិក្រោមដី ប្រេងកាត និងដែលជាផ្លូវទឹកមានចរាចរណ៍ដឹកជញ្ជូនទំហំដល់ទៅ ៤៥០០លានក្នុងមួយឆ្នាំៗ។ កាលពីថ្ងៃទី ១២កក្កដា តុលាការឡាអេ បានកាត់ក្តីឱ្យចិនចាញ់ តែប៉េកាំងមិនទទួលស្គាល់ និងប្រកាសមិនគោរពតាមទេ។
បើតាមប្រភពស្និទ្ធនឹងប្រមុខការទូតអាមេរិក លោក ចន ឃែរី ដែលបានអញ្ជើញទៅដល់ប្រទេសហ្វីលីពីន កាលពីថ្ងៃអង្គារ ក្រោយការបិទបញ្ចប់វេទិកាអាស៊ាន ក៏ត្រូវជួបពិភាក្សាជាមួយប្រធានាធិបតីហ្វីលីពីនថ្មី លោក ឌុយទែតេដែរ ដើម្បីលើកទឹកចិត្តហ្វីលីពីនឱ្យប្រកាន់យកជំហរចរចា និងបើកទំព័រថ្មីជាមួយចិន។
ក្រៅអំពីបញ្ហាសមុទ្ទចិនខាងត្បូង រដ្ឋមន្ត្រីការបរទេសអាមេរិក ក៏បានឆ្លៀតលើកឡើងអំពីស្ថានភាពសិទ្ធិមនុស្សនៅហ្វីលីពីន ដែលមានប្រវត្តិឆ្លងកាត់អំពើហិង្សា ឧក្រិដ្ឋ សម្លាប់មនុស្សដោយគ្មានឆ្លងកាត់តុលាការប្រឆាំង អ្នកកាសែត ឬអ្នកប្រព្រឹត្តខុសផ្សេងៗ។ គិតត្រឹមថ្ងៃទី ៣០មិថុនា ថ្ងៃលោកឌុយទែតេឡើងកាន់តំណែងមក ប៉ូលិសបានសម្លាប់អ្នកជួញដូរគ្រឿងញៀនអស់ជាងពីររយនាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ