អាមេរិក ៖ ចោរអ៊ីនធ័រនែតកូរ៉េខាងជើងសាហាវជាងចោរអ៊ីនធ័រនែតចិន
ភ្នាក់ងារជំនាញសន្តិសុខព័ត៌មានវិទ្យាអាមេរិក FireEye បានប្រាប់ឱ្យដឹងនៅថ្ងៃអង្គារនេះថា ក្រុមចោរអ៊ីនធ័រនែតកូរ៉េខាងជើង បានក្លាយជាក្រុមចោរដ៏កាចសាហាវខ្លាំងជាងពួកចោរអ៊ីនធ័រនែតចិនទៅទៀត។ ក្រុមចោរព័ត៌មានវិទ្យាកូរ៉េខាងជើងនេះ កំពុងសហការយ៉ាងជិតស្និទ្ធជាមួយរបបព្យុងយ៉ាង និងជាតំណាងការគំរាមកំហែងពិភពលោកយ៉ាងខ្លាំងមែនទែន។
ចុះផ្សាយនៅថ្ងៃ៖
នេះជាលើកទីមួយហើយក្រុមហ៊ុនឯកទេសសន្តិសុខព័ត៌មានវិទ្យាអាមេរិក FireEye ចង្អុលមុខដោយចំៗក្រុមចោរអ៊ីនធ័រនែតរបស់ព្យុងយ៉ាង ដោយដាក់ឈ្មោះឱ្យថា ក្រុម APT37 សម្រាប់ជំនួសពាក្យគំរាមកំហែងខ្លាំង Advanced persistant Threat។
សកម្មភាពរបស់ក្រុមចោរអ៊ីនធ័រនែតព្យុងយ៉ាងនេះ គឺដើម្បីរកចំណូលមកបំពេញ នូវអ្វីដែលកូរ៉េខាងជើងខាតបង់ដោយហេតុទណ្ឌកម្មអន្តរជាតិប្រឆាំងនឹងកម្មវិធីនុយក្លេអ៊ែរនិងបាលីស្ទិករបស់គេ។ នេះបើតាមការគូសបញ្ជាក់របស់ក្រុមហ៊ុនFireEye ដែលបានលម្អិតទៀតថា ទិសដៅនៃការវាយប្រហាររបស់ក្រុមAPT37 គឺសំដៅលើតែកន្លែងណាដែលអាចទាញផលប្រយោជន៍រដ្ឋកូរ៉េខាងជើង ! ហេតុដូច្នេះហើយបានជាអ្នកវិភាគអាមេរិកមានជំនឿជាក់ខ្ពស់ថា ក្រុម APT37ធ្វើសកម្មភាពដោយមានការគាំទ្រពីរដ្ឋាភិបាលព្យុងយ៉ាង។
APT37 មានសកម្មភាពតាំងពីឆ្នាំ២០១២មក។ ដំបូងពួកគេវាយប្រហារតែលើស្ថាប័នរដ្ឋាភិបាល យោធា ឧស្សាហកម្មការពារជាតិ និងវិស័យឃោសនាព័ត៌មាន នៅកូរ៉េខាងត្បូងទេ មុននឹងពង្រីកសកម្មភាព ដៅការវាយប្រហារ នៅឆ្នាំ២០១៧ ទៅលើ ប្រទេសជប៉ុន វៀតណាម និងប្រទេសនៅតំបន់ដើមបូព៌ា និងទៅលើវិស័យផ្សេងៗទៀត តាំងពីវិស័យគីមី ទៅទូរគមនាគមន៍ ពីស្ថាប័ននយោបាយទៅហិរញ្ញវត្ថុ ដូចយ៉ាងធនាគារកណ្តាលបង់ក្លាដែស ឬ Bitcoin ជាដើម។
សូមរំលឹកថា កាលពីឆ្នាំ២០១៣ អាមេរិកបានកំណត់អត្តសញ្ញាណក្រុមចោរអ៊ីនធ័រនែតមួយក្រុម ឈ្មោះថា APT ដែលបានចូលវាយប្រហារលើប្រព័ន្ធសារព័ត៌មាន ភ្នាក់ងាររបស់រដ្ឋាភិបាល និងក្រុមហ៊ុនអាមេរិក។ ក្រុមចោរនោះមានមូលដ្ឋាននៅចិន និងទំនងជាភ្នាក់ងារមួយរបស់រដ្ឋាភិបាលចិន ដោយមានសាខាមួយជាយោធានៅសៀងហៃ។ កាលណោះ សមាជិករបស់ក្រុមចោរ៥នាក់ត្រូវជាប់ការចោទប្រកាន់ដោយតុលាការអាមេរិក ដែលប៉ះពាល់យ៉ាងខ្លាំងដល់ទំនាក់ទំនងការទូតរវាងប៉េកាំងនិងវ៉ាស៊ីនតោន។
សម្រាប់ភ្នាក់ងារ FireEye ប្រតិបត្តិការរបស់ចោរអ៊ីនធ័រនែតចិនក៏ដូចចោរអ៊ីនធ័រនែតកូរ៉េខាងជើង ប្រែប្រួលពីសាមញ្ញទៅជាការប្រើវិធីសាស្រ្តដ៏ទំនើបខ្លាំង ប៉ុន្តែអ្វីដែលខុសគ្នាខ្លាំង គឺប្រតិបត្តិការរបស់ចោរកូរ៉េខាងជើងសាហាវខ្លាំង ៖ ពួកចិនច្រើនតែមានប្រពៃណីលួចធ្វើដោយមិនសម្ញែង ឯពួកកូរ៉េខាងជើងបង្ហាញឱ្យឃើញយ៉ាងច្បាស់ថាពួកគេត្រៀមធ្វើវាយប្រហារដោយមិនបង្អង់ គ្មានអាសូរ ក្នុងទម្រង់ជាឧក្រិដ្ឋកម្មអន្តរជាតិតែម្តង។ រហូតមកទល់នេះ APT37 ត្រូវបានភ្នាក់ងារអាមេរិកចាត់ទុកជាក្រុមចារកិច្ចស្ងាត់ទេ ប៉ុន្តែក្រុមនេះអាចនឹងត្រូវព្យុងយ៉ាង យកមកប្រើជាអាវុធដ៏សាហាវបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ