អង្គការសហប្រជាជាតិបញ្ចូលនាវាកូរ៉េខាងជើង៤គ្រឿងក្នុងបញ្ជីខ្មៅ
ចុះផ្សាយនៅថ្ងៃ៖
ស្តាប់ - ០៤:៥១
ថ្ងៃព្រហស្បតិ៍ម្សិលមិញ អង្គការសហប្រជាជាតិបានបញ្ចូលនាវាកូរ៉េខាងជើង៤គ្រឿងថែមទៀត ក្នុងបញ្ជីខ្មៅ ក្នុងក្របខណ្ឌទណ្ឌកម្មទៅលើនុយក្លេអ៊ែរកូរ៉េខាងជើង។ ទន្ទឹមនេះដែរ សហរដ្ឋអាមេរិកបានចោទថា ចិនលក់ប្រេងអោយកូរ៉េខាងជើងបំពានទណ្ឌកម្មអង្គការសហប្រជាជាតិ។ ថ្ងៃសុក្រនេះ រដ្ឋាភិបាលចិនបានទាត់ចោលការចោទប្រកាន់របស់អាមេរិក។
អាមេរិកដាក់សំណើបញ្ចូលនាវា១០គ្រឿងក្នុងបញ្ជីខ្មៅ
ទាក់ទងទណ្ឌកម្មលើនុយក្លេអ៊ែរកូរ៉េខាងជើង អាមេរិកបានស្នើអោយដាក់បញ្ចូលនាវាទាំងអស់១០គ្រឿង ចូលបញ្ជីខ្មៅ មិនអោយចុះចតនៅតាមរាល់កំពង់ផែអន្តរជាតិ។ អង្គការសហប្រជាជាតិបានដាក់ទណ្ឌកម្មតែលើនាវា៤គ្រឿងប៉ុណ្ណោះ ព្រោះចិនបានជំទាស់មិនអោយ៦គ្រឿងទៀត មានឈ្មោះក្នុងបញ្ជីខ្មៅទេ។
នាវា៤គ្រឿងដែលអង្គការសហប្រជាជាតិបញ្ចូលក្នុងបញ្ជីខ្មៅ ថ្ងៃព្រហស្បតិ៍ ម្សិលមិញនេះ ជានាវារបស់កូរ៉េខាងជើង។ នាវាទាំង៤គ្រឿងជាប់សង្ស័យថា ដឺកទំនិញបំពានលើទណ្ឌកម្មអង្គការសហប្រជាជាតិ។ ដូច្នេះ ការបញ្ចូលនាវាកូរ៉េខាងជើងក្នុងបញ្ជីខ្មៅ មិនពិបាកទេ ព្រោះវាជាកម្មសិទ្ធិរបស់កូរ៉េខាងជើង។ ប៉ុន្តែ នាវា៦គ្រឿងទៀតនោះ មិនមែនជារបស់កូរ៉េខាងជើងទេ វាជានាវាដោតទង់ជាតិប្រទេសផ្សេងទៀត គឺដោតទង់ជាតិចិន ហុងកុង ប៉ាឡូ បេលីហ្ស រឺក៏ប៉ាណាម៉ាជាដើម។
ចិនបានជំទាស់មិនអោយបញ្ជូលនាវា៦គ្រឿងនេះ ក្នុងបញ្ជីខ្មៅទេ ព្រោះចិនបដិសេធថា គ្មានកប៉ាល់ចិន រឺក៏ក្រុមហ៊ុនចិនណាមួយដឺកទំនិញរកស៊ីជាមួយកូរ៉េខាងជើង បំពានទណ្ឌកម្មអង្គការសហប្រជាជាតិទេ។ អញ្ចឺងហើយ ទើបបានជាអង្គការសហប្រជាជាតិមិនអាចបញ្ចូលឈ្មោះកប៉ាល់ទាំង៦គ្រឿងនេះ ក្នុងបញ្ជីខ្មៅ តាមសំណើអាមេរិកបាន។ ទោះយ៉ាងនេះក្តី ក៏និតិវិធីនៅតែបើកចំហ ទាក់ទងនឹងការបញ្ចូលកប៉ាល់ទាំង៦គ្រឿងនេះ ក្នុងបញ្ជីខ្មៅ។
ថ្ងៃសុក្រនេះ រដ្ឋាភិបាលចិនបានចេញមុខទាត់ចោលការចោទប្រកាន់របស់អាមេរិក ដែលថា ចិនរកស៊ីលក់ប្រេងអោយកូរ៉េខាងជើង បំពានសេចក្តីសម្រេចរបស់អង្គការសហប្រជាជាតិ។ យោងតាមចិន ការដែលអាមេរិកបំផ្លើសរឿងទាំងនេះតាមសារព័ត៌មាន មិនបានពង្រឹងទំនុកចិត្តនិងកិច្ចសហប្រតិបត្តិការរវាងគ្នានោះទេ។
អាមេរិកប្រាប់ថា មានព័ត៌មានថា កប៉ាល់ចិនលក់ប្រេងអោយកូរ៉េខាងជើង
ម្សិលមិញនេះ មន្ត្រីជាន់ខ្ពស់ក្រសួងការបរទេសអាមេរិកមួយរូបបានលើកឡើងថា អាមេរិកមានព័ត៌មានជាច្រើនបង្ហាញពីសកម្មភាពរកស៊ីប្រេង បញ្ចេញប្រេងពីកប៉ាល់ផ្សេងៗទៅអោយកប៉ាល់កូរ៉េខាងជើង។ ហើយក៏មានព័ត៌មានពីការដឹកធ្យូងថ្មពីកូរ៉េខាងជើងមកដែរ។ កប៉ាល់រកស៊ីទាំងអស់នេះ បើតាមអាមេរិក ជាកម្មសិទ្ធិរបស់ក្រុមហ៊ុនរបស់ប្រទេសជាច្រើន ក្នុងនោះមានទាំងចិនផងដែរ។ មានន័យថា ចិននៅតែបន្តផ្តោះប្តូររកស៊ីជាមួយកូរ៉េខាងជើង។ មន្ត្រីអាមេរិកនៅតែបន្តសុំអោយគ្រប់ដៃគូអាមេរិក ដាក់សម្ពាធលើកូរ៉េខាងជើង ដើម្បីជំរុញកូរ៉េខាងជើងអោយចូលតុចរចា។
ម្សិលមិញនេះដែរ លោកដូណាល់ ត្រាំ លើកឡើងថា លោកខកចិត្តខ្លាំងណាស់ដែលចិនបណ្តោយអោយមានការនាំចេញប្រេងទៅអោយកូរ៉េខាងជើង។ លោកត្រាំ ថាបើនៅតែបន្តដូច្នេះទៀត គឺគ្មានដំណោះស្រាយមិត្តភាពអ្វីទាក់ទងនឹងបញ្ហាកូរ៉េខាងជើងទេ។ មួយរយៈចុងក្រោយនេះ អាមេរិកសប្បាយចិត្តដែលនៅអង្គការសហប្រជាជាតិ ចិនជាដៃគូកូរ៉េខាងជើងមែន តែចិនមិនបានជំទាស់ការដាក់ទណ្ឌកម្មលើកូរ៉េខាងជើង។ ឆ្នាំ២០១៧នេះ អង្គការសហប្រជាជាតិបានដាក់ទណ្ឌកម្មលើក្រុងព្យុងយ៉ាងដល់ទៅ៣លើក ហើយមួយលើកៗតែងធ្ងន់ជាងមុនទៅទៀត។ ទណ្ឌកម្មលើកចុងក្រោយ គឺសម្រេចឡើងកាលពីថ្ងៃ២២ធ្នូ កន្លងទៅ។ ចិនមិនបានជំទាស់ទេ តែឥឡូវនេះ លោកដូណាល់ ត្រាំ លើកឡើងថា ពេលលឺរឿងប្រេងនេះ លោកមិនសប្បាយចិត្តទេ។
ថ្ងៃនេះ ក្រសួងការបរទេសចិនបដិសេធការចោទប្រកាន់របស់អាមេរិកទាំងស្រុងថា ព័ត៌មានដែលថាកប៉ាល់ចិនលក់ប្រេងអោយកប៉ាល់កូរ៉េខាងជើងនោះ គឺខុសទាំងស្រុង ព្រោះថា ចិនមិនអនុញ្ញាតអោយពលរដ្ឋរឺក៏ក្រុមហ៊ុនចិនណាមួយបំពានលើសេចក្តីសម្រេចអង្គការសហប្រជាជាតិដាច់ខាត។
ទាក់ទងនឹងការចោទប្រកាន់ទៅលើចិននេះ កាលពីខែវិច្ឆិកា កូរ៉េខាងត្បូងក៏ធ្លាប់លើកឡើងដែរថាបានចាប់បានកប៉ាល់ដោតទង់ហុងកុងមួយគ្រឿង។ កប៉ាល់នេះទំនងជាផ្ទេរផលិតផលប្រេងទៅអោយកប៉ាល់កូរ៉េខាងជើង។
ការដោតទង់ជាតិប្រទេសណាមួយលើកប៉ាល់ទំនិញ មិនអាចយកជាការបាន
ចិនជំទាស់ មិនអោយអង្គការសហប្រជាជាតិចុះឈ្មោះកប៉ាល់៦គ្រឿងផ្សេងទៀត ដែលអាមេរិកស្នើមកនោះ ក្នុងបញ្ជីខ្មៅ។ ការដោតទង់ជាតិប្រទេសណាមួយ លើកប៉ាល់ទំនិញ មិនអាចបញ្ជាក់ថា កប៉ាល់ទំនិញនោះជាកម្មសិទ្ធិប្រទេសនោះទេ ព្រោះថា បើមានកប៉ាល់ល្មើសណាមួយរកស៊ីខុសច្បាប់ ជនល្មើសជាម្ចាស់កប៉ាល់ គ្រាន់តែដោតទង់ជាតិចិន រឺទង់ជាតិប្រទេសណាមួយលើកប៉ាល់នោះទៅ ជាការស្រេច។
កន្លងមក ក៏ធ្លាប់មានបញ្ហាដោតទង់ជាតិ ទាក់ទងនឺងកម្ពុជាយើងដែរ។ គឺកាលពីខែតុលា គឺថា អង្គការសហប្រជាជាតិបានហាមឃាត់កប៉ាល់៤គ្រឿងដែរ មានដោតទង់កម្ពុជា កូរ៉េខាងជើង រឺក៏ទង់របស់កោះកូម័រអាហ្វ្រិកជាដើម។ រដ្ឋាភិបាលកម្ពុជាយើងក៏បានបដិសេធដែរថា ការដោតទង់ជាតិកម្ពុជា លើនាវាដឹកអាវុធដែលអេហ្ស៊ីបបានឃាត់កន្លងមកនោះ គឺជារឿងខុសច្បាប់។ កម្ពុជាបានបញ្ឈប់ការបំពាក់ទង់ជាតិនេះ តាំងពី ខែសីហា ឆ្នាំ២០១៦មកម្ល៉េះ។ នាវាពាក់ព័ន្ធដែលអេហ្ស៊ីបចាប់បាននោះ ដោតទង់ជាតិកម្ពុជាមែន តែចេញដំណើរមកពីកូរ៉េខាងជើង។
និយាយរួមទៅ មិនមែនមានន័យថា អោយតែនាវាណាដោតទង់ប្រទេសណាមួយ នាវានោះត្រូវតែជាកម្មសិទ្ធិរបស់ប្រទេសនោះទេ។ ទាល់តែតាមដាន ស៊ើបរកភស្តុតាងអោយគ្រប់ជ្រុងជ្រោយសិន ទើបអាចធ្វើនិតិវិធីចោទប្រកាន់បាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ