នៅក្នុងកិច្ចចរចាជាមួយអង្គការសហប្រជាជាតិ កូរ៉េខាងជើងចោទអាមេរិកពីបទគំរាមកំហែងនុយក្លេអ៊ែរ
នៅថ្ងៃសៅរ៍ ទី៩ ធ្នូនេះ លោក Jeffrey Feltman អគ្គលេខាធិការរងនៃអង្គការសហប្រជាជាតិទទួលបន្ទុកកិច្ចការនយោបាយបានត្រឡប់ទៅដល់ទីក្រុងប៉េកាំង ប្រទេសចិន បន្ទាប់ពីបានបំពេញទស្សនកិច្ចរយៈពេល ៥ថ្ងៃក្នុងទីក្រុងព្យុងយ៉ាង កូរ៉េខាងជើង។ ក្រោយការចាកចេញរបស់លោក Feltman កូរ៉េខាងជើងបានចោទអាមេរិកពីបទគំរាមកំហែងនុយក្លេអ៊ែរនៅក្នុងកិច្ចចរចាជាមួយអង្គការសហប្រជាជាតិ នេះបើយោងតាមទីភ្នាក់ងារសារព័ត៌មានផ្លូវការកូរ៉េខាងជើងឈ្មោះ KCNA ចេញផ្សាយថ្ងៃនេះ។
ចុះផ្សាយនៅថ្ងៃ៖
ស្តាប់ - ០២:០៨
ចប់ហើយទស្សនកិច្ចរយៈពេល ៥ថ្ងៃរបស់លោក Jeffrey Feltman នៅក្នុងទីក្រុងព្យុងយ៉ាង ប្រទេសកូរ៉េខាងជើង។ គោលដៅនៃទស្សនកិច្ចរបស់លោក Feltman ក្នុងនាមជាអគ្គលេខាធិការរងនៃអង្គការសហប្រជាជាតិទទួលបន្ទុកកិច្ចការនយោបាយ គឺដើម្បីកាត់បន្ថយភាពតានតឹងនៅក្នុងឧបទ្វីបកូរ៉េ។ នៅក្នុងទីក្រុងព្យុងយ៉ាង លោក Feltman បានជួបសន្ទនាជាមួយរដ្ឋមន្រ្តី និងអនុរដ្ឋមន្រ្តីក្រសួងការបរទេសកូរ៉េខាងជើងលោករី ជុងហូ និងលោកប៉ាក់ យ៉ុង គុគ នេះបើយោងតាមទីភ្នាក់ងារសារព័ត៌មានផ្លូវការកូរ៉េខាងជើង KCNA។
តាម KCNA ភាគីកូរ៉េខាងជើងបាននិយាយប្រាប់លោក Feltman នៅក្នុងកិច្ចសន្ទនានោះថា គឺនយោបាយអរិភាពរបស់អាមេរិកចំពោះកូរ៉េខាងជើង និងការគំរាមកំហែងនុយក្លេអ៊ែររបស់អាមេរិក ជាអ្នកទទួលខុសត្រូវនៃស្ថានការណ៍តានតឹងនៅលើឧបទ្វីបកូរ៉េបច្ចុប្បន្ន។ ទន្ទឹមគ្នានេះ KCNA ក៏បានប្រកាសឲ្យដឹងថា ក្រុងព្យុងយ៉ាងបានព្រមព្រៀងជាមួយភាគីអង្គការសហប្រជាជាតិក្នុងការផ្តល់ព័ត៌មានជាប្រចាំនៅរាល់ទស្សនកិច្ចគ្រប់កម្រិតទាំងអស់។ តែ KCNA មិនបានបញ្ជាក់ទេថា តើមាន ឬមិនមានជំនួបរវាងលោក Feltman និងមនុស្សខ្លាំងកូរ៉េខាងជើងលោកគីម ជុងអ៊ុន។
សូមជម្រាបជូនថា នេះជាលើកទី១ គិតតាំងពីឆ្នាំ ២០១០ ដែលមានមន្រ្តីជាន់ខ្ពស់អង្គការសហប្រជាជាតិម្នាក់ថ្នាក់អគ្គលេខាធិការរងបានបំពេញទស្សកិច្ចក្នុងទឹកដីកូរ៉េខាងជើង។ ម្យ៉ាងទៀត ទស្សកិច្ចនេះបានធ្វើឡើង ១សប្តាហ៍បន្ទាប់ពីរបបក្រុងព្យុងយ៉ាងបានបាញ់សាកល្បងគ្រាប់មីស៊ីលបាលីស្ទិក និង ប៉ុន្មានថ្ងៃក្រោយពីអាមេរិក និងកូរ៉េខាងត្បូងបានធ្វើសមយុទ្ធផ្លូវអាកាសដ៏ធំមិនធ្លាប់មាន។ ទីភ្នាក់ងារ KCNA បានរម្លឹកជាថ្មីអំពីជំហររបស់ក្រុងព្យុងយ៉ាងដែលយល់ឃើញថា សមយុទ្ធប្រចាំឆ្នាំរវាងអាមេរិក និងកូរ៉េខាងត្បូងនៅក្នុងឧបទ្វីបកូរ៉េ គឺជាឆន្ទៈដើម្បីរៀបចំការវាយប្រហារនុយក្លេអ៊ែរលើកូរ៉េខាងជើង។
ដោយឡែក លោក Feltman បានទៅដល់ទីក្រុងប៉េកាំង ប្រទេសចិននៅថ្ងៃសៅរ៍ ទី៩ ធ្នូនេះ តែនៅចំពោះវត្តមានហ្វូងអ្នកកាសែតនាអាកាសយានដ្ឋាន លោកមិនបានធ្វើសេចក្តីថ្លែងការណ៍អ្វីទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ