កូរ៉េខាងជើងបានចាត់ទុកទណ្ឌកម្មថ្មីរបស់ក្រុមប្រឹក្សាសន្តិសុខថាជាទង្វើសង្រ្គាម
នៅថ្ងៃអាទិត្យ ទី២៤ ធ្នូនេះ កូរ៉េខាងជើងបានបញ្ចេញប្រតិកម្មតបនឹងក្រុមប្រឹក្សាសន្តិសុខដែលបានចេញសេចក្តីសម្រេចចិត្តដាក់ទណ្ឌកម្មថ្មីប្រឆាំងខ្លួនកាលពីថ្ងៃសុក្រ ទី២២ ធ្នូ។ ក្រុងព្យុងយ៉ាងបានចាត់ទុកទណ្ឌកម្មថ្មីនេះជាទង្វើសង្រ្គាម និងថា សេចក្តីសម្រេចចិត្តរបៀបនេះនឹងមិនអាចរារាំងកូរ៉េខាងជើងឲ្យបន្តការអភិវឌ្ឍកម្មវិធីនុយក្លេអ៊ែរ និងគ្រាប់មីស៊ីលបាលីស្ទិកបានឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
ប្រតិកម្មរបស់កូរ៉េខាងជើងបានធ្វើឡើងតាមរយៈសេចក្តីប្រកាសព័ត៌មានមួយរបស់ក្រសួងការបរទេសចុះផ្សាយដោយទីភ្នាក់ងារផ្លូវការឈ្មោះ KCNA នៅថ្ងៃអាទិត្យ ទី២៤ ធ្នូនេះ។ « យើងសូមទាត់ចោលទាំងស្រុងនូវទណ្ឌកម្មចុងក្រោយរបស់ក្រុមប្រឹក្សាសន្តិសុខ ហើយចាត់ទុកទណ្ឌកម្មនោះជាការរំលោភបំពានលើអធិបតេយ្យនៃសាធារណរដ្ឋកូរ៉េ និងជាទង្វើសង្រ្គាមដែលបំផ្លាញសន្តិភាព និងស្ថិរភាពនៅក្នុងឧបទ្វីបកូរ៉េ និងនៅក្នុងតំបន់ » នេះជាការថ្លែងរបស់ក្រសួងការបរទេសកូរ៉េខាងជើង។
នៅក្នុងសេចក្តីប្រកាសព័ត៌មានដដែល ក្រសួងការបរទេសបានព្យាយាមបញ្ជាក់ថា វាពិតជាកំហុសឆ្គងដ៏ធំធេងខ្លាំងណាស់ ប្រសិនបើគ្រប់គ្នាជឿជាក់ថា ទណ្ឌកម្មអាចនឹងបញ្ឈប់ដំណើរទៅមុខរបស់ពលរដ្ឋកូរ៉េខាងជើងឆ្ពោះទៅបំពាក់អាវុធនុយក្លេអ៊ែរនោះ។ នៅក្នុងន័យនេះ ក្រសួងការបរទេសបានរម្លឹកថា អាមេរិក និងក្រុមប្រទេសផ្សេងទៀតដែលដើរតាមគន្លងអាមេរិកមិនគួរភ្លេចទេថា កូរ៉េខាងជើងអាចវាយប្រហារនុយក្លេអ៊ែរលើដែនដីអាមេរិកាំង។ ប្រតិកម្មខ្លាំងៗរបស់ក្រុងព្យុងយ៉ាងដូចនេះបានធ្វើឡើង បន្ទាប់ពីក្រុមប្រឹក្សាសន្តិសុខបានអនុម័តទណ្ឌកម្មថ្មីប្រឆាំងកូរ៉េខាងជើងតាមសំណើរបស់អាមេរិក។
នៅក្នុងទណ្ឌកម្មថ្មីនោះ ក្រុមប្រឹក្សាសន្តិសុខបានសំដៅលើវិស័យសំខាន់ចំនួនពីរ ទី១ កម្រិតនៃការនាំចូលប្រេងទៅឲ្យកូរ៉េខាងជើង និងទី២ ហាមមិនឲ្យទទួលយកពលករកូរ៉េខាងជើងធ្វើការនៅបរទេស។ ក្រៅពីហាមមិនឲ្យទទួលយកពលករកូរ៉េខាងជើង ទណ្ឌកម្មថ្មីក៏បានតម្រូវឲ្យមានការបញ្ជូនពលករកូរ៉េខាងជើងរាប់ពាន់នាក់ដែលកំពុងធ្វើការនៅបរទេស ពិសេសនៅចិន និងរុស្ស៊ីឲ្យត្រឡប់ទៅកាន់ស្រុកកំណើតវិញពីពេលនេះដល់ដំណាច់ឆ្នាំ ២០១៩។ ចំណែកការនាំប្រេងឆៅ និងប្រេងចម្រាញ់រួចទៅឲ្យកូរ៉េខាងជើងនឹងត្រូវកាត់បន្ថយចំនួន ៧៥%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ