នៅកូរ៉េខាងត្បូង ប្រធានក្រុមហ៊ុន Kolmar Korea បានធ្វើការសុំទោស និងប្រកាសលាចុះពីតំណែង
នៅថ្ងៃអាទិត្យ ទី១១ សីហា លោកយូន ដុងហាន ប្រធានក្រុមហ៊ុន Kolmar Korea ដែលជាក្រុមហ៊ុនផលិតផលថែរក្សាសម្ផស្សក្នុងប្រទេសកូរ៉េខាងត្បូងបានធ្វើការសុំទោស និងប្រកាសលាឈប់ពីតំណែង។ មូលហេតុ មកពីលោកដុងហានបានទទួលរងការរិះគន់ ទិតៀនយ៉ាងខ្លាំងក្នុងបទបានបង្ខំបុគ្គលិករបស់ក្រុមហ៊ុនលោកឲ្យមើលវីដេអូមួយលើ YouTube ដែលលើកសរសើរពីប្រទេសជប៉ុន។ តែកាយវិការរបៀបនេះរបស់លោកដុងហានបានធ្វើឡើង ខណៈពេលដែលកូរ៉េខាងត្បូង និងជប៉ុនកំពុងមានជម្លោះពាណិជ្ជកម្មរវាងគា្ន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៨
អ្វីៗបានចាប់ផ្តើមនៅក្នុងកិច្ចប្រជុំប្រចាំខែមួយរបស់ក្រុមហ៊ុន Kolmar Korea នាសប្តាហ៍កន្លងទៅដែលមានបុគ្គលិកចូលរួមប្រមាណជា ៧០០នាក់។ នៅក្នុងឱកាសនោះ លោកយូន ដុងហានបានបង្ហាញដល់អ្នកចូលរួមទាំងអស់នូវខ្សែអាត់វីដេអូមួយដែលរិះគន់ ទិតៀនលើសេចក្តីថ្លែងការណ៍របស់ប្រធានាធិបតីកូរ៉េខាងត្បូងលោកមូន ចៃអ៊ីនទាក់ទងនឹងវិធានការពាណិជ្ជកម្មដែលក្រុងតូក្យូបានដាក់លើក្រុងសេអ៊ូល។ ទន្ទឹមគ្នានេះ ខ្សែអាត់វីដែអូដដែលក៏បានលើកសរសើរនាយករដ្ឋមន្រ្តីជប៉ុនលោកស្ហ៊ីនហ្សូ អាបេដែលមានជំហរមិនវាយប្រហារចំមុខលោកមូន ចៃអ៊ីន។
បន្ទាប់មក ខ្សែអាត់វីដេអូក៏បានលើកឡើងពីស្ថានភាពសេដ្ឋកិច្ចដុនដាបនៅក្នុងប្រទេសវ៉េណេស៊ុយអេឡាដែលស្រ្តីបង្ខំចិត្តធ្វើជាស្រីលក់ខ្លួនដើម្បីទទួលបានប្រាក់ ៧ដុល្លារដោយបន្ថែមថា កូរ៉េខាងត្បូងឋិតមិនឆ្ងាយពីវេសនាដូចគ្នានេះទេ។ គឺជាមួយនឹងខ្សែអាត់វីដេអូនេះឯងដែលប្រធានក្រុមហ៊ុន Kolmar Korea លោកយូន ដុងហានបានទទួលរងការរិះគន់ចាស់ដៃពីពលរដ្ឋកូរ៉េខាងត្បូង រួមទាំងការអំពាវនាវមិនឲ្យប្រើប្រាស់ផលិតផលរបស់ក្រុមហ៊ុនទៀតផង។ ទីបំផុតក្នុងថ្ងៃអាទិត្យ ទី១១ សីហា លោកដុងហានបានចេញមុខសុំទោសដល់ពលរដ្ឋកូរ៉េខាងត្បូង និងអ្នកប្រើប្រាស់ផលិតផលរបស់ក្រុមហ៊ុន ពិសេសស្រ្តីភេទ និងបានប្រកាសលាចុះពីតំណែងប្រធានក្រុមហ៊ុន។
សូមរម្លឹកថាកាលពីដើមខែកក្កដាកន្លងទៅ រដ្ឋាភិបាលជប៉ុនបានប្រកាសរឹតបន្តឹងការនាំចេញទៅកាន់កូរ៉េខាងត្បូងនូវវត្ថុធាតុដើមសំខាន់ៗចំនួន ៣មុខដែលក្រុមហ៊ុនកូរ៉េខាងត្បូងត្រូវការចាំបាច់សម្រាប់ផលិតផលិតផលអេឡិចត្រូនិច។ ការរឹតបន្តឹងពីសំណាក់ក្រុងតូក្យូកាលណោះបានធ្វើឡើង បន្ទាប់ពីតុលាការកូរ៉េខាងត្បូងបានចេញសេចក្តីសម្រេចជាបន្តបន្ទាប់ដោយតម្រូវឲ្យក្រុមហ៊ុនជប៉ុនដែលបានប្រើប្រាស់កម្លាំងពលកម្មកូរ៉េដោយបង្ខំនៅក្នុងសម័យសង្រ្គាមត្រូវសងជំងឺចិត្តដល់ជនរងគ្រោះ។ តាំងពីពេលនោះមក ប្រទេសអាស៊ីក្បែរខាងទាំងពីរបានចាត់វិធានការពាណិជ្ជកម្មដាក់គ្នាទៅវិញ ទៅមក។ ក្នុងខែកក្កដាដដែល ក្រុងសេអ៊ូលបានប្រកាសបើកយុទ្ធនាការធ្វើពហិការលើផលិតផលជប៉ុន។ បន្ទាប់មកក្នុងថ្ងៃទី២ សីហា រដ្ឋាភិបាលជប៉ុនក៏បានសម្រេចដកកូរ៉េខាងត្បូងចេញពីបញ្ជីឈ្មោះដៃគូពាណិជ្ជកម្មក្នុងការនាំចេញ។
គួរបញ្ជាក់ថា ទំនាក់ទំនងរវាងជប៉ុន និងកូរ៉េខាងត្បូងដែលជាសម្ព័ន្ធមិត្តរបស់សហរដ្ឋអាមេរិកដូចគ្នាត្រូវបានញាំញីតាំងពីច្រើនទសវត្សមកហើយដោយសារជម្លោះប្រវត្តិសាស្ត្រសល់ពីសម័យដែលឧបទ្វីបកូរ៉េស្ថិតក្រោមអាណានិគមនិយមជប៉ុនពីឆ្នាំ ១៩១០ ដល់ឆ្នាំ ១៩៤៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ