លោកហ្សាវ តុង៖កូរ៉េខាងជើងនឹងកាន់តែរឹងមាំ ទោះជំនួបរវាងលោកគីម និងលោកត្រាំចេញលទ្ធផលអ្វីក៏ដោយ
ជំនួបកំពូលជាប្រវត្តិសាស្រ្តរវាងលោកប្រធានាធិបតីអាមេរិកដូណាល់ ត្រាំ និងមេដឹកនាំកូរ៉េខាងជើងគីម ជុងអ៊ុនបើកធ្វើនៅថ្ងៃអង្គារ ទី១២ មិថុនានេះក្នុងប្រទេសសិង្ហបុរី។ គេនៅមិនទាន់ដឹងថា តើនរណានឹងមានប្រៀបជាងនរណានៅក្នុងជំនួបនេះទេ ហើយគេក៏នៅមិនទាន់ដឹងថា តើនឹងទទួលលទ្ធផលយ៉ាងណាដែរ។ តែបើតាមលោកហ្សាវ តុង អ្នកជំនាញផ្នែកនុយក្លេអ៊ែរនៅវិទ្យាស្ថាន Carnegie បានយល់ឃើញថា ទោះបីជាជំនួបនោះទទួលជោគជ័យ ឬបរាជ័យក៏ដោយ ក៏លោកគីម ជុងអ៊ុនជាអ្នកឈ្នះ និងទទួលបានការគាំទ្របន្ថែម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៦
« សហរដ្ឋអាមេរិកមិនអាចចេញពីជំនួបកំពូល ហើយបញ្ឆេះសង្រ្គាមប្រឆាំងកូរ៉េខាងជើងដោយវាយប្រហារផ្លូវយោធានោះទេ ព្រោះថាក្នុងពេលជាមួយគ្នានេះ កូរ៉េខាងជើងបានបង្កើនទំនាក់ទំនងយ៉ាងស្និតស្នាល និងប្រកបដោយជោគជ័យជាមួយមហាអំណាចផ្សេងនៅក្នុងតំបន់។ ទំនាក់ទំនងជាមួយកូរ៉េខាងត្បូងក្តី ជាមួយចិនក្តី និងជាមួយរុស្ស៊ីក្តី គឺល្អណាស់។
ទន្ទឹមគ្នានេះ កូរ៉េខាងជើងទទួលបានជោគជ័យក្នុងការកសាងខ្លួនឯងជារូបភាពតួអង្គទទួលខុសត្រូវអន្តរជាតិជាមួយនឹងពាក្យសន្យាបោះបង់ចោលការបង្ករឿងផ្លូវយោធា និងបង្ហាញចេញនូវឆន្ទៈក្នុងការបើកចំហទៅកាន់ពិភពខាងក្រៅដើម្បីធ្វើជំនួញ។ នៅក្នុងរចនាបទមួយនេះ ការវាយប្រហារផ្លូវយោធារបស់អាមេរិកលើកូរ៉េខាងជើងនឹងគ្មានអ្នកណាគាំទ្រឡើយ។
ប្រសិនបើកូរ៉េខាងជើងបញ្ឈប់ជាស្ថាពរនូវការសាកល្បងនុយក្លេអ៊ែរ និងការបាញ់សាកល្បងគ្រាប់មីស៊ីលបាលីស្ទិក ចិន និងរុស្ស៊ីប្រាកដជាមិនចេញមុខគាំទ្រទណ្ឌកម្មអន្តរជាតិថ្មីលើកូរ៉េខាងជើងទេ។ ដូច្នេះខ្ញុំគិតថា គំនាបរបស់អាមេរិកលើកូរ៉េខាងជើងបានឈានដល់កម្រិតកំពូលហើយ ហើយតាមយោបល់របស់ខ្ញុំ អាមេរិកគ្មានមធ្យោបាយអ្វីដើម្បីដើម្បីដាក់គំនាបលើកូរ៉េខាងជើងទៀតឡើយ។
គេអាចនិយាយបានថា អាមេរិកប្រហែលជាគ្មានជម្រើសអ្វីផ្សេង ក្រៅពីទទួលយកការដែលកូរ៉េខាងជើងមិនព្រមបោះបង់ចោលនុយក្លេអ៊ែរភ្លាមៗនោះទេ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ