ទស្សនកិច្ចលើកតំបូងបង្អស់របស់មេដឹកនាំអាមេរិកម្នាក់ក្នុងរដ្ឋបាលលោក Trump នៅប៉ាគីស្ថាន
លោកឧត្តមសេនីយ McMaster ទីប្រឹក្សាសន្តិសុខជាតិអាមេរិក បានជួបប្រាស្រ័យជាមួយនាយករដ្ឋមន្ត្រីប៉ាគីស្ថានលោក Nawaf Sharif នៅថ្ងៃចន្ទម្សិលមិញ នាឱកាសនៃដំណើរទស្សនកិច្ច ជាលើកតំបូងបង្អស់របស់អ្នកតំណាងជាន់ខ្ពស់មួយរូបនៃរដ្ឋបាលរបស់លោកប្រធានាធិបតី Donald Trump។
ចុះផ្សាយនៅថ្ងៃ៖
ស្តាប់ - ០២:៤៧
នៅមុនពេលអញ្ជើញទៅដល់ប៉ាគីស្ថាន លោកឧត្តមសេនីយអាមេរិក McMaster ទីប្រឹក្សាសន្តិសុខជាតិអាមេរិក បានធ្វើដំណើរទៅកាន់ទីក្រុង Kaboulប្រទេសអាហ្វហ្កានីស្ថាន។នៅទីនោះ លោក McMaster បានលើកឡើង ថាអាមេរិកត្រូវតែប្រកាន់ជំហរយ៉ាងម៉ឹងម៉ាត់បំផុតនៅចំពោះមុខប៉ាគីស្ថាន ដែលប្រទេសខ្លះៗ បានចាត់ទុកថាជាសម្ព័ន្ធមិត្តមួយរបស់អាមេរិកដែលមិនគួរអោយទុកចិត្តទាល់តែសោះ។
ដំណើរទស្សនកិច្ចរបស់លោកឧត្តមសេនីយ McMaster នៅទីក្រុងកាប៊ូលនេះ ត្រូវបានប្រព្រឹត្តទៅតែ៤ថ្ងៃប៉ុណ្ណោះ បន្ទាប់ពីកងទ័ពអាមេរិកបានធ្វើការទម្លាក់មេគ្រាប់បែកមួយគ្រាប់ប្រឆាំងទៅលើទីតាំងនានារបស់ក្រុមជីហាតនៃអង្គការរដ្ឋអ៊ីស្លាមនៅភាគខាងកើតនៃប្រទេសអាហ្វហ្កានីស្ថាន។
យោងតាមសេចក្តីជូនដំណឹងមួយរបស់ស្ថានទូតអាមេរិកប្រចាំទីក្រុង Islamabad នៅប៉ាគីស្ថាន លោកឧត្តមសេនីយ McMaster បានថ្លែងសរសើរអំពីការរីកចម្រើនសេដ្ឋកិច្ចនិងប្រជាធិបតេយ្យរបស់ប៉ាគីស្ថានតែលោកក៏បានគួសបញ្ជាក់ផងដែរថា ប៉ាគីសា្ថន ត្រូវតែដោះស្រាយជាចាំបាច់នៅលើបញ្ហាអំពើភេរវកម្មនានានៅក្នុងប្រទេស។
តែប៉ាគីស្ថានវិញ បានលើកឡើងថា លោកឧត្តមសេនីយ McMaster ថ្លែងធានាអះអាងចំពោះនាយករដ្ឋមន្ត្រីប៉ាគីស្ថាន ថារដ្ឋបាលរបស់លោក Trump បានសន្យាថានឹងនៅធ្វើការជាមួយប៉ាគីស្ថានតទៅមុខទៀត ដើម្បីឲ្យបានសម្រេចនូវសុខសន្តិភាពនិងស្ថិរភាពទាំងនៅអាហ្វហ្កានីស្ថាននិងទាំងនៅប៉ាគីស្ថាន។
គួររំលឹកថា កងទ័ពអាមេរិក បានដាក់ពង្រាយការពារសន្តិសុខនៅអាហ្វហ្កានីស្ថានបន្ទាប់ពីការផ្តួលរលំរបបអ៊ីស្លាមជ្រុលនិយមតាលីបង់នៅឆ្នាំ២០០១។ អាមេរិកដែលជាអ្នកដឹកនាំប្រតិបត្តិការអូតង់ មកទល់ពេលនេះ មានកងទ័ពខ្លួនចំនួន៨ ៤០០នាក់នឹងមានជំនួយទាហានពីប្រទេសសម្ព័ន្ធមិត្តចំនួន ៥០០០នាក់ថែមទៀតក្នុងប្រតិបត្តិការជួយគាំពារដល់រដ្ឋាភិបាលអាហ្វហ្កានីស្ថាននៅខណៈពេលដែលកិច្ចខិតខំប្រឹងប្រែងនានាដើម្បីការចរចាសន្តិភាពរវាងទីក្រុងកាប៊ូលនិងចលនាឧទ្ទាមតាលីបង់ទំនងដូចជាអស់ផ្លូវ។
ក៏ប៉ុន្តែនៅពេលកិច្ចសន្ទនាជាមួយបណ្តាញទូទស្សន៍អាហ្វហា្កនីស្ថាន លោកឧត្តមសេនីយ McMaster ក៏ពុំបានលើកបញ្ជាក់ដែរថា តើអាមេរិកនឹងត្រូវបង្កើនវត្តមានកងទ័ពខ្លួនដែរឬទេនៅក្នុងប្រទេសនេះ។ ចំពោះប៉ាគីស្ថានវិញ ទីប្រឹក្សាសន្តិសុខជាតិអាមេរិក បានសម្តែងការរិះគន់ប្រទេសសម្ព័ន្ធមិត្តមួយនេះរបស់អាមេរិកដែលត្រូវគេចោទថាបានជួយជាសម្ងាត់ដល់ពួកតាលីបង់នៅអាហ្វហ្កានីស្ថាននិងផ្តល់ទីជំរកដល់មេបណ្តាញអ៊ីស្លាមអៃកៃដាBen Laden ដែលត្រូវកងកុម្ម៉ងដូពិសេសអាមេរិកបាញ់ស្លាប់នៅក្នុងឆ្នាំ២០១១។
នៅក្នុងដំណើរទស្សនកិច្ចនៅប៉ាគីស្ថាននេះ លោកឧត្តមសេនីយ McMaster ត្រូវបានអមដំណើរដោយលោកស្រី Lisa Curtis ជំនាញមួយរូបដែលមានជំហរយ៉ាងម៉ឺងម័តនៅចំពោះមុខប្រទេសប៉ាគីស្ថាន។ ហើយយោងតាមប្រព័ន្ធផ្សព្វផ្សាយអាមេរិក លោក ស្រី Lisa Curtis ប្រហែលជានឹងត្រូវដឹកនាំនៅលើផ្នែកអាស៊ីភាគខាងត្បូងរបស់ក្រុមប្រឹក្សាសន្តិសុខជាតិអាមេរិក( NSC)អង្គការមួយដែលជាអ្នកផ្តល់ដំបូន្មានផងដែរដល់វិមានប្រធានាធិបតីអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ