នេប៉ាល់រៀបចំបោះឆ្នោតជាប្រវត្តិសាស្រ្តក្នុងក្តីសង្ឃឹមបិទទំព័រអស្ថិរភាពនយោបាយ
នៅថ្ងៃអាទិត្យ ទី២៦ វិច្ឆិកានេះ ប្រទេសនេប៉ាល់បានផ្តើមរៀបចំបោះឆ្នោតដើម្បីជ្រើសរើសសមាជិកសភាជាតិ និងសមាជិកសភាខេត្ត។ ការរៀបចំបោះឆ្នោតនេះត្រូវរៀបចំជាពីរដំណាក់កាល គឺដំណាក់កាលទី១ នៅថ្ងៃនេះសម្រាប់ប្រជាជនរស់នៅប៉ែកខាងជើង និងដំណាក់កាលទី២ នៅថ្ងៃទី៧ ធ្នូខាងមុខសម្រាប់ប្រជាជនដែលរស់នៅប៉ែកខាងត្បូង។ អ្វីជាការកត់សម្គាល់ ការរៀបចំបោះឆ្នោតជាប្រវតិ្តសាស្រ្តពេលនេះបានធ្វើឡើង ១០ឆ្នាំក្រោយពីការបិទបញ្ចប់សង្រ្គាមស៊ីវិល និងចំពេលដែលនេប៉ាល់កំពុងស្គាល់អស្ថិរភាពនយោបាយ។
ចុះផ្សាយនៅថ្ងៃ៖
ស្តាប់ - ០២:០០
ក្នុងរយៈពេល ១០ឆ្នាំ ពោលពីឆ្នាំ ១៩៩៦ ដល់ឆ្នាំ ២០០៦ ប្រទេសនេប៉ាល់បានស្គាល់ភាពញាំញីនៃការតស៊ូប្រដាប់អាវុធពីក្រុមឧទ្ទាមម៉ៅនិយមដែលបណ្តាលឲ្យមានមនុស្សស្លាប់ ១៧ ០០០នាក់។ ក្រោយកិច្ចព្រមព្រៀងសន្តិភាពរវាងក្រុមឧទ្ទាមម៉ៅនិយម និងរដ្ឋាភិបាលក្នុងឆ្នាំ ២០០៦ មក ក៏ជាការបិទបញ្ចប់របបរាជានិយមក្នុងឆ្នាំ ២០០៨ ដោយដោយដាក់ជំនួសរបបសាធារណរដ្ឋវិញ។ តែបញ្ហានៅត្រង់ថា សម័យកាលអន្តរកាលតាមបែបលទ្ធិប្រជាធិបតេយ្យបានធ្វើឲ្យរដ្ឋាភិបាលនៃរបបសាធារណរដ្ឋស្គាល់ភាពវឹកវរនយោបាយយ៉ាងខ្លាំង។ គ្រាន់តែក្នុងរយៈពេល ១១ឆ្នាំចុងក្រោយនេះ នេប៉ាល់មានការផ្លាស់ប្តូររូបនាយករដ្ឋមន្រ្តីដល់ទៅ ១០នាក់។
តាំងពីក្រោយការបិទបញ្ចប់សង្រ្គាមស៊ីវិលមក នេះជាលើកទី១ ដែលនេប៉ាល់បានរៀបចំបោះឆ្នោតជ្រើសរើសសមាជិកសភាជាតិ និងសមាជិកសភាខេត្តដែលមានគណបក្សនយោបាយចំនួន ៣ចូលរួម គឺគណបក្សសមាជនេប៉ាល់ គណបក្សសង្គមប្រជាធិបតេយ្យដែលកំពុងកាន់អំណាច និងគណបក្សម៉ៅនិយមដែលបានបង្កើតឡើងដោយមានការចូលរួមពីក្រុមអតីតឧទ្ទាមម៉ៅនិយម និងគណបក្សកុម្មុយនិស្ត។ ការរៀបចំបោះឆ្នោតពេលនេះបានធ្វើឡើងដោយអនុលោមតាមច្បាប់រដ្ឋធម្មនុញ្ញថ្មីអនុម័តកាលពីឆ្នាំ ២០១៥។
ផ្អែកតាមច្បាប់រដ្ឋធម្មនុញ្ញក្នុងឆ្នាំ ២០១៥ អំណាចនឹងលែងប្រមូលផ្តុំតែក្នុងដៃរដ្ឋាភិបាលកណ្តាលទៀតឡើយ តែនឹងប្រគល់ទៅឲ្យខេត្តទាំង ៧ របស់ប្រទេស។ នៅក្នុងការបោះឆ្នោតនេះ មានបេក្ខជនឈរឈ្មោះជាង ៦ ០០០នាក់ ហើយប្រជាជននេប៉ាល់ត្រូវបោះឆ្នោតជ្រើសរើសសមាជិកសភាជាតិថ្មីចំនួន ២៧៥នាក់សម្រាប់រដ្ឋសភាសហព័ន្ធ និងសមាជិកសភាខេត្តចំនួន ៥៥០នាក់។ ប្រជាជននេប៉ាល់ទូទៅសង្ឃឹមថា ការបោះឆ្នោតពេលនេះអាចនឹងឈានទៅបិទបញ្ចប់អស្ថិរភាពនយោបាយដែលនេប៉ាល់បានស្គាល់តាំងពីក្រោយការបិទបញ្ចប់សង្រ្គាមស៊ីវិល និងការដួលរលំនៃរបបរាជានិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ