ព្រុយណេឡើងការពារច្បាប់អ៊ីស្លាម Charia នៅគណៈកម្មការសិទ្ធិមនុស្សរបស់ អ.ស.ប
នៅគណៈកម្មការសិទ្ធិមនុស្សរបស់អង្គការសហប្រជាជាតិ នៅទីក្រុងហ្សឺណែវ ប្រទេសស្វ៊ីស គណៈប្រតិភូព្រុយណេបានចេញមុខការពារច្បាប់អ៊ីស្លាម Charia ដែលមានចែងពីទោសប្រហារជីវិតសម្រាប់អ្នកដែលស្រឡាញ់ភេទដូចគ្នា។ ប្រឈមនឹងរលករិះគន់តវ៉ាពីគ្រប់មជ្ឈដ្ឋានអន្តរជាតិ ព្រះចៅស៊ុលតង់របស់ព្រុយណេ កាលពីថ្ងៃអាទិត្យបានប្រកាសពន្យារ ពេលតទៅទៀត មិនអនុវត្តទោសប្រហារជីវិត នៅព្រុយណេនោះទេ។
ចុះផ្សាយនៅថ្ងៃ៖
ស្តាប់ - ០១:៥៨
ព្រះចៅស៊ុលតង់បានប្រកាសផ្អាក មិនអនុវត្តទោសប្រហារជីវិតមែន ប៉ុន្តែ ច្បាប់អ៊ីស្លាមCharia ដ៏ចម្រូងចម្រាស ដែលមានចែងពីការដាក់ទោសប្រហារជីវិតលើអ្នកដែលស្រឡាញ់ភេទដូចគ្នា ជាប្រធានបទសំខាន់ នៅក្រុមប្រឹក្សាសិទ្ធិមនុស្សរបស់អង្គការសហប្រជាជាតិ។
តាំងពីដើមខែមេសា ព្រុយណេបានចាប់អនុវត្ត ច្បាប់អ៊ីស្លាម Charia ដែលមានចែង ពីទោសប្រហារជីវិត ដោយវាយនឹងរំពាត់ព្រមទាំងគប់ដុំថ្ម រហូតដល់ស្លាប់លើជនណាដែលស្រលាញ់ភេទដូចគ្នា។
នៅថ្ងៃសុក្រម្សិលមិញ នៅក្នុងឱកាសបង្ហាញស្ថានភាពសិទ្ធិមនុស្ស នៅទីក្រុងហ្សឺណែវ គណៈប្រតិភូព្រុយណេ ដឹកនាំដោយអនុរដ្ឋមន្រ្តីការបរទេស លោក Dato Erywan Mohn Yusof បានឡើងការពារ សាជាថ្មី ច្បាប់អ៊ីស្លាម Charia ដែលបើតាមលោក គឺ គ្មានគោលដៅ រើសអើងមនុស្ស ដោយមើលទៅការស្រឡាញ់ភេទដូចគ្នា ឬការគោរពសាសនានោះទេ។
យ៉ាងណាក៏ដោយ បើតាមអនុរដ្ឋមន្រ្តីការបរទេស ព្រុយណេ ទោះជាព្រុយណេមិនចាត់ចូល ការស្រឡាញ់ភេទដូចគ្នា ជាបទឧក្រិដ្ឋ ប៉ុន្តែ ព្រុយណេនៅតែហាមឃាត់ទង្វើបែបនេះ ដើម្បី ការពារសាសនា និងទំនៀមទម្លាប់ប្រពៃណី ដែលមានរហូតមក នៅរាជាណាចក្រព្រុយណេ។
នៅថ្ងៃសុក្រម្សិលមិញ ប្រធានគណៈប្រតិភូព្រុយណេបានបញ្ជាក់សាជាថ្មី ជំហរ របស់ព្រះចៅស៊ុលតង់ ដែលបានពន្យារពេល វិធានការព្យួរ មិនអនុវត្តទោសប្រហារជីវិតនៅព្រុយណេ។ ប្រទេសលោកខាងលិចជាច្រើននៅតែបារម្ភ និងទាមទារឲ្យព្រុយណេចាត់វិធានការជាក់ស្តែង ចំណែកក្រុមការពារអ្នកស្រឡាញ់ភេទដូចគ្នា នៅព្រុយណេវិញ នៅតែមិនទាន់ធូរស្រាលចិត្ត ព្រោះថា ទោះបីជាច្បាប់ ដាក់ទោសប្រហារជីវិតត្រូវបានផ្អាកមិនអនុវត្តមែន ប៉ុន្តែ ច្បាប់នៅតែលើកទឹកចិត្តឲ្យមានការរើសអើង មនុស្សស្រឡាញ់ភេទដូចគ្នានៅព្រុយណេដដែល។ ក្រុមអ្នកការពារសិទ្ធិមនុស្សបានទាមទារឲ្យលុបចោលទាំងស្រុង ច្បាប់រើសអើងអ្នកស្រឡាញ់ ដោយសារគេព្រួយបារម្ភថា ដរាបណា ច្បាប់អ៊ីស្លាម Charia នៅតែចូលជាធរមាន ទោសប្រហារជីវិត លើអ្នកស្រឡាញ់ភេទដូចគ្នា នឹងអាចត្រូវគេអនុវត្តគ្រប់ពេលវេលា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ