អឺរ៉ុបចាប់បង្ខំដៃអេស្ប៉ាញឲ្យខ្ចីលុយ
ចុះផ្សាយនៅថ្ងៃ៖
ស្តាប់ - ០៨:៣២
រដ្ឋមន្រ្តីសេដ្ឋកិច្ចតំបន់អឺរ៉ូនឹងជួបប្រជុំគ្នា តាមទូរស័ព្ទ នៅល្ងាចថ្ងៃសៅរ៍ ទី ៩មិថុនា ដើម្បីនិយាយពីបញ្ហាប្រទេសអេស្ប៉ាញ។ រដ្ឋមន្រ្តីតំបន់អឺរ៉ូកំពុងរង់ចាំចម្លើយពីរដ្ឋាភិបាលអេស្ប៉ាញដែលចង់សុំខ្ចីលុយយកទៅជួយស្រោចស្រង់ធនាគាររបស់ខ្លួន។ ប៉ុន្តែ រហូតមកដល់ពេលនេះ អេស្ប៉ាញនៅមិនទាន់ផ្តល់ចម្លើយយ៉ាងណាទេ។ រដ្ឋមន្រ្តីសេដ្ឋកិច្ចអេស្ប៉ាញវិញបានបញ្ជាក់ថា ខ្លួនមិនបានដឹងពីកិច្ចប្រជុំតាមទូរស័ព្ទ នៅថ្ងៃសៅរ៍នេះទេ។
ជាផ្លូវការ អេស្ប៉ាញ មិនទាន់បានហារមាត់សុំខ្ចីលុយពីតំបន់អឺរ៉ូទេ។ នៅថ្ងៃសៅរ៍នេះ អ្នកនាំពាក្យរដ្ឋាភិបាលអេស្ប៉ាញបាននិយាយថា អេស្ប៉ាញនៅរក្សាជំហររបស់ខ្លួន ដូចកាលពីថ្ងៃសុក្រម្សិលមិញ គឺអេស្ប៉ាញមិនទាន់សម្រេចសុំខ្ចីលុយពីខាងក្រៅទេ ព្រោះថា អេស្ប៉ាញនៅចង់រង់ចាំរបាយការណ៍ធ្វើសវនកម្មទៅលើវិស័យធនាគាររបស់ខ្លួនជាមុនសិន។ អេស្ប៉ាញទើបបានបញ្ជាឲ្យមានការត្រួតពិនិត្យ និងសិក្សាទៅលើតម្រូវការជាក់ស្តែងនៃសាច់ប្រាក់ដែលធនាគារអេស្ប៉ាញត្រូវការ។ សវនកម្មនឹងបញ្ចប់នៅថ្ងៃទី ២១មិថុនាខាងមុខនេះ។
តាមមូលនិធិរូបិយវត្ថុអន្តរជាតិ IMF ដែលបានចេញរបាយការណ៍របស់ខ្លួនមុនកំណត់ កាលពីថ្ងៃសុក្រ ថា ធនាគារនៅអេស្ប៉ាញត្រូវការយ៉ាងតិច៤០ពាន់លានអឺរ៉ូដើម្បីអាចយកទៅបំពេញការខ្វះខាតរបស់ខ្លួន។ ប៉ុន្តែ អ្នកវិភាគផ្សេងទៀតវាយតម្លៃថា ធនាគារអេស្ប៉ាញត្រូវការលុយប្រមាណ ពី៨០ ទៅ ១០០ពាន់លានអឺរ៉ូដើម្បី អាចយកទៅទប់ទល់ការខាតបង់របស់ខ្លួន។ នៅក្នុងសប្តាហ៍នេះ ធនាគារធំទីបីរបស់អេស្ប៉ាញ Bankiaបានសុំខ្ចីលុយពីរដ្ឋប្រមាណ ២៣ពាន់លានអឺរ៉ូដើម្បីបង្រ្គប់តម្រូវការរបស់ខ្លួន។
ធនាគារអេស្ប៉ាញដែលរងគ្រោះដោយវិបត្តិអចលនទ្រព្យ អាចខាតបង់ប្រាក់ពី ៨០ ទៅ ១១២ពាន់លានអឺរ៉ូ នោះ គឺដោយសារតែអ្នកដែលខ្ចីលុយយកទៅវិនិយោគលើអចលនទ្រព្យ គ្មានលុយសងធនាគារមកវិញ ដោយសារតែវិបត្តិលក់ផ្ទះសម្បែងមិនចេញនៅអេស្ប៉ាញ ចាប់តាំងពីឆ្នាំ ២០១០។
អេស្ប៉ាញធ្លាប់បានការជួយជ្រោមជ្រែងពីធនាគារកណ្តាលអឺរ៉ុបដែលសុខចិត្តទិញមូលប័ត្របំណុលរបស់អេស្ប៉ាញ ដែលធ្វើឲ្យអេស្ប៉ាញរួចផុត មិនត្រូវការជំនួយពី អឺរ៉ុបរហូតមក។ ប៉ុន្តែ នៅដើមឆ្នាំនេះ ធនាគារកណ្តាលអឺរ៉ុបបានសម្រេចឈប់ទិញមូលប័ត្របំណុលរបស់អេស្ប៉ាញ។ កាលពីថ្ងៃព្រហស្បតិ៍ ទីភ្នាក់ងារ វាយតម្លៃហានិភ័យ ឈ្មោះFitch បានទម្លាក់ចំណាត់ថ្នាក់ទៅលើបំណុលរដ្ឋអេស្ប៉ាញ ដោយតែទីភ្នាក់ងារមើលឃើញពីគ្រោះថ្នាក់របស់ធនាគារដែលបង្កដោយវិបត្តិអចលនទ្រព្យ និងដោយគេភ័យខ្លាចឆ្លងវិបត្តិក្រិកមកអេស្ប៉ាញ។
ដំណឹងនេះបានធ្វើឲ្យតម្លៃការប្រាក់ដែលអេស្ប៉ាញខ្ចីពីអ្នកវិនិយោគ បានកើនឡើងខ្ពស់ ដល់ទៅ ជាង ៦,១ភាគរយ នៅត្រឹមថ្ងៃសុក្រម្សិលមិញ។ ធម្មតាទេ ការទម្លាក់ចំណាត់ថ្នាក់មានន័យថា ហានិភ័យបំណុលរបស់អេស្ប៉ាញមានច្រើន ដែលធ្វើឲ្យអ្នកវិនិយោគ ដែលជាជាម្ចាស់បំណុលរារែក លែងចង់ឲ្យខ្ចីលុយ ឬបើឲ្យខ្ចីតែជាមួយការប្រាក់ខ្ពស់។ ដោយសារតែអេស្ប៉ាញឥលូវពិបាករកប្រាក់ខ្ចី (ជាមួយការប្រាក់ទាប) ពីអ្នកវិនិយោគ ទើបធ្វើឲ្យគេវាយតម្លៃថា អេស្ប៉ាញអាចនឹងងាកមកខ្ចីលុយពីតំបន់អឺរ៉ូ។
អេស្ប៉ាញនៅរារែកមិនទាន់ហារមាត់ខ្ចីលុយពីអឺរ៉ុបភ្លាម ព្រោះរដ្ឋាភិបាលអេស្ប៉ាញគិតថា ការទៅពឹងសុំជំនួយពីខាងក្រៅ គឺដូចជាអេស្ប៉ាញអន់ពេក។ អេស្ប៉ាញជាប់លេខមួយនៅអឺរ៉ុបខាងប្រទេសសំបូរអ្នកគ្មានការងារធ្វើច្រើន (២៤ភាគរយនៃប្រជាជនសរុប) មែន ប៉ុន្តែ រហូតមកដល់ពេលនេះ អេស្ប៉ាញនៅតែអាចដោះស្រាយបញ្ហាដោយខ្លួនឯង ដោយមិនចាំបាច់ជំនួយពីអឺរ៉ុប នោះគឺដោយបានមកពីកំណើនសេដ្ឋកិច្ចប៉ុន្មានឆ្នាំជាប់ មុនវិបត្តិសេដ្ឋកិច្ចកើតឡើង ឆ្នាំ ២០០៨។ ប៉ុន្តែ បច្ចុប្បន្ននេះ បើទោះជាបានធ្វើផែនការរឹតត្បិតថវិកា អេស្ប៉ាញកំពុងខ្វាយខ្វល់ក្នុងការកាត់បន្ថយឧុនភាពសាធារណៈឲ្យបានត្រឹម ៥,៣ភាគរយ នៅឆ្នាំនេះ និងតិចជាង៣ភាគរយ មុននៅឆ្នាំ ២០១៤ ទៅតាមការទាមទាររបស់អឺរ៉ុប។ នេះគេនៅមិនទាន់រាប់បញ្ចូលពីការដើរថយនៃកំណើនសេដ្ឋកិច្ចដែលគេប៉ាន់ថា មានប្រមាណ ១,៧ភាគរយសម្រាប់ឆ្នាំ ២០១១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ