អាជ្ញាធរឥណ្ឌូណេស៊ីកំពុងតាមស្វែងរកយន្តហោះដែលបាត់កាលពីថ្ងៃសុក្រ
នៅថ្ងៃសៅរ៍នេះ អាជ្ញាធរឥណ្ឌូណេស៊ីកំពុងតែបើកធ្វើប្រតិបត្តិការតាមរុករកយន្តហោះដឹកអ្នកដំណើរមួយគ្រឿង ដែលបានបាត់ខ្លួន កាលពីថ្ងៃសុក្រ។ យន្តហោះនេះ គឺជាយន្តហោះធុនតូច មានមនុស្សជិះ ១០នាក់ ហើយត្រូវបាត់ពីរ៉ាដា នៅក្នុងពេលកំពុងហោះហើរដឹកអ្នកដំណើរក្នុងស្រុក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
យន្តហោះដែលបាត់នៅក្នុងប្រទេសឥណ្ឌូណេស៊ី កាលពីថ្ងៃសុក្រនេះ គឺជាយន្តហោះធុន DHC-6 ផលិតនៅកាណាដា មានដឹកអ្នកដំណើរ ៧នាក់ ព្រមទាំងអ្នកបើកបរ និងអ្នកបម្រើការលើយន្តហោះ ៣នាក់។ យោងតាមមន្រ្តីអ្នកនាំពាក្យក្រសួងដឹកជញ្ជូនឥណ្ឌូណេស៊ី យន្តហោះនេះបានបាត់ការទាក់ទង នៅក្រោយពេលហោះចេញពីព្រលានយន្តហោះបាន តែប៉ុន្មាននាទីប៉ុណ្ណោះ ហើយបាត់ការទាក់ទងដោយគ្មានឲ្យសញ្ញាអាសន្នអ្វីទាំងអស់។
អាជ្ញាធរឥណ្ឌូណេស៊ីបានឲ្យដឹងថា ប្រតិបត្តិការតាមស្វែងរកយន្តហោះនេះបានចាប់បើកធ្វើភ្លាមៗ កាលពីថ្ងៃសុក្រ ហើយបានចាប់ផ្តើមធ្វើសាជាថ្មី នៅព្រឹកថ្ងៃសៅរ៍នេះ ដោយមានទាំងការស្វែងរកពីលើអាកាស និងការស្វែងរកនៅលើដី។ យន្តហោះ និងឧទ្ធម្ភាគចក្រជាច្រើនគ្រឿង ព្រមទាំងទាហានជាងមួយរយនាក់ ត្រូវបានដាក់ពង្រាយក្នុងការស្វែងរកយន្តហោះនេះ។
ហេតុការណ៍បាត់យន្តហោះនេះ គឺជាហេតុការណ៍ថ្មីមួយទៀត ដែលមកបន្ថែមលើបញ្ហាសុវត្ថិភាពផ្លូវអាកាសរបស់ឥណ្ឌូណេស៊ី ដែលកំពុងតែមានប្រវត្តិមិនល្អស្រាប់។ គ្រាន់តែក្នុងរយៈពេលមួយឆ្នាំកន្លងទៅនេះ គេឃើញមានគ្រោះថ្នាក់យន្តហោះធំៗចំនួន ៣លើករួចមកហើយ ដែលបានកើតឡើងនៅក្នុងប្រទេសឥណ្ឌូណេស៊ី។ ទីមួយ គឺការធ្លាក់យន្តហោះ AirAsia កាលពីខែធ្នូ ដែលបណ្តាលឲ្យមនុស្សស្លាប់ ១៦២នាក់ ទីពីរ ការធ្លាក់យន្តហោះដឹកអ្នកដំណើរក្នុងស្រុក កាលពីខែសីហា នៅតំបន់ប៉ាពូអាស៊ី ដែលសម្លាប់មនុស្ស ៥៤នាក់ និងទី៣ គឺការធ្លាក់យន្តហោះដឹកជញ្ជូនយោធា ដែលបណ្តាលឲ្យមនុស្សស្លាប់ ១០០នាក់ កាលពីខែមិថុនា។
គួររំឭកឡើងវិញផងដែរថា កាលពីឆ្នាំ២០១៤កន្លងទៅនេះ ឥណ្ឌូណេស៊ីត្រូវបានទីភ្នាក់ងារអាកាសចរណ៍ស៊ីវិលរបស់អ.ស.ប ចាត់បញ្ចូលទៅក្នុងចំណោមប្រទេសដែលជាប់ចំណាត់ថ្នាក់អន់បំផុត ក្នុងវិស័យសុវត្ថិភាពផ្លូវអាកាស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ