ព្រុយណេអនុម័តច្បាប់ព្រហ្មទណ្ឌអ៊ីស្លាមថ្មី
នៅថ្ងៃអង្គារនេះ ប្រទេសព្រុយណេបានសំរេចអនុម័តច្បាប់ព្រហ្មទណ្ឌអ៊ីស្លាមថ្មី ស្របតាមច្បាប់អ៊ីស្លាមដ៏តឹងរ៉ឹង ដែលគេតែងហៅថា Charia នោះ នៅក្នុងប្រទេស។ ច្បាប់នេះចែងថា ករណីមានការផិតក្បត់រវាងស្វាមីនិងភរិយា ស្វាមីរឺក៏ភរិយាដែលជាជនល្មើស នឹងទទួលទោសតាមរយៈការវាយប្រហារដោយគប់ដុំថ្ម។
ចុះផ្សាយនៅថ្ងៃ៖ កែប្រែថ្ងៃទី៖
នៅថ្ងៃអង្គារនេះ ប្រមុខដឹកនាំប្រទេសព្រុយណេ ស៊ុលតង់ អាស្សាណាល បូលក្ចា (Hassanal Bolkiah) បានប្រកាសជាផ្លូវការ នូវការអនុម័តច្បាប់អ៊ីស្លាមដ៏តឹងតែង ដែលគេហៅថា Charia នោះ ក្នុងប្រទេស។ ក្រមព្រហ្មទណ្ឌថ្មីនឹងចូលជាធរមានបន្តិចម្តងៗ ក្នុងពេល៦ខែខាងមុខនេះហើយ។
ច្បាប់អ៊ីស្លាមថ្មីនេះចែងថា ករណីមានការផិតក្បត់រវាងស្វាមីនិងភរិយា ស្វាមីរឺក៏ភរិយាដែលជាជនល្មើស នឹងទទួលទោសតាមរយៈការវាយប្រហារដោយគប់ដុំថ្ម។ លើសពីនេះទៀត ច្បាប់នេះក៏នឹងដាក់ទោសរាល់អ្នកដែលទទួលទានគ្រឿងស្រវឹង រឺក៏ស្ត្រីដែលធ្វើការរំលូតកូនផងដែរ។ ពួកគេទាំងពីរប្រភេទនេះ នឹងទទួលទោសដោយការវាយនឹងរំពាត់។ គួររំលឹកថា ការទទួលទានគ្រឿងស្រវឹងជាបទល្មើសនៅព្រុយណេ។
ក្នុងច្បាប់នេះដែរ អ្វីដែលគេចាប់អារម្មណ៍លើសពីនេះទៀតនោះ គឺថាជនណាដែលជាចោរលួចទ្រព្យសម្បត្តិ នឹងត្រូវទទួលការកាត់ផ្តាច់អវៈយវៈជាក់ជាមិនខាន។
ជាច្រើនឆ្នាំមកនេះ អ្នកច្បាប់ព្រុយណេបានជជែកគ្នាយ៉ាងតឹងសរសៃក អំពីច្បាប់អ៊ីស្លាម Charia នេះ។ ស៊ុលតង់ អាស្សាណាល បូលក្ចា បានលើកឡើងថា ការចូលជាធរមាននៃច្បាប់នេះបង្ហាញពីការបំពេញកាតព្វកិច្ចរបស់ប្រទេសព្រុយណេចំពោះព្រះអាឡា។
ព្រុយណេត្រូវបានគេស្គាល់ថា បានប្រណិបត្តិសាសនាអ៊ីស្លាមខ្ជាប់ខ្ជួនជាងប្រទេសម៉ាឡេស៊ី និងឥណ្ឌូណេស៊ីដែលនៅជិតខាងខ្លួនទៅទៀត។
គួររំលឹកថា ព្រុយណេស្ថិតលើកោះបូណេអូ ជាប្រទេសមួយក្នុងចំណោមប្រទេសអ្នកមានបំផុតលើពិភពលោក។ ប្រជាជនព្រុយណេមានប្រមាណជាង៤សែននាក់។ ប្រជាជនពីរភាគបី កាន់សាសនាអ៊ីស្លាម។ អ្នកកាន់ពុទ្ធសាសនាមានប្រមាណ១៣ភាគរយ ហើយអ្នកប្រណិបត្តិគ្រិស្តសាសនាមាន១០ភាគរយ។
ច្បាប់អ៊ីស្លាមថ្មីនេះ នឹងអនុវត្តចំពោះតែអ្នកកាន់សាសនាអ៊ីស្លាមប៉ុណ្ណោះ ប៉ុន្តែ វាក៏អាស្រ័យទៅតាមករណីជាក់ស្តែងផងដែរ។ ប្រមុខដឹកនាំព្រុយណេ ស៊ុលតង់ អាស្សាណាល បូលក្ចា បានព្យាយាមអោយមានការសំរេចអនុវត្តន៍ច្បាប់នេះ តាំងតែពីឆ្នាំ១៩៩៦មកម្ល៉េះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ