លោក គឹម ជុងអ៊ុន ផ្អាកគម្រោងបាញ់មីស៊ីលសំដៅទៅកោះGuam អាមេរិក
ថ្ងៃអង្គារនេះ មេដឺកនាំកូរ៉េខាងជើង គឹម ជុងអ៊ុន បានបន្ទន់ជំហរបន្តិចមកវិញ ចំពោះអាមេរិក ដោយបានប្រកាសផ្អាកគំរោងបាញ់មីស៊ីលសំដៅទៅកោះGuam របស់អាមេរិក នៅប៉ាស៊ីហ្វិក។ តែលោកគឹម ជុងអ៊ុន មិនបានភ្លេចនឹងដាក់លក្ខខណ្ឌ ជាថ្នូរនឹងការផ្អាកបាញ់មីស៊ីលនេះទេ ជាលក្ខខណ្ឌតម្រូវអោយអាមេរិកប្រយ័ត្នសកម្មភាពរបស់ខ្លួនចំពោះកូរ៉េខាងជើង។
ចុះផ្សាយនៅថ្ងៃ៖ កែប្រែថ្ងៃទី៖
គម្រោងបាញ់មីស៊ីល៤ដើម សំដៅទៅកោះ Guam របស់អាមេរិក នៅប៉ាស៊ីហ្វិក ត្រូវបានលោកគឺម ជុងអ៊ុន ប្រកាសថា ផ្អាកសិន ដោយរង់ចាំមើលសកម្មភាពរបស់អាមេរិក។ មុននឹងបញ្ជាអោយកងទ័ពកូរ៉េខាងជើង បាញ់មីស៊ីល រឺក៏មិនបាញ់ លោកគឺម ជុងអ៊ុនបានគូសបញ្ជាក់ទៅអាមេរិកថា លោកនឹងសង្កេតអត្តចរឹតដ៏ល្ងឹតល្ងង់របស់អាមេរិកសិន។ បើអាមេរិករឹងរូសធ្វើសកម្មភាពគ្រោះថ្នាក់ដល់ឧបទ្វីបកូរ៉េ កូរ៉េខាងជើងនឹងចាត់វិធានការដែលបានប្រកាសរួចមកហើយនេះ។ អាមេរិកត្រូវសម្រេចយកជម្រើសដែលសមស្រប។
ក្រុមជំនាញមើលឃើញថា លោកគឺម ជុងអ៊ុន បានបន្ទន់ជំហរមកវិញ ចំពោះអាមេរិក ដែលអាចនឹងជួយអោយគេរកច្រកចេញដោះស្រាយស្ថានការណ៍តានតឹងក្នុងឧបទ្វីបកូរ៉េ។ ប៉ុន្តែ ការដែលលោកគឺម ជុងអ៊ុនដាក់លក្ខខណ្ឌអោយអាមេរិកជ្រើសយកជម្រើសសមស្រប អោយអាមេរិកប្រយ័ត្នប្រយែងនឹងសកម្មភាពរបស់ខ្លួនចំពោះកូរ៉េខាងជើងនេះ ក៏អាចចង់សំដៅទៅលើសមយុទ្ធយោធាប្រចាំឆ្នាំរវាងអាមេរិកនិងកូរ៉េខាងត្បូង ដែលនឹងត្រូវបើកធ្វើក្នុងពេលឆាប់ៗនេះដែរ។ សម្រាប់កូរ៉េខាងជើង សមយុទ្ធនេះ ប្រៀបបាននឹងការត្រៀមវាយលុកកូរ៉េខាងជើងដូច្នោះដែរ។
កូរ៉េខាងជើងធ្លាប់បង្ហាញបំណងផ្អាកសកម្មភាពនុយក្លេអ៊ែរ ជាថ្នូរនឹងការផ្អាកសមយុទ្ធយោធារវាងអាមេរិកនិងកូរ៉េខាងត្បូងដែរ ហើយចិនក៏ធ្លាប់ដាក់សំណើដូច្នេះដែរ ដើម្បីកាត់បន្ថយភាពតានតឹងនិងរកដំណោះស្រាយវិបត្តិ។ ប៉ុន្តែ ក្រុងសេអ៊ូល និងក្រុងវ៉ាស៊ីនតោនមិនព្រម។ ឥឡូវនេះ ក្រុងព្យុងយ៉ាងមានផែនការបាញ់មីស៊ីលទៅកោះហ្គាំ ដើម្បីបន្ថែមសម្ពាធលើអាមេរិកនិងក្រុងសេអ៊ូល អោយគិតគូរឡើងវិញសំណើនេះ។
ស្ថានការណ៍កាន់តែតានតឹងក្រោយកូរ៉េខាងជើងបាញ់មីស៊ីលអន្តរទ្វីប២លើក ក្នុងខែកក្កដាកន្លងទៅ ធ្វើអោយលោកដូណាល់ ត្រាំ ព្រមានប្រែក្លាយកូរ៉េខាងជើងអោយទៅជាភ្លើងនិងកំហឹង។ កងទ័ពកូរ៉េខាងជើងក៏ប្រកាសផែនការបាញ់មីស៊ីល៤ដើម ដំណាលគ្នាតែម្តងឆ្ពោះទៅកោះGuam អាមេរិក។ ប៉ុន្តែ ពេលនេះ លោកគឺម ជុងអ៊ុនបានបន្ទន់ជំហរមកវិញ ប្រហែលដើម្បីកុំអោយស្ថានការណ៍កាន់តែពិបាករកច្រកចេញ។ ព្រោះចិនដែលជាសម្ព័ន្ធមិត្តរបស់កូរ៉េខាងជើងក៏លែងអាចអត់ធ្មត់បានទៀត ទើបបានជាព្រមអោយអង្គការសហប្រជាជាតិបន្ថែមទណ្ឌកម្មប្រឆាំងកូរ៉េខាងជើង។ ហើយម្សិលមិញនេះ ចិនបានប្រកាសផ្អាកនាំចូលដែក សំណ និងផលិតផលគ្រឿងសមុទ្រពីកូរ៉េខាងជើងថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ