ហុងកុងនាំគ្នាធ្វើបាតុកម្មមុនខួប២៩ឆ្នាំនៃការបង្ក្រាបនៅធានអាន់មេន
ដូចជារៀងរាល់ឆ្នាំ ឱ្យតែជិតដល់ខួបនៃការបង្ក្រាបបាតុករនៅទីលានធានអាន់មេន សកម្មជនប្រជាធិបតេយ្យហុងកុង តែងនាំគ្នារៀបចំដង្ហែក្បួន និងធ្វើពិធីឧទ្ធិសដល់ជនរងគ្រោះ។ នៅថ្ងៃអាទិត្យនេះ សកម្មជនហុងកុងរាប់ពាន់នាក់ បានចាប់ផ្តើមប្រារព្វខួប២៩ឆ្នាំនៃការបង្ក្រាបនៅធានអាន់មេន ដោយការដង្ហែក្បួនបាតុកម្ម ស្រែកទាមទារសុំសេរីភាពឱ្យលោកស្រី លីវ ស្យ៉ា ភរិយាមេម៉ាយរបស់ម្ចាស់លាភីណូបែលសន្តិភាព លីវ ស៊ាវប៉ូ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
ក្រោមការអំពាវនាវរបស់សកម្មជនប្រជាធិបតេយ្យ និងសម្ព័ន្ធគាំទ្រចលនាជាតិនិយមនិងប្រជាធិបតេយ្យចិន បាតុករហុងកុងជាងមួយពាន់នាក់ បាននាំគ្នាដើរដង្ហែក្បួន ចេញពីសង្កាត់ពាណិជ្ជកម្មនៅកណ្តាលក្រុង ទៅដល់ដល់មុខទីស្នាក់ការការិយាល័យទំនាក់ទំនងចិន។ កម្មវត្ថុនៃបាតុកម្ម គឺដើម្បីទាមទាររកយុត្តិធម៌ជូនដល់ជនរងគ្រោះ នៅក្នុងការបង្ក្រាបបាតុករនៅទីលានធានអាន់មេន កាលពី ២៩ឆ្នាំមុន និងទាមទារឱ្យបិទបញ្ចប់ប្រព័ន្ធឯកបក្សនៅចិន ជាមួយនឹងសម្រែកព្រមទាំងបដាថា “កាន់ទុក្ខថ្ងៃទី៤មិថុនា តស៊ូប្រឆាំងនឹងអំណាចផ្តាច់ការ” !
យប់ថ្ងៃទី ៣ មិថុនាឆ្លងចូល៤មិថុនា ឆ្នាំ១៩៨៩ នៅទីក្រុងប៉េកាំង យោធាចិនបានបញ្ចេញរថពាលដែកបើកកិនសម្លាប់បាតុករដែលនាំគ្នាធ្វើបាតុកម្មដើម្បីលទ្ធិប្រជាធិបតេយ្យ បណ្តាលឱ្យស្លាប់រាប់សិបពាន់នាក់។ នៅចុងឆ្នាំ២០១៧ អង់គ្លេសបានទម្លាយឯកសារសម្ងាត់មួយ ជាសាធារណៈ ថាចំនួនមនុស្សស្លាប់ក្នុងហេតុការណ៍មានចំនួនយ៉ាងហោច ១ម៉ឺននាក់។
ជាមួយគ្នានេះ ចលនាបាតុកម្មក៏បានឆ្លៀតទាមទារផងដែរ សុំឱ្យរដ្ឋាភិបាលក្រុងប៉េកាំង ដោះលែងលោកស្រី លីវ ស្យ៉ា កវីតែងកំណាព្យចំណាស់៥៧ឆ្នាំ ដែលបើតាមធាតុពិត កំពុងជាប់ឃុំឃាំងក្នុងគេហដ្ឋានតាំងពីជាង៨ឆ្នាំ មកដោយគ្មានការកាត់ទោសនិងជាប់ចោទអ្វីទាំងអស់។ ប៉ុន្តែមកពីលោកស្រីជាភរិយារបស់លោក លីវ ស៊ាវប៉ូ ជ័យលាភីរង្វាន់ណូបែលសន្តិភាព ដែលកាលពីនៅរស់ ក្នុងឆ្នាំ២០០៩ លោកត្រូវបានតុលាការចិនបានកាត់ទោសឱ្យជាប់ពន្ធនាគារ ១១ឆ្នាំពីបទប៉ុនប៉ងធ្វើវិទ្ធង្សនាចង់ផ្តួលរំលំរដ្ឋាភិបាលចិន។
ហុងកុងជាដែនដីចិនតែមួយគត់ ដែលពលរដ្ឋនៅមានសិទ្ធិធ្វើបាតុកម្មដើម្បីលទ្ធិប្រជាធិបតេយ្យ និងប្រារព្ធពិធីរំលឹកខួបនៃការបង្ក្រាបនៅធានអាន់មេន នៅឧទ្យានវិចតូរីយ៉ា។ ប៉ុន្តែចំនួនអ្នកចូលរួមធ្វើបាតុកម្មចាប់ថយចុះនារយៈពេលប៉ុន្មានឆ្នាំចុងក្រោយនេះ ដោយហេតុតែយុវជនហុងកុង និងសកម្មជនប្រជាធិបតេយ្យព្រួយបារម្ភនឹងការធ្វើកំណែទម្រង់នយោបាយនៅហុងកុង ជាងការទាមទារលទ្ធិប្រជាធិបតេយ្យឱ្យចិន។ ចិន ដែលបាននិងកំពុងពង្រឹងអំណាច ច្បាមគាបរាល់គ្រប់ទម្រង់នៃការប្រឆាំងនៅហុងកុង។ កាលពីឆ្នាំ២០១៦ ប៉េកាំងបានថែមទាំងបណ្តេញសមាជិកសភាបក្សប្រជាធិបតេយ្យចេញពីអាសនៈបានទៀត និងហាមឃាត់មិនសកម្មជនប្រជាធិបតេយ្យណាម្នាក់ឈរឈ្មោះក្នុងសម័យបោះឆ្នោតសភាមួយភាគទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ