រដ្ឋាភិបាលអូស្ត្រាលីក្រោមភ្លើងរិះគន់ពីរឿងចាប់បញ្ជូនទូកជនភៀសខ្លួនស្រីលង្កា
ចុះផ្សាយនៅថ្ងៃ៖
ស្តាប់ - ០៧:២៥
កាលពីព្រឹកថ្ងៃអង្គារទី ៨កក្កដា តុលាការស្រីលង្កាបានបើកសវនការកាត់ទោសជនជាតិស្រីលង្កា៤១ពីបទចាកចេញពីប្រទេសខុសច្បាប់។ ជនជាប់ចោទស្រីលង្កាដែលមានទាំងស្រ្តី និងកុមារផងដែរនោះ ត្រូវបានអាជ្ញាធរអូស្ត្រាលីចាប់បញ្ជូនត្រលប់មកស្រីលង្កាវិញកាលពីថ្ងៃអាទិត្យ ទី ៦កក្កដា។ មួយសប្តាហ៍មកហើយ អង្គការការពារសិទ្ធិមនុស្សបានឈ្លេចសួររដ្ឋាភិបាលអូស្ត្រាលី ពីជោគវាសនាទូកដឹកជនភៀសខ្លួនស្រីលង្កា ដែលបានបាត់ខ្លួន នៅក្នុងសមុទ្រក្បែរប្រទេសអូស្ត្រាលី ប៉ុន្តែ អាជ្ញាធរអូស្ត្រាលីមិនបញ្ចេញព័ត៌មានអ្វីទាំងអស់។ រដ្ឋាភិបាលអូស្រ្តាលីក៏បានទទួលស្គាល់ថា ខ្លួនបានបញ្ជូនទូកជនភៀសខ្លួនទៅស្រីលង្កាវិញ។ ការប្រកាសនេះបានធ្វើឲ្យ តុលាការអូស្ត្រាលីបានចេញដីការ កាលពីថ្ងៃចន្ទ ហាមមិនឲ្យរដ្ឋាភិបាលអូស្ត្រាលីចាប់បញ្ជូនទូកជនភៀសខ្លួនមួយទៀត ដែលមានដឹកមនុស្ស១៥១នាក់ ទៅប្រទេសស្រីលង្កា និងដែលអាជ្ញាធរអូស្ត្រាលីកំពុងចាប់ឃាត់ខ្លួន។ នៅថ្ងៃអង្គារតុលាការអូស្ត្រាលីត្រូវបើកសវនការដើម្បីពិនិត្យលើចំណាត់ការរបស់រដ្ឋាភិបាលក្នុងការបញ្ជូនជនភៀសខ្លួនស្រីលង្កា។
រដ្ឋាភិបាលអូស្ត្រាលីកំពុងរងរលករិះគន់ ដោយសារតែភាពពុតត្បុត និងចំណាត់ការតឹងរ៉ឹង គ្មានលក្ខណៈមនុស្សធម៌របស់ខ្លួន។ នៅសប្តាហ៍កន្លងទៅនេះ អង្គការជាច្រើនបានតវ៉ាពីរឿងបាត់ទូកជនភៀសខ្លួនស្រីលង្កា ដែលបានចាកចេញពីស្រីលង្កា តាំងពីខែមិថុនា ដើម្បីសំដៅទឹកដីអូស្ត្រាលី។ ប៉ុន្តែ រដ្ឋាភិបាលអូស្ត្រាលីខំលាក់ មិនប្រាប់ថា ខ្លួនចាប់បញ្ជូនទូកជនភៀសខ្លួនទៅស្រីលង្កាទេ។
វិធានការចាប់បញ្ជូនទូកជនភៀសខ្លួន បានបង្កឲ្យមានការរិះគន់ខ្លាំង ព្រោះថា អាជ្ញាធរអូស្ត្រាលីបានសម្រេចអនាគតជនភៀសខ្លួននៅលើសមុទ្រ ដោយមិនរង់ចាំឲ្យជនភៀសខ្លួនដាក់ជើងជាន់ដីអូស្ត្រាលីសិន។ នៅក្នុងពេលចាប់ស្ទាក់ទូករបស់ជនភៀសខ្លួន អាជ្ញាធរអូស្ត្រាលីបានសម្រេចភ្លាមៗ បញ្ជូនពួកគេឲ្យត្រលប់ទៅប្រទេសកំណើតវិញ ដោយមិនសាកសួរថា តើពួកគេអាចរងគ្រោះនៅពេលត្រលប់ទៅប្រទេសវិញដែរឬទេ។ តាមប្រធានអង្គការសហប្រជាជាតិទទួលបន្ទុកជនភៀសខ្លួន គេនឹងបើកការស៊ើបអង្កេត តាមដានមើលថា តើរដ្ឋាភិបាលអូស្ត្រាលីមានបានគោរពច្បាប់អន្តរជាតិស្តីពីជនភៀសខ្លួនដែរឬទេ។ អូស្ត្រាលីត្រូវគោរពច្បាប់អន្តរជាតិស្តីពីជនភៀសខ្លួន ដោយសន្យាថា នឹងសួរព័ត៌មានជុំវិញហេតុផលដែលជំរុញឲ្យជនភៀសខ្លួនចាកចេញប្រទេសខ្លួន និងចង់សុំសិទ្ធិជ្រកកោននៅក្នុងទឹកដីអូស្រ្តាលី។
នៅព្រឹកថ្ងៃអង្គារ នៅក្នុងសវនការនៅប្រទេសស្រីលង្កា ជនភៀសខ្លួនម្នាក់ដែលត្រូវអូស្ត្រាលីចាប់បញ្ជូនមកវិញ បាននិយាយថា គេនឹងប្តឹងរដ្ឋាភិបាលអូស្ត្រាលី ពីបទធ្វើបាប និងមើលងាយដល់ជនភៀសខ្លួននៅលើទូក។ តាមជនរងគ្រោះ ដែលអាជ្ញាធរស្រីលង្កាកំពុងឃុំខ្លួន អាជ្ញាធរអូស្ត្រាលីគ្មានលក្ខណៈមនុស្សធម៌បន្តិចទេ ព្រោះគេបានផ្តល់អាហារផ្អូម ឬព្រងើយកន្តើយមិនជួយព្យាបាលស្រ្តីម្នាក់ដែលកើតគ្រុនក្តៅ នៅលើទូក ក្នុងសប្តាហ៍កន្លងទៅ។ ជនរងគ្រោះស្រីលង្កានៅបាននិយាយថា អាជ្ញាធរអូស្ត្រាលីមិនបានខ្វល់សួរសំណួរអ្វីទេ គឺគេចង់តែចាប់បញ្ជូនឲ្យត្រលប់មកវិញតែប៉ុណ្ណោះ និងមិនខ្វល់ខ្វាយពីជោគវាសនារបស់អ្នកដែលធ្លាប់រត់គេចពីអំពើហិង្សានៅស្រីលង្កាទេ។
កាលពីចន្ទម្សិលមិញ រដ្ឋាភិបាលអូស្រា្តលីទទួលស្គាល់ ថា ខ្លួនពិតជាបានចាប់បញ្ជូនទូកជនភៀសខ្លួនស្រីលង្កាទៅឲ្យអាជ្ញាធរស្រីលង្កា។ អង្គការការពារសិទ្ធិមនុស្សចំនួនបារម្ភថា ជនជាតិតាមីល ដែលធ្លាប់រងគំរាមកំហែងពីទាហានស្រីលង្កា និងដែលស្ថិតនៅក្នុងចំណោមជនភៀសខ្លួនក្នុងទូកនោះ នឹងអាចត្រូវរងការធ្វើទុក្ខបុកម្នេញ បើសិនជាត្រូវគេបញ្ជូនឲ្យត្រលប់ទៅស្រីលង្កាវិញ។ និយាយបែបម្យ៉ាង គឺចាប់បញ្ជូនជនតាមីលឲ្យត្រលប់ទៅស្រុកស្រីលង្កាវិញ គឺមិនខុសអ្វីពីចាប់បញ្ជូនជនរងគ្រោះឲ្យត្រលប់ទៅរងការធ្វើបាបពីក្រុមពេជ្ឈឃាត ដែលពួកគេបានរត់គេចចេញនោះទេ។ នេះហើយជានយោបាយគ្មានមនុស្សធម៌របស់រដ្ឋាភិបាលអូស្ត្រាលី។
រដ្ឋាភិបាលអូស្ត្រាលី មិនថា មុន ឬរដ្ឋាភិបាលបច្ចុប្បន្ន បានអនុវត្តនយោបាយតឹងរ៉ឹងសម្រាប់ទទួលជនភៀសខ្លួន។ នាយករដ្ឋមន្រ្តីអូស្រ្តាលីមុនចរចាជាមួយរដ្ឋាភិបាល ប្រទេសប៉ាពូអាស៊ីនូវេលហ្គីណេ និងកោះណូរុ ដើម្បីទទួលជនភៀសខ្លួនដែលចង់ចូលទឹកដី អូស្ត្រាលី។ ជនភៀសខ្លួនទាំងអស់ដែលធ្វើដំណើរតាមទូក ចង់សុំសិទ្ធិជ្រកកោននៅ អូស្ត្រាលីត្រូវអាជ្ញាធរអូស្ត្រាលី ស្ទាក់ចាប់នៅក្នុងសមុទ្រ និងត្រូវបញ្ជូនភ្លាម ឲ្យទៅនៅជំរំក្នុងប្រទេសប៉ាពូអាស៊ីនូវេលហ្គីណេ ដោយមិនទុកឲ្យពួកគេអាចជាន់ទឹកដីអូស្ត្រាលីទាន់។ នៅក្នុងជំរំ ជនភៀសខ្លួនត្រូវរង់ចាំចម្លើយថា តើពួកគេនឹងអាចទទួលសិទ្ធិជ្រកកោននៅក្នុងទឹកដីអូស្រាលី ប៉ុន្តែ ជាញឹកញយពួកគេត្រូវអូស្ត្រាលីបដិសេធ និងបញ្ជូនត្រលប់ទៅប្រទេសដើមវិញ។
រដ្ឋាភិបាលអូស្ត្រាលីថ្មីរបស់លោកតូនី អាប៊តបានពង្រឹងនយោបាយទទួលជនភៀសខ្លួន ដោយបានបន្ថែមតួនាទីកងទ័ពឲ្យទទួលបន្ទុកស្ទាក់ចាប់ទូកជនភៀសខ្លួន និងចាប់បញ្ជូនទៅប្រទេសឥណ្ឌូណេស៊ី ដែលជាប្រភពចេញដំណើរភាគច្រើនរបស់ទូកជនភៀសខ្លួន។ កប៉ាល់ល្បាតរបស់អូស្ត្រាលីត្រូវបានពង្រាយនៅសមុទ្រ និងប្រតិបត្តិការស្ទាក់រាល់ទូកដែលគេសង្ស័យដឹកមនុស្សចូលអូស្ត្រាលី។ ឥណ្ឌូណេស៊ីខឹងអន់ចិត្តនឹងអូស្ត្រាលី និងចោទថា បានចូលរំលោភញឹកញយក្នុងដែនទឹករបស់ខ្លួន។ អង្គការអ្នកការពារសិទ្ធិមនុស្ស វាយតម្លៃថា ប្រតិបត្តិការរបស់រដ្ឋាភិបាលអូស្ត្រាលីបានធ្វើឲ្យប៉ះពាល់យ៉ាងខ្លាំង ដល់ជនភៀសខ្លួន ទាំងរូបកាយ និងផ្លូវចិត្ត។
នៅអូស្ត្រាលី បើទោះបី ជាមានមតិរិះគន់ទៅលើសកម្មភាពរឹតបន្តឹងទៅលើជនភៀសខ្លួន ប៉ុន្តែ ប្រជាជនអូស្ត្រាលីភាគច្រើន គឺប្រមាណ ៦០ភាគរយគាំទ្ររដ្ឋាភិបាល។ ពួកគេចង់ឲ្យរដ្ឋាភិបាលរឹតបន្តឹងកុំឲ្យជនភៀសខ្លួនហូរចូលមកក្នុងប្រទេសអូស្ត្រាលី។ ប្រជាជនអូស្ត្រាលីជាច្រើនមើលឃើញជនភៀសខ្លួន ជាអ្នកគំរាមកំហែង ដណ្តើមផលប្រយោជន៍សេដ្ឋកិច្ចពីខ្លួន។
អូស្ត្រាលីមានប្រជាជន២៣លាននាក់ រស់នៅលើទំហំដី ជាង ៧លានគីឡូម៉ែត្រការ៉េ។ អូស្ត្រាលីដែលបង្កើតឡើងដោយបណ្តុំជនបរទេស ពីប្រទេសលោកខាងលិច ចាប់ផ្តើមពង្រឹងនយោបាយទទួលជនភៀសខ្លួន។ អូស្ត្រាលីជាទឹកដីសុបិន្តរបស់ជនភៀសខ្លួនអាហ្វហ្កានីស្ថាន អ៊ីរ៉ង់ អ៊ីរ៉ាក់ និងប្រជាជននៅអាស៊ី ជាពិសេស ស្រីលង្កា ដែលបានធ្វើដំណើរតាមទូកចូលទៅសុំសិទ្ធិជ្រកកោន នៅអូស្ត្រាលី។ ចំនួនទូកដឹកជនភៀសខ្លួនសំដៅអូស្ត្រាលីបានកើនខ្លាំងពីឆ្នាំ ២០១២មក។ តាមតួលេខផ្តល់ដោយរដ្ឋាភិបាលអូស្ត្រាលី ទូកដឹកជនភៀសខ្លួនសំដៅអូស្រ្តាលីមានតឹ្រមជាង៧ពាន់ នៅចន្លោះឆ្នាំ ២០១១និងឆ្នាំ ២០១២ ប៉ុន្តែ ចំនួននេះបានកើនឡើងដល់ទៅជាង ១៨ ០០០ នៅឆ្នាំ ២០១៣។ តាមជំនាញ ជនភៀសខ្លួន ធ្វើដំណើរផ្សងព្រេង កាន់តែច្រើន ទៅអូស្ត្រាលី ដោយសារតែសង្រ្គាមនិងអស្ថិរភាព នយោបាយ នៅ ប្រទេសអាហ្វហ្កានីស្ថាន ឬការធ្វើទុកបុកម្នេញរបស់អាជ្ញាធរស្រីលង្កាដែលកំពុងសងសឹកទៅលើប្រជាជនតាមីល នៅក្រោយចប់សង្រ្គាមស៊ីវិល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ