នីតិវិធីនៃការស្នងរាជ្យនៅក្នុងរាជាណាចក្រថៃ បានចាប់ផ្តើមហើយ ដោយនៅថ្ងៃអង្គារទី ២៩ វិច្ឆិកា នេះ សភាថៃបានកោះប្រជុំនិងប្រកាស យាងព្រះអង្គម្ចាស់វជ្ជរ៉ាឡុងកនឱ្យឡើងគ្រងរាជ្យ ជាផ្លូវការ ស្នងតំណែងបន្តពីព្រះបិតាភូមិបុល ដែលបានចូលទិវង្គតកាលពីថ្ងៃ១៣តុលា។ ព្រះអង្គម្ចាស់វជ្ជរ៉ាឡុងកន ដែលកំពុងស្នាក់នៅក្នុងប្រទេសអាល្លឺម៉ង់ នឹងត្រូវទទួលយល់ព្រមតាមសំណើសភា នៅថ្ងៃព្រហស្បតិ៍ខាងមុខ។ នៅពេលឡើងគ្រងរាជ្យ ព្រះអង្គនឹងមានព្រះនាម រ៉ាម៉ា ១០ និងក្លាយជាស្តេចជំនាន់ទី១០នៃរាជវង្សចក្រីចំណាស់២៣៤ឆ្នាំ។
នៅទីបំផុត ដំណើរការនីតិវិធីស្នងរាជ្យបានចាប់ផ្តើមហើយ ! ក្រុមប្រឹក្សារដ្ឋមន្ត្រី បានបញ្ជូនឈ្មោះរាជទាយាទទៅឱ្យសភា ដែលក៏បានសម្រេចប្រកាសយាងរាជទាយាទព្រះអង្គម្ចាស់វជ្ជរ៉ាឡុងកន ឱ្យឡើងគ្រងរាជ្យជាផ្លូវការដែរ។ តែមានដំណាក់កាលចុងក្រោយមួយទៀត គឺ សភា ត្រូវរង់ចាំសវនាការពីរាជទាយាទ។ សភានឹងអាចបានទទួលការព្រមព្រៀងរបស់ព្រះអង្គម្ចាស់វជ្ជរ៉ាឡុងកន នៅថ្ងៃពុធឬព្រហស្បតិ៍ នៅពេលព្រះអង្គយាងពីអាល្លឺម៉ង់ ត្រលប់ចូលប្រទេសថៃវិញ។ បន្ទាប់មក ពិធីឡើងគ្រងរាជ្យ នឹងត្រូវរៀបចំឡើង នៅរវាងមួយឆ្នាំទៀត ពោលគឺក្រោយពិធីបូជាសពព្រះមហាក្សត្រភូមិបុល ដែលបានចូលទិវង្គតកាលពីថ្ងៃទី ១៣តុលា។
អនាគតព្រះមហាក្សត្រគ្មានប្រជាប្រិយភាព
បើគ្មានហេតុការណ៍ចៃដន្យ កើតឡើងខុសពីការគ្រោងទុកទេ នឹងទទួលព្រះអង្គម្ចាស់វជ្ជរ៉ាឡុងកន នឹងក្លាយជាព្រះមហាក្សត្រថៃ ក្រោមព្រះនាម ព្រះរ៉ាម៉ា១០។ តាំងពីព្រលឹមមក រដ្ឋាភិបាលសឹកថៃ បានប្រកាសស្វាគមន៍ការឡើងគ្រងរាជ្យរបស់ព្រះអង្គម្ចាស់ វជ្ជរ៉ាឡុងកន។ ចំណែកឯកសារផ្លូវការផ្សេងៗ មានសរសេរឈ្មោះព្រះមហាក្សត្រថ្មី ជាស្រេចទៅហើយ។
ប៉ុន្តែព្រះមហាក្សត្រថៃថ្មី មានរនាំងឧសបគ្គកំពុងរង់ចាំ នោះគឺការទាក់ទាញចិត្តប្រជាពលរដ្ឋ និងត្រូវធ្វើយ៉ាងណាឱ្យប្រជានុរាស្ត្រ ឱ្យគោរពស្រលាញ់ព្រះអង្គ ដូចបិតា។ ព្រោះរាជទាយាទរូបនេះ មានកិត្តិនាមមិនសូវជាល្អប៉ុន្មានទេ ! អប្រជាប្រិយភាព ដោយសារតែមានជីវិតឯកជនចម្រូងចម្រាសខ្លាំងផង និងមានកាយវិការ បង្ហាញពីភាពមិនស្និទ្ធនឹងប្រជាពលរដ្ឋទៀត។
ពុំសូវមានទំនួលខុសត្រូវក្នុងរាជវាំង មិនដែលបញ្ចេញព្រះភក្តិ រស់នៅអាល្លឺម៉ង់ច្រើនជាងនៅក្នុងប្រទេស ពោលគឺផ្ទុយស្រលះពីឪពុកដែលពលរដ្ឋគោរពស្រលាញ់ដូចព្រះ។ តាំងពី ព្រះមហាក្សត្រភូមិបុលសោយទិវង្គតទៅ ព្រះអង្គមិនដែលថ្លែងសារអ្វីសូម្បីតែមួយមាត់ទៅកាន់រាស្ត្រ ដែលត្រូវការចង់ស្តាប់ ចង់ឮឡើយ។
ក្រៅអំពីនេះ ព្រះអង្គមានរឿងអាស្រូវទាក់ទងនឹងជីវិតឯកជនយ៉ាងច្រើន កាលពីប៉ុន្មានខែមុន សារព័ត៌មានអាល្លឺម៉ង់បានបង្ហោះរូបថតហ៊ឺហា ដ៏អាស្រូវរបស់ព្រះអង្គ តែគ្មានសារព័ត៌មានក្នុងស្រុកណា ហ៊ានហើបមាត់និយាយ ឬបន្តបោះផ្សាយក្នុងប្រព័ន្ធសង្គមអ្វីទាំងអស់ ដោយខ្លាចជាប់ទោស។ លែងលះជាច្រើនដង ! ការលែងលះលើកទីបីធ្លាក់មកជួនចំពេលមហេសីនោះ មានរឿងអាស្រូវពុករលួយ សមាជិកក្រុមគ្រួសារបើឥទ្ធិពលរាជវាំងដើម្បីបានចំណេញហិរញ្ញវត្ថុ។
គ្រងរាជ្យពីចម្ងាយ ?
មានព្រះជន្ម ៦៤វស្សា ឆ្លងកាត់ការសិក្សាថ្នាក់វិទ្យាល័យនៅអង់គ្លេស ថ្នាក់ឧត្តមផ្នែកយោធានៅអូស្ត្រាលី និងមានតួនាទីជាឧត្តមសេនីយ៍ដ៏ខ្ពង់ខ្ពស់ តែព្រះអង្គចូលចិត្តបើកយន្តហោះឯកជនដើរលេងនៅប្រទេសអាល្លឺម៉ង់។ ក្រោយមរណភាពរបស់បិតា ព្រះអង្គមិនបានប្តូរទម្លាប់និងអត្តចរិកទេ ! អញ្ចឹងហើយបានជាអ្នកវិភាគនយោបាយទាំងឡាយ គិតដូចសោភ័ណ ព្រួយបារម្ភថា ព្រះអង្គព្រមឡើងដោយរាជ្យដើម្បីបង្គ្រប់កិច្ច ធ្វើកិច្ចការដែលចាំបាច់និងតិចតួចបំផុត។
បើតាមអ្នកឯកទេសថៃប្រចាំក្រុងប៉ារីស ព្រះអង្គម្ចាស់វជ្ជរ៉ាឡុងកន មិនចាប់អារម្មណ៍នឹងនយោបាយទេ ហើយក៏មិនខ្វល់នឹងធ្វើតាមរដ្ឋាភិបាល នូវរាល់កិច្ចការជាព្រះមហាក្សត្រដែរ។ ព្រះអង្គនឹងក្លាយជាព្រះមហាក្សត្រដែលនៅឆ្ងាយពីរាស្ត្រ ឆ្ងាយទាំងចិត្ត ឆ្ងាយទាំងកាយ ដោយព្រះអង្គទំនងជានឹងគ្រងរាជ្យពីចម្ងាយ ដោយទុកឱ្យបងប្អូនស្រីៗជាអ្នកប្រោះព្រំរាជវង្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ