មេធាវីម្នាក់ ត្រូវជាប់ពិរុទ្ធបន្ទាប់ពីបានអំពាវនាវឲ្យមានការបោះឆ្នោតដោយសេរីនៅក្នុងប្រទេស
មេធាវីចិនម្នាក់ឈ្មោះ Yu Wensheng ដែលជាសកម្មជនការពារសិទ្ធមនុស្សដ៏ល្បីនៅក្នុងប្រទេស ត្រូវបានអាជ្ញាធរចាប់ខ្លួនបន្ទាប់ពីបានអំពាវនាវអោយមានការរៀបចំបោះឆ្នោតដោយសេរីនៅក្នុងប្រទេស។ មិនតែប៉ុណ្ណោះសកម្មជនការពារសិទ្ធមនុស្សនេះ ត្រូវជាប់ពិរុទ្ធពីបទញុះញង់ឲ្យមានវិទ្ធង្សនានៅក្នុងប្រទេស។ យោងតាមមេធាវីរបស់គាត់ លោក Yu ត្រូវបានគេឃុំខ្លួននៅក្នុងទីកន្លែងសម្ងាត់មួយឆ្ងាយពីផ្ទះនិងក្រុមគ្រួសាររបស់គាត់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
ប៉ូលិសចិនប្រមាណជា១០នាក់ដែលក្នុងចំណោមនោះ ក៏មានកងកម្លាំងពិសេសដែរ បានធ្វើការចាប់ខ្លួនលោកមេធាវី Yu Wensheng ដែលក៏ជាសកម្មជនការពារសិទ្ធមនុស្សដ៏ល្បីមួយរូបកាលពីថ្ងៃទី១៩មករាមុននៅទីក្រុងប៉េកាំងខណៈពេលដែលគាត់កំពុងជូនកូនទៅសាលារៀន។
បើយោងតាមការចោទប្រកាន់លើកទីមួយ លោក Yu ដែលមានអាយុ៥០ឆ្នាំ ត្រូវបានអាជ្ញាធរចាប់ខ្លួនពីបទបង្កភាពវឹកវររំខានដល់សណ្តាប់ធ្នាប់សាធារណៈ។
ក៏ប៉ុន្តែ នៅថ្ងៃសៅរ៍មុន ប៉ូលីសនៅ Xuzhou ក្នុងខេត្ត Jiangsu ភាគខាងកើតប្រទេសចិន បានដាក់ពិរុទ្ធបន្ថែមទៀតប្រឆាំងនឹងសកម្មជនការពារសិទ្ធមនុស្សនេះ ពីបទញុះញង់ធ្វើវទ្ធង្សនាប្រឆាំងនឹងរដ្ឋអំណាចដែលអាចជាប់ពន្ធនាគាររហូតដល់១៥ឆ្នាំ។ យោងតាមមេធាវីរបស់លោក YU បទចោទប្រកាន់នេះ មានទម្ងន់៥ដងលើសបទចោទប្រកាន់កាលពីលើកដំបូង។
ចំណែកមេធាវីរបស់លោក YUវិញ បានប្រាប់ដល់ទីភ្នាក់ងារព័ត៌មានបារាំង AFP ថា ប៉ូលីសចិន បានជូនដំណឹងដល់ក្រុមគ្រួសាររបស់កូនក្តីគាត់ ថា កូនក្តីរបស់គាត់នឹងត្រូវជាប់ឃុំឃាំងនៅក្រោមការយាមល្បាតមិនផ្លូវការមួយដែលកំណត់ឡើងដោយអាជ្ញាធរ។
គួររំលឹកថា កាលពីឆ្នាំ ២០១៦ លោកមេធាវី នេះ ធ្លាប់បានដាក់ពាក្យបណ្តឹងប្រឆាំងនឹងសាលាក្រុងនៅប៉េកាំងពីបទការបំពុលបរិយាកាសដ៏រាំរៃនៅក្នុងរដ្ឋធានី។
ហើយនៅមួយថ្ងៃមុនការចាប់ខ្លួន លោក យូ បានផ្ញើរលិខិតចំហរមួយដែរជូនដល់បណ្តាអ្នកសាព័ត៌មានដោយអំពាវនាវដល់រដ្ឋាភិបាលចិន បើកការអនុញ្ញាតអោយមានការបោះឆ្នោតប្រធានាធិបតីជាសកលនិងមានបេក្ខជនជាច្រើនរូបចូលរួមផង។
ម្យ៉ាងទៀតកាលពីពាក់កណ្តាលឆ្នាំ ២០១៥ ទីក្រុងប៉េកាំង ធ្លាប់បានបើកយុទ្ធនាការយ៉ាងខ្លាំងក្លាប្រឆាំងទល់នឹងសកម្មជនណាដែលហ៊ានធ្វើការរិះគន់របបកុម្មុយនិស្តដោយបានទាំងចាប់ខ្លួនក្រុមមេធាវីជាច្រើនរូបផង។
ពាក់ព័ន្ធពីច្បាប់ស្តីពីការឃុំខ្លួនក្រោមការយាមល្បាតវិញ ជនជាប់សង្ស័យ អាចត្រូវជាប់ឃុំរហូតដល់ទៅ៦ខែនៅក្នុងកន្លែងឃុំឃាំងក្រៅផ្លូវការមួយនិងមិនអាចទាក់ទងជាមួយក្រុមគ្រូសារឬក៏មេធាវីរបស់ខ្លួនឡើយ។
បើតាមអ្នកស្រាវជ្រាវម្នាក់របស់អង្គការការពារសិទ្ធមនុស្ស Amnesty International គោលដៅនៃការឃុំឃាំងបែបនេះ គឺដើម្បីបំបិទមាត់ទាំងស្រុងអ្នកជាប់ឃុំយ៉ាងហោចណាស់ក៏៦ខែដែរ មិនអោយមានការទាក់ទងជាមួយអ្នកនៅខាងក្រៅ។
ម្យ៉ាងទៀត លោកមេធាវី យូ អាចប្រឈមមុខនឹងការធ្វើទារុណកម្មនិងធ្វើទុក្ខបុកម្នេញដែល អង្គការ Amnesty International បានបរិហារថា ជាការចោទប្រកាន់ទាំងបំពានលើសកម្មជនការពារសិទ្ធមនុស្សនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ