អ្នកកាសែតភូមា ៣ នាក់ត្រូវជាប់ពិរុទ្ធពីបទយកព័ត៌មាននៅក្នុងតំបន់ឧទ្ទាមជនជាតិភាគតិច
នៅភូមា អ្នកកាសែតចំនួន៣រូបដែលធ្វើបទយកការណ៍ស្តីពីក្រុមឧទ្ទាមប្រដាប់អាវុធជនជាតិភាគតិចមួយនៅរដ្ឋសានភាគខាងកើតប្រទេស ត្រូវបានអាជ្ញាធរភូមាចាប់ខ្លួនកាលពីថ្ងៃចន្ទមុននិងដាក់ពិរុទ្ធអោយជាប់ពន្ធនាគារកាលពីថ្ងៃពុធម្សិលមិញ-នេះបើយោងតាមការជូនដំណឹងរបស់នគរបាលភូមា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
ជនចំនួន៥រូបដែលក្នុងចំណោមនោះ ៣នាក់ជាអ្នកកាសែតនិង២នាក់ទៀតជាអ្នកបើកបររថយន្ត កាលពីរសៀលថ្ងៃពុធម្សិលមិញ ត្រូវជាប់ពិរុទ្ធក្រោមមាត្រាច្បាប់មួយដែលចែងពីការទាក់ទងដោយខុសច្បាប់ជាមួយក្រុមឧទ្ទាម និងត្រូវទទួលទោសនៅក្នុងពន្ធនាគាររហូតដល់ទៅ៣ឆ្នាំ។ យោងតាមប្រភពអនាមិកមួយ ជនទាំង៥រូបនោះ ត្រូវបានអាជ្ញាធរភូមា បញ្ជូនយកទៅដាក់នៅក្នុងពន្ធនាគារមួយនៅ Hsipaw ក្នុងរដ្ឋ Shan ដែលស្ថិតនៅភាគខាងកើតប្រទេសភូមាដើម្បីរង់ចាំការកាត់ទោស។
សូមបញ្ជាក់ថា អ្នកកាសែតភូមាទាំង៣នាក់នោះ ត្រូវបានចាប់ខ្លួនតាំងពីថ្ងៃចន្ទមុននៅខណៈពេលដែលពួកគេ បានវិលត្រឡប់មកពីការបំពេញការងារមួយរបស់ខ្លួននៅលើបទយកការណ៍មួយស្តីពីប្រតិបត្តិការប្រយុទ្ធប្រឆាំងទល់នឹងគ្រឿងញានដែលរៀបចំឡើងដោយក្រុមឧទ្ទាមប្រដាប់អាវុធជនជាតិភាគតិចមួយនៅរដ្ឋShan។ នៅនាឱកាសនោះ គ្រឿងញានចំនូនជាច្រើនតោន ត្រូវបានគេដុតកំទេចចោលជាសាធារណៈនៅក្នុងក្របខណ្ឌនៃទិវាពិភពលោកប្រយុទ្ធប្រឆាំងទល់នឹងការជួញដូរគ្រឿនញានដែលរៀបចំឡើងដោយអ.ស.ប.។
យ៉ាងណាមិញ ការប្តឹងប្តល់ប្រឆាំងនឹងប្រព័ន្ធផ្សព្វផ្សាយព័ត៌មាននានាដែលរិះគន់ទិតៀនលើរដ្ឋាភិបាល កាន់តែកើនចំនួនច្រើនឡើងៗនៅក្នុងប្រទេសភូមានាអំឡុងប៉ុន្មានខែចុងក្រោយនេះ បើទោះបីជា ភូមា មានរដ្ឋាភិបាលស៊ីវីលមួយក្តី ចាប់តាំងពីជាង១ឆ្នាំកន្លងមកហើយបន្ទាប់ពីរបបផ្តាច់ការយោធា បានត្រួត្រាក្នុងប្រទេសអស់រយៈពេលជាច្រើនទស្សវត្សរ៍កន្លងមក។
សូមបញ្ជាក់ថា អ្នកកាសែតភូមាទាំង៣នាក់នោះ បំរើការងារអោយគេហទំព័រមួយឈ្មោះThe Irrawaddyនិងអង្គការវិទ្យុនិងទូរទស្សន៍ឈ្មោះ “សំឡេងប្រជាធិបតេយ្យភូមា” Democratic voice of Burma ប្រព័ន្ធផ្សព្វផ្សាយពីរដែលធ្វើការផ្គើនរបបសឹកភូមាអស់រយៈពេលជាច្រើនឆ្នាំកន្លងមកហើយនិងដោយបានផ្សព្វផ្សាយព័ត៌មានចេញពីបរទេសផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ