គណៈកម្មាធិការ៖លោកកាឡូស ហ្គោនរំលោភច្បាប់ និងចាយលុយក្រុមហ៊ុននីសាន់ក្នុងប្រយោជន៍ផ្ទាល់ខ្លួន
នៅក្នុងប្រទេសជប៉ុន គណៈកម្មាធិការទទួលបន្ទុកធ្វើកំណែទម្រង់លើអភិបាលកិច្ចក្រុមហ៊ុននីសាន់បានចេញផ្សាយរបាយការណ៍មួយនាថ្ងៃពុធ ទី២៧ មីនា។ នៅក្នុងរបាយការណ៍ គណៈកម្មាធិការបានដាក់ចេញនូវអនុសាសន៍មួយចំនួនដើម្បីកែលំអលើប្រព័ន្ធគ្រប់គ្រងក្រុមហ៊ុននីសាន់ បន្ទាប់ពីមានផ្ទុះរឿងអាស្រូវកេងបន្លំថវិការបស់លោកកាឡូស ហ្គោន អតីតអគ្គនាយកសម្ព័ន្ធក្រុមហ៊ុនផលិតរថយន្តបារាំង-ជប៉ុនម៉ាករឺណូ នីសាន់។ គណៈកម្មាធិការបានអះអាងពីមានភស្តុតាងគ្រប់គ្រាន់ដែលបញ្ជាក់ថា លោកហ្គោនបានបំពានច្បាប់ និងប្រើលុយក្រុមហ៊ុននីសាន់ដើម្បីប្រយោជន៍ផ្ទាល់ខ្លួន។
ចុះផ្សាយនៅថ្ងៃ៖
ស្តាប់ - ០២:២៣
ពិតជាដំណឹងមួយដែលលោកកាឡូស ហ្គោនមិនបានរង់ចាំទាល់តែសោះ ព្រោះនៅក្នុងរបាយការណ៍ដែលមានកម្រាស់ ៣៤ទំព័រ គណៈកម្មាធិការដែលមានសមាជិក ៧រូបបានវាយប្រហារធ្ងន់ៗលើលោកហ្គោនដោយចាត់ទុកជាអ្នកដឹកនាំម្នាក់ប្រើអំណាចផ្តាច់ការដោយសម្រេចកិច្ចការតែម្នាក់ឯងនៅក្នុងក្រុមហ៊ុន និងគ្មានទទួលយកមតិយោបល់ពីនរណាទាំងអស់។ ហើយដើម្បីបិទបាំងនូវទង្វើរំលោភបំពាន និងទង្វើកេងបន្លំរបស់ខ្លួន លោកកាឡូស ហ្គោនបានប្រើសុទ្ធតែមនុស្សជំនិត និងទុកចិត្តនៅក្បែរខ្លួន។ លោកសីឈីរ៉ូ នីស្ហូកា សហប្រធានគណៈកម្មាធិការបានថ្លែងនៅក្នុងសន្និសីទកាសែតនាថ្ងៃផ្សព្វផ្សាយរបាយការណ៍ថា លោកហ្គោនបានបង្កើតស្ថានភាពមួយដែលគេពិបាកនឹងចាប់កំហុសរបស់គាត់បាន ពិសេសគាត់មិនញញើតនឹងបានប្រើលុយបម្រុងរបស់ក្រុមហ៊ុនសម្រាប់អគ្គនាយកដើម្បីប្រយោជន៍ផ្ទាល់ខ្លួន។
ទន្ទឹមនឹងវាយប្រហារខ្លាំងៗលើអតីតអគ្គនាយកសម្ព័ន្ធក្រុមហ៊ុនផលិតរថយន្តបារាំង-ជប៉ុនម៉ាករឺណូ នីសាន់ដែលកំពុងជាប់ឃុំក្នុងផ្ទះនៅជប៉ុនដើម្បីរង់ចាំថ្ងៃកាត់ទោស គណៈកម្មាធិការទទួលបន្ទុកធ្វើកំណែទម្រង់លើអភិបាលកិច្ចក្រុមហ៊ុននីសាន់បានដាក់ចេញនូវអនុសាសន៍មួយចំនួនមានដូចជា លុបចោលតំណែងប្រធានក្រុមប្រឹក្សារដ្ឋបាល និងប្រគល់ឲ្យអ្នកជំនាញឯករាជ្យម្នាក់នៅក្រៅក្រុមហ៊ុនជាអ្នកដឹកនាំកិច្ចប្រជុំក្រុមប្រឹក្សា។ តែរបាយការណ៍ដដែលមិនបាននិយាយដល់ការចរចាស្តីពីការច្របាច់បញ្ចូលគ្នារវាងក្រុមហ៊ុនរឺណូ នីសាន់ដូចដែលមានព័ត៌មានលេចឮនារយៈពេលចុងក្រោយនេះទេ ហើយហាក់បាននិយាយតិចតួចដល់លោកហ៊ីរ៉ូតូ សាយកាវ៉ា អគ្គនាយកក្រុមហ៊ុននីសាន់តាំងពីថ្ងៃទី១ មេសា ឆ្នាំ ២០១៧។
គួររម្លឹកថា លោកហ្គោនបានជាប់ចោទក្នុងបទចោទប្រកាន់ចំនួន ៣ ដែលជាប់ពាក់ព័ន្ធតែនឹងក្រុមហ៊ុននីសាន់មួយគត់ ទី១ កេងបន្លំលុយដោយលាក់រឿងប្រាក់ខែដើម្បីគេចពន្ធនៅចន្លោះឆ្នាំ ២០១០ និង ២០១៥ ក្នុងទឹកប្រាក់ចំនួន ៤០លានអឺរ៉ូ ទី២ កេងបន្លំរឿងប្រាក់ខែដូចគ្នានៅចន្លោះឆ្នាំ ២០១៥ និង ២០១៨ ក្នុងទឹកប្រាក់ជាង ៣៥លានអឺរ៉ូ និងបទចោទប្រកាន់ទី៣ គឺការរំលោភលើសេចក្តីទុកចិត្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ