អូស្ត្រាលីផ្តល់សច្ចាប័នលើកិច្ចព្រមព្រៀងអាកាសធាតុក្រុងប៉ារីស
ប្រទេសអូស្រ្តាលី បានផ្តល់សច្ចាប័ន លើកិច្ចព្រមព្រៀងក្រុងប៉ារីស ស្តីអំពីអាកាសធាតុ ដើម្បីប្រយុទ្ធប្រឆាំងនឹងការឡើងកម្តៅនៃភពផែនដី នៅថ្ងៃព្រហស្បតិ៍នេះ។ អង្គការការពារបរិស្ថាន Greenpeace បានស្វាគមន៍ សេចក្តីសម្រេចនេះ ប៉ុន្តែនៅតែបន្តដាក់សម្ពាធលើអូស្ត្រាលីដដែល ដោយបង្ខំប្រទេសនេះ បញ្ចេញសកម្មភាពជាក់ស្តែងហាមឃាត់ការប្រើប្រាស់អណ្តូងរ៉ែធ្យូងថ្មថ្មីៗទៀត។
ចុះផ្សាយនៅថ្ងៃ៖
ស្តាប់ - ០១:៤៤
ជិតមួយឆ្នាំហើយ ដែលកិច្ចព្រមព្រៀងថ្នាក់ពិភពលោកដំបូង ស្តីអំពីអាកាសធាតុ បានកើតចេញជារូបរាងនាឱកាសសន្និសីទCOP21 នៅទីក្រុងប៉ារីស។ កិច្ចព្រមព្រៀងនេះនឹងត្រូវចូលជាធរមាននៅសុក្រ។ ប៉ុន្តែអូស្ត្រាលី ទើបបានសម្រេចផ្តល់សច្ចាប័ន នៅថ្ងៃនេះ យឺតយ៉ាវជាប្រទេសដទៃ ក៏ព្រោះតែអូស្ត្រាលីរវល់បោះឆ្នោត។
នៅក្នុងសេចក្តីថ្លែងការណ៍ លោកនាយករដ្ឋមន្ត្រីអូស្រ្តាលី បានបញ្ជាក់អំពីកម្មវត្ថុដ៏មានមហិច្ឆតា និងទំនួលខុសត្រូវរបស់អូស្ត្រាលី ក្នុងការកាត់បន្ថយឧស្ម័នផ្ទះកញ្ចក់ ពី ២៦ទៅ ២៨% នៅឆ្នាំ២០៣០ បើប្រៀបទៅនឹងកំរិតឧស្ម័នពុលនៅឆ្នាំ២០០៥។ ការផ្តល់សច្ចាប័ននេះត្រូវបានចុះហត្ថលេខាដោយរដ្ឋមន្ត្រីក្រសួងការបរទេសនិងបរិស្ថាន មុននឹងធ្វើដំណើរមកចូលរួមក្នុងសន្និសីទស្តីអំពីអាកាសធាតុលើកទី២២ នៅប្រទេសម៉ារ៉ុក ដែលត្រូវពិភាក្សាអំពីការដាក់ឱ្យដំណើរកិច្ចព្រមព្រៀងក្រុងប៉ារីស។
អូស្ត្រាលី ប្រទេសធំទូលាយ មានប្រជាជនរស់នៅតិច បើប្រៀបទៅនឹងផ្ទៃដី រស់រំពឹងខ្លាំងណាស់នឹងថាមពលធ្យូងថ្ម ទើបត្រូវជាប់ឈ្មោះជាសិស្សមិនល្អ បញ្ចេញឧស្ម័នបំពុលបរិស្ថានច្រើន។
ការផ្តល់សច្ចាប័ននេះ បានទទួលការស្វាគមន៍ខ្លាំងពីសំណាក់អង្គការក្រៅរដ្ឋាភិបាលជាច្រើន ប៉ុន្តែក្រុមអង្គការការពារបរិស្ថាននៅតែបន្តដាក់សម្អាធខ្លាំងលើរដ្ឋាភិបាលកង់បេរ៉ាដដែល និងទាមទារឱ្យអូស្ត្រាលី បង្ហាញសកម្មភាពដោយជាក់ស្តែង។ សម្រាប់អង្គការGreenpeace អូស្ត្រាលីមិនអាចបន្តអនុម័យគម្រោងថាមពលធ្យូងថ្មថ្មីទៀតបានឡើយ អូស្ត្រាលីត្រូវតែចេញបម្រាមហាមឃាត់ឧស្សាហកម្មរ៉ែធ្យូងថ្មីៗទៀត ប្រសិនបើសម្រេចកម្មវត្ថុដូចបានសន្យាក្នុងកិច្ចព្រមព្រៀង។ សូមបញ្ជាក់ថា អូស្ត្រាលីនាំចេញធ្យូងថ្មលំដាប់លេខមួយ។ ថាមពលធ្យូងថ្មនេះមានគ្រោះថ្នាក់ និងបំពុលបរិយាកាសខ្លាំងណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ