សភាជាតិថៃត្រៀមបើកសម័យប្រជុំដើម្បីជជែកពីការផ្ទេររាជបល្ល័ង្គ
សភាជាតិថៃ ត្រូវធ្វើការរួមប្រជុំពិសេសមួយនៅថ្ងៃអង្គារសប្តាហ៍ក្រោយ នៅខណៈពេលដែលមានពាក្យចចាមអារាមស្តីពីការឡើងសោយរាជ្យសម្បត្តិរបស់ព្រះមហាក្សត្រថ្មីនៃប្រទេសថៃ។
ចុះផ្សាយនៅថ្ងៃ៖
ស្តាប់ - ០២:១៤
លោក Pornpetch Wichitcholchai ប្រធាននៃរដ្ឋសភាជាតិ ដែលមានសមាសភាពតែងតាំងដោយរបបសឹក បានជូនដំណឹងនៅថ្ងៃសុក្រម្សិលមិញថា រដ្ឋសភាថៃនឹងធ្វើការរួមប្រជុំពិសេសមួយនៅថ្ងៃអង្គារ៍ទី២៩វិច្ឆិកាខាងមុខ តែលោកបដិសេធ ពុំបញ្ជាក់ប្រាប់ពីរបៀបវារៈនៃសម័យប្រជុំនោះឡើយ។
ក៏ប៉ុន្តែនៅខណៈពេលដែលគេរំពឹងទុកថា ការឡើងគ្រងរាជ្យបល្ល័ងរបស់សេ្តចថ្មីនឹងត្រូវប្រព្រឹត្តទៅនៅដើមខែធ្នូខាងមុខ របៀបវារៈនៃអង្គប្រជុំនោះ អាចជាច្បាប់ថ្មីមួយ ឬក៏ជាការអោយសច្ចាប័ននៃសន្ធិសញ្ញានិងក៏ជាបញ្ហាបន្ទាន់ផ្សេងៗទៀត-នេះជាការថ្លែងបញ្ជាក់របស់ប្រធានរដ្ឋសភាទៅកាន់អ្នកកាសែត។
ម្យ៉ាងទៀត នៅក្នុងពិធីការ គឺរដ្ឋាភិបាលយោធា ជាអ្នកប្រគល់ឈ្មោះរបស់ព្រះមហាក្សត្រថ្មីជូនដល់រដ្ឋសភា។បន្ទាប់មក ប្រធានរដ្ឋសភាត្រូវយាងព្រះអង្គម្ចាស់ឡើងសោយរាជ្យនិងរួចមកលោកក៏ត្រូវប្រកាសថាព្រះអង្គម្ចាស់នេះ ជាព្រះមហាក្សត្រថ្មីតែម្តង។
ទោះជាយ៉ាងណាក្តី ក៏ពិធីរៀបចំឡើងគ្រងរាជ្យសម្បត្តិនេះ អាចនឹងរៀបចំទៅបាន ក៏យ៉ាងហោចនៅក្នុងរយៈពេលមួយឆ្នាំទៀតដែរ បន្ទាប់ពីការបូជាសពរបស់បិតារបស់ព្រះអង្គរួចរាល់ហើយ។
សូមបញ្ជាក់ថាព្រះអង្គម្ចាស់ មហា វេជ្ជរាឡុងកន ដែលមានព្រះជន្ម៦៤ព្រះវស្សា បានធ្វើដំណើរយាងមកកាន់ប្រទេសថៃក្នុងរយៈពេលដ៏ខ្លី មុននិងវិលត្រឡប់ទៅកាន់ប្រទេសអាល្លឺម៉ង់វិញនៅពាក់កណ្តាលខែវិច្ឆិកា។ អវត្ដមាននេះនិងការដែលព្រះអង្គបានស្នើពេលវេលានៅមុនពេលសម្រេចឡើងសោយរាជ្យសម្បត្តិនេះ កាន់តែធ្វើឲ្យប្រទេសថៃទាំងមូលមានការព្រួយបារម្ភយ៉ាងខ្លាំង។ នៅក្នុងរយៈពេលរង់ចាំការសម្រេចចិត្តរបស់ព្រះអង្គម្ចាស់មហាវិជ្ជរាឡុងកន របបសឹក បានសម្រេចជ្រើសតាំងលោក ព្រេមទីនស៊ូឡាណុនដែលជាប្រធានក្រុមប្រឹក្សាព្រះមហាក្សត្រ អាយុ៩៦ឆ្នាំ អោយកាន់តំណែងជាប្រមុខរដ្ឋស្តីទី។
គួរកត់សម្គាល់ថា ថ្ងៃអង្គារខាងមុខនេះ គឺជាទិវាភក្ដីភាពរបស់ពលរដ្ឋថៃថ្វាយ ចំពោះព្រះរាជារបស់ខ្លួន ដែលនឹងត្រូវរៀបចំឡើងនៅទូទាំងប្រទេស ដោយ មានការចូលរួមពីសំណាក់ប្រជាពលរដ្ឋថៃគ្រប់ជាន់ថ្នាក់ ចំនួនរាប់ម៉ឺននាក់ រួមទាំងមន្រ្តីរាជការបុគ្គលិកធនាគារ និស្សិត ក៏ព្រមទាំងតារាទូរទស្សន៍ល្បីៗឈ្មោះក្នុងប្រទេសទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ