ជប៉ុនបង្កើនថវិកាកងទ័ពដ៏ច្រើនលើសលុបមិនធ្លាប់មាន
ក្រសួងការពារជាតិជប៉ុន នៅថ្ងៃសុក្រទី ៣១សីហា បានដាក់គម្រោងស្នើសុំថវិកា៤៧ពាន់លានដុល្លារ ដើម្បីបំពាក់សព្វាវុធទំនើបៗឲ្យកងទ័ពជប៉ុន។ រដ្ឋាភិបាលជប៉ុន របស់លោកនាយករដ្ឋមន្រ្តីស៊្ហីនហ្សូ អាបេ បានបង្កើនថវិកាការពារជាតិ នៅក្នុងរយៈពេល៧ឆ្នាំជាប់គ្នា នៅក្នុងហេតុផលថា ជប៉ុននៅតែប្រឈមនឹងការគំរាមកំហែងពីចិន ហើយនិងការវាយប្រហារនុយក្លេអ៊ែរពីសំណាក់កូរ៉េខាងជើង។
ចុះផ្សាយនៅថ្ងៃ៖
ស្តាប់ - ០១:៥៥
សម្រាប់ឆ្នាំ ២០១៩ ក្រសួងការពារជាតិជប៉ុនបានទាមទារកញ្ចប់ថវិកា ៤៧ពាន់លានដុល្លារ (ចំនួនដ៏ច្រើនមិនធ្លាប់មាន) ក្នុងគោលដៅពង្រឹងសមត្ថភាពកងទ័ពអាកាស ហើយនិងប្រព័ន្ធខែលមីស៊ីល ដើម្បីប្រឈមទប់ទល់នឹងការគំរាមកំហែងពីចិន និងកូរ៉េខាងជើង។
ជាមួយនឹងការបង្កើនថវិកាការពារជាតិប្រមាណ ២,១%បន្ថែមទៀត ជប៉ុនចង់ពង្រាយបន្ថែមទៀត ប្រព័ន្ធខែលមីស៊ីលដើម្បី អាចការពារពេញផ្ទៃប្រទេសជប៉ុនពីការវាយប្រហារមីស៊ីលរបស់កូរ៉េខាងជើង។ ជារួម ជប៉ុននឹងប្រើថវិកាជាតិដើម្បី ទិញ ប្រព័ន្ធខែលមីស៊ីលដ៏ទំនើបរបស់អាមេរិក ប្រភេទ Aegis Ashore ចំនួនពីរ ទិញ យន្តហោះចម្បាំង F-៣៥ ៦គ្រឿង យន្តហោះរ៉ាដា ស៊ើបយកការណ៍ E-2D Hawkeye ហើយនិងនាវាចម្បាំង ពីរគ្រឿង។ ដោយទាមទារឲ្យដំឡើងថវិកាកងទ័ព ក្រសួងការជាតិជប៉ុនគ្រោងផងដែរ នឹងរើសបុគ្គលិកបន្ថែម៣០នាក់ទៀត សម្រាប់កងទ័ពជើងអាកាសជប៉ុន ដែលរហូតមកដល់ពេលនេះ មានចំនួន ៨៣០នាក់។
ក្រសួងការពារជប៉ុនទាមទារសុំឲ្យដំឡើងបន្ថែមថវិកាការពារជាតិ នៅបន្ទាប់ ពីមានរបាយការណ៍ប្រចាំឆ្នាំរបស់ក្រសួងបានបង្ហាញនៅសប្តាហ៍នេះថា កូរ៉េខាងជើង នៅតែជាប្រភពគំរាមកំហែង ខ្លាំង និងគ្រប់ពេលវេលា មកលើជប៉ុន នោះបើទោះបីជាមានការធូស្រាលផ្នែកការទូត នៅក្រោយជំនួបជាប្រវត្តិសាស្រ្តរវាងមេដឹកនាំកូរ៉េខាងជើង ជាមួយ ប្រធានាធិបតី អាមេរិក កាលពីពាក់កណ្តាលខែមិថុនា។
ជប៉ុនចង់បង្កើនថវិកាការពារជាតិរបស់ខ្លួន ដើម្បីអាចឆ្លើយតប ផងដែរទៅនឹងចិនដែលកំពុងពង្រីកដែនឥទ្ធិពល យោធារបស់ខ្លួន នៅក្នុងតំបន់។ ចិនដែល កំពុងជាប់ជម្លោះដណ្តើមដីកោះជាមួយជប៉ុន នៅ សមុទ្រចិនខាងកើត ទើបតែបានប្រកាសបង្កើនថវិកាកងទ័ពដល់ទៅ ៨% កាលពីខែមីនាកន្លងទៅ។ ដើម្បីធ្វើទំនើបកម្មកងទ័ពរបស់ខ្លួន ដែលធំជាងគេនៅក្នុងពិភពលោក ចិនបានអនុម័តកញ្ចប់ថវិកាការពារជាតិ ប្រមាណ ១៧៥ពាន់លានដុល្លារ សម្រាប់ឆ្នាំ២០១៨៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ