អំពើហិង្សាលើរ៉ូហ៊ីងយ៉ា ៖ ៤០០នាក់ស្លាប់ ភៀសខ្លួនរាប់សិបពាន់ ជំនួយស្បៀងអាហារត្រូវផ្អាក
ការប្រយុទ្ធដ៏ហិង្សារវាងទាហានភូមា និងជនជាតិភាគតិចកាន់សាសនាអ៊ីស្លាមរ៉ូហ៊ីងយ៉ា នៅភាគពាយ័ព្យប្រទេស បានបង្កឱ្យមានមនុស្សស្លាប់យ៉ាងយោច ៤០០នាក់ និង រាប់សិបពាន់នាក់ភៀសខ្លួនទៅបង់ក្លាដែល។ ជាងនេះទៅទៀត ដោយហេតុតែការប្រយុទ្ធគ្នា អង្គការកម្មវិធីស្បៀងអាហារពិភពលោកបានសម្រេចផ្អាកការចែកចាយជំនួយ សម្រាប់ប្រជាជនយ៉ាងហោចណាស់ ២៥០០០០នាក់។
ចុះផ្សាយនៅថ្ងៃ៖
ស្តាប់ - ០២:០៤
ស្ថានភាពនៅភាគពាយ័ព្យប្រទេស មានភាពតានតឹងខ្លាំងណាស់ សម្រាប់ក្រុមការងារមនុស្សធម៌ តាំងពីរដ្ឋាភិបាលភូមា ដែលដឹកនាំដោយលោកស្រី អ៊ុង សានស៊ូជី បានធ្វើការចោទប្រកាន់ថាអង្គការថារកឃើញស្បៀងអាហារ នៅក្នុងជំរំរបស់ពួកឧទ្ទាមមក។ ហេតុដូច្នេះហើយទើបអង្គការស្បៀងអាហារពិភពលោកសម្រេចផ្អាកប្រតិបត្តិការជំនួយស្បៀងនៅក្នុងរដ្ឋរ៉ាឃីន តាំងពីការប្រយុទ្ធចាប់ផ្តើមភ្លាម និងដែលធ្វើឱ្យជនភៀសខ្លួន ព្រមទាំង ពលរដ្ឋភូមាខ្សត់ខ្សោយភូមាប្រមាណយ៉ាងហោច២៥ម៉ឺននាក់ លែងបានទទួលជំនួយ។
ជាតំបន់ក្រីក្រ ឆ្ងាយដាច់ស្រយាលនៃប្រទេស រ៉ាឃីន មានជនជាតិរ៉ូហ៊ីយ៉ា រស់នៅក្នុងជំរំរខេករខាក ប្រមាណ១២ម៉ឺននាក់ តាំងពីឆ្នាំ២០១២មក។ ជនជាតិភាគតិចអ៊ីស្លាមគ្មានប្រទេសនេះ គ្មានសិទ្ធិធ្វើការ និងដើរហើរដោយសេរីទេ ពួកគេរស់រំពឹងទាំងស្រុងលើជំនួយស្បៀងអាហារពីអង្គការមនុស្សធម៌។
មិនតែប៉ុណ្ណោះពួកគេត្រូវប្រឈមនឹងអំពើហិង្សាជាញឹកញយ។ អំពើហិង្សាទើបផ្ទុះឡើងចុក្រោយនេះ បានបង្កឱ្យជនជាតិរ៉ូហ៊ីងយ៉ាយ៉ាងហោចណាស់៤០០នាក់ ស្លាប់ និងជិតបួនម៉ឺននាក់រត់ភៀសខ្លួនទៅបង់ក្លាដែស ក្នុងរយៈពេលតែមួយសប្តាហ៍ ប៉ុន្តែពាក់កណ្តាលត្រូវជាប់គាំងនៅព្រំដែន ព្រោះបង់ក្លាដែលបានបិទព្រំដែន ដោយពុំមានសមត្ថភាពទទួលជនភៀសខ្លួនរ៉ូហ៊ីងយ៉ាងបន្ថែម (ពីចំនួនជនភៀស៤០ម៉ឺននាក់មានស្រាប់) ទៀតបានទេ។
ប្រឈមនឹងស្ថានការណ៍បែបនេះ លោកអគ្គលេខាអង្គការសហប្រជាជាតិបានអំពាវនាវឱ្យរដ្ឋាភិបាលភូមា និងរ៉ូហ៊ីយ៉ាអត់ធ្មត់ និងរក្សាភាពស្ងប់ស្ងាត់ ដើម្បីបញ្ចៀសឱ្យបានមហន្តរាយមនុស្សធម៌។
ថ្វីបើរស់នៅរាប់ជំនាន់ក្នុងប្រទេសភូមា ប៉ុន្តែជនជាតិភាគតិចរ៉ូហ៊ីងយ៉ាត្រូវរងទុកបុកម្នេញ និងចាត់ទុកជាជនបរទេស។ ចាប់ពីខែតុលា២០១៦មក តំបន់រស់នៅរបស់ពួកគេត្រូវបិទខ្ទប់ គ្មានអ្នកសារព័ត៌មានណាអាចចេញចូលដោយឯករាជ្យទេ។ ការវាយប្រហារលើប៉ូលិសពីសំណាក់ពួកឧទ្ទាមរ៉ូហ៊ីងយ៉ា កាលពីថ្ងៃទី ២៥សីហា បានជំរុញទាហានភូមាបានបើកប្រតិបត្តិការប្រយុទ្ធបង្ក្រាប។ ម្សិលមិញ មេបញ្ជាការយោធាភូមាបានប្រកាសឱ្យគ្រប់ស្ថាប័នរដ្ឋាភិបាល និងប្រជាជនភូមាទាំងអស់ងើបឡើងការពារប្រទេសក្នុងស្មារតីជាតិនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ