សហរដ្ឋអាមេរិក និងចិនកំពុងបន្តផ្លោងសម្តីដាក់គ្នាយ៉ាងផុសផុលស្តីពីវិបត្តិនៅហុងកុង
នៅថ្ងៃសុក្រ ទី៩ សីហា ក្រសួងការបរទេសសហរដ្ឋអាមេរិកបានបរិហារលើសារព័ត៌មានផ្លូវការចិនដែលបានសរេសររិះគន់លើជំនួបរវាងស្ថានកុងស៊ុលអាមេរិកប្រចាំហុងកុង និងក្រុមសកម្មជនអ្នកប្រជាធិបតេយ្យ។ លោកស្រី Morgan Ortagus អ្នកនាំពាក្យក្រសួងការបរទេសសហរដ្ឋអាមេរិកបានថ្លែងថា អត្ថបទចុះផ្សាយដោយសារព័ត៌មានចិនគ្មានលក្ខណៈទទួលខុសត្រូវ និងប្រកបដោយគ្រោះថ្នាក់។ លោកស្រី Ortagus បានយល់ឃើញថា សារព័ត៌មានផ្លូវការរបស់ចិនត្រូវតែបញ្ឈប់ទង្វើរបៀបនេះ។ គួររម្លឹកថា សង្រ្គាមពាក្យសម្តីរវាងក្រុងវ៉ាស៊ីនតោន និងក្រុងប៉េកាំងបានកើតមានឡើង ខណៈដែលក្រុមបាតុករអ្នកប្រជាធិបតេយ្យហុងកុងកំពុងបន្តប្រឆាំងនឹងរដ្ឋអំណាចហុងកុងដែលនៅមិនព្រមដកសេចក្តីព្រាងច្បាប់ស្តីពីការធ្វើបត្យាប័នជនសង្ស័យទៅកាត់ទោសនៅចិនដីគោក។
ចុះផ្សាយនៅថ្ងៃ៖
ស្តាប់ - ០២:៣៣
« រដ្ឋអំណាចចិនបានដឹងច្បាស់ណាស់ថា ស្ថានកុងស៊ុលរបស់យើងបានត្រឹមបំពេញការងាររបស់ខ្លួនដូចក្រុមមន្រ្តីការទូតរបស់បណ្តាប្រទេសផ្សេងអ៊ីចឹងដែរ » នេះជាប្រតិកម្មរបស់អ្នកនាំពាក្យក្រសួងការបរទេសសហរដ្ឋអាមេរិកលោកស្រីMorgan Ortagus នៅក្នុងបណ្តាញសង្គម Twitter របស់លោកស្រី។ប្រតិកម្មរបស់ក្រសួងការបរទេសសហរដ្ឋអាមេរិកបានធ្វើឡើង មួយថ្ងៃបន្ទាប់ពីក្រសួងការបរទេសចិនបានចុះផ្សាយសេចក្តីប្រកាសព័ត៌មានមួយដោយជំរុញស្ថានកុងស៊ុលសហរដ្ឋអាមេរិកប្រចាំហុងកុងឲ្យឈប់ទាក់ទងជាមួយក្រុមបះបោរប្រឆាំងចិននៅហុងកុងជាបន្ទាន់ និងជំរុញសហរដ្ឋអាមេរិកឲ្យបញ្ឈប់ការលូកដៃចូលជ្រៀតជ្រែកក្នុងកិច្ចការផ្ទៃក្នុងរបស់ហុងកុង។
លោកស្រី Ortagus បានបន្ថែមដោយបញ្ជាក់ថា ចិនមានប្រវត្តិយូរលង់ជាអ្នកមិនបានគោរពពាក្យសន្យារបស់ខ្លួន។ អ្នកនាំពាក្យក្រសួងការបរទេសសហរដ្ឋអាមេរិករូបនេះដដែលបានទាមទារឲ្យចិនគោរពដល់ទីភ្នាក់ងារស្ថានទូត និងស្ថានកុងស៊ុលសហរដ្ឋអាមេរិក និងចាត់វិធានការបញ្ជៀសការវាយប្រហារលើក្រុមមន្រ្តីការទូត មន្រ្តីកុងស៊ុល សេរីភាព ឬសេចក្តីថ្លៃថ្នូររបស់ពួកគេ។ លោកស្រី Ortagus បានអះអាងថា ក្រុមមន្រ្តីការទូតបរទេសទាំងអស់នៅសហរដ្ឋអាមេរិក មានទាំងជនជាតិចិនផងទទួលបានសិទ្ធិសេរីភាពគ្រប់យ៉ាងទាំងអស់។ នៅមុនប្រតិកម្មរបស់លោកស្រី Ortagus ក្រុងវ៉ាស៊ីនតោនក៏បានឆ្លើយតបនឹងអត្ថបទចុះផ្សាយរបស់សារព័ត៌មានផ្លូវការចិនដោយចោទក្រុងប៉េកាំងពីបទមានឥរិយាបទដូចមនុស្សពាល និងបានយាយីលើមន្រ្តីការទូតអាមេរិក។
ចំណែកចិនវិញតាមរយៈការិយាល័យស្នងការនៃក្រសួងការបរទេសចិនប្រចាំហុងកុងបានបញ្ចេញប្រតិកម្មដោយចាត់ទុកការថ្លែងរបស់លោកស្រី Ortagus ថាជាការបង្កាច់បង្ខូចលើប្រទេសចិន និងបានបង្ហាញជាថ្មីនូវកាយវិការជាបងធំរបស់សហរដ្ឋអាមេរិក។ សង្រ្គាមពាក្យសម្តីឆ្លើយឆ្លងរវាងសហរដ្ឋអាមេរិក និងចិនពេលនេះបានធ្វើឡើង ខណៈពេលដែលក្រុមបាតុករអ្នកប្រជាធិបតេយ្យហុងកុងកំពុងបន្តប្រឆាំងនឹងរដ្ឋអំណាចហុងកុងដែលនៅមិនព្រមដកសេចក្តីព្រាងច្បាប់ស្តីពីការធ្វើបត្យាប័នជនសង្ស័យទៅកាត់ទោសនៅចិនដីគោក។ ក្រុងប៉េកាំងបានយល់ឃើញថា ចលនាប្រឆាំងនឹងរដ្ឋាភិបាលហុងកុងពីសំណាក់ក្រុមសកម្មជនអ្នកប្រជាធិបតេយ្យតាំងពី ២ខែកន្លងមកមានការជួយគាំទ្រពីក្រុមប្រទេសបស្ចិមលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ