ជនជាតិចិន ៣នាក់ជាប់ចោទពីបទចូលលួចព័ត៌មានតាមអ៊ីនធ័រនែតនៅការិយាល័យមេធាវីអាមេរិក
នៅសហរដ្ឋអាមេរិក រដ្ឋអាជ្ញាទីក្រុងញូយ៉កបានធ្វើការចោទប្រកាន់លើបុរសជនជាតិចិន ៣នាក់ពីបានចូលលួចព័ត៌មានតាមអ៊ីនធ័រនែតនៅក្នុងការិយាល័យមេធាវីមួយចំនួនក្នុងទឹកដីអាមេរិក។ ទង្វើនេះបានអនុញ្ញាតឲ្យជនជាតិចិនទាំង ៣នាក់យកបានព័ត៌មានសម្ងាត់មុនមួយចំនួន ហើយយកព័ត៌មានសម្ងាត់ទាំងនោះទៅប្រើដើម្បីចំណេញលុយនៅផ្សារភាគហ៊ុន។ តាមរដ្ឋអាជ្ញាក្រុងញូយ៉ក ជនជាតិចិនទាំង ៣នាក់ទទួលបានផលចំណេញជិត ៤លានដុល្លារ។
ចុះផ្សាយនៅថ្ងៃ៖
ស្តាប់ - ០១:៤១
ផ្ទាំងស៊ីបរបស់ជនជាតិចិនទាំង ៣រូបនោះ គឺការិយាល័យមេធាវីក្នុងទីក្រុងញូយ៉កដែលទទួលបន្ទុកសំណុំរឿងជំនួញរបស់ក្រុមហ៊ុនគ្រាក់ៗក្នុងទឹកដីអាមេរិកាំង។ នៅក្នុងការិយាល័យមេធាវីទាំងអស់នោះ មានយ៉ាងហោចណាស់ចំនួនពីរដែលជនជាតិចិនទាំង ៣នាក់បានចូលតាមប្រព័ន្ធអ៊ីនធ័រនែតលួចយកព័ត៌មានសំខាន់ៗជាច្រើន។ តុលាការអាមេរិកាំងមិនបានទម្លាយឲ្យដឹងនូវឈ្មោះការិយាល័យមេធាវីទាំងពីរនោះទេ អ្វីដែលគេដឹង ការិយាល័យមេធាវីទាំងពីរមានជំនាញខាងទិញ លក់ និងខាងការរួមបញ្ចូលគ្នារវាងក្រុមហ៊ុន រោងចក្រសហគ្រាសធំៗ។
ជាមួយនឹងការចូលលួចព័ត៌មានសម្ងាត់តាមអ៊ីនធ័រនែតពីការិយាល័យមេធាវីទាំងនេះ ចោរជនជាតិចិនទាំង ៣នាក់ទទួលបានព័ត៌មានមុនទាក់ទងនឹងកិច្ចការជំនួញ និងគម្រោងកិច្ចព្រមព្រៀងចំនួន ១២ ដែលក្រុមហ៊ុន ឬរោងចក្រ សហគ្រាសធំៗកំពុងធ្វើ។ គឺផ្តើមចេញពីព័ត៌មានសម្ងាត់ទាំងអស់នេះហើយដែលបានអនុញ្ញាតឲ្យចោរជនជាតិចិនទាំង ៣នាក់ទិញទុកមុននូវភាគហ៊ុនរបស់ក្រុមហ៊ុននេះ ឬក្រុមហ៊ុននោះក្នុងតម្លៃថោកដើម្បីលក់ចេញវិញក្នុងតម្លៃខ្ពស់។ តាមរដ្ឋអាជ្ញាក្រុងញូយ៉ក ផលចំណេញដែលចោទជនជាតិចិនទាំង ៣នាក់ទទួលបានមានជិត ៤លានដុល្លារ។
រដ្ឋអាជ្ញាក្រុងញូយ៉កបានទម្លាយឲ្យដឹងថា ចោរជនជាតិចិនទាំង ៣នាក់នោះមានពីរនាក់មានដើមកំណើតក្នុងទីក្រុងម៉ាកាវ និងម្នាក់មានដើមកំណើតក្នុងទីក្រុងប៉េកាំង។ រហូតមកដល់ពេលនេះ មានម្នាក់ត្រូវបានចាប់ខ្លួននៅហុងកុងកាលពីថ្ងៃអាទិត្យ ទី២៦ ធ្នូ និងត្រូវបញ្ជូនទៅអាមេរិកនាពេលឆាប់ៗខាងមុខ ចំណែក ២នាក់ទៀតកំពុងត្រូវបានរដ្ឋអំណាចអាមេរិកតាមចាប់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ