ដំណោះស្រាយវិបត្តិបំណុលអឺរ៉ុប៖ កាត់បន្ថយការចំណាយ ឬជំរុញកំណើនសេដ្ឋកិច្ច?
ប្រមុខដឹកនាំនៅអឺរ៉ុបកំពុងតែខ្វែងគំនិតគ្នា អំពីថា តើគេត្រូវចាត់វិធានការអ្វី ដើម្បីដោះស្រាយវិបត្តិប្រាក់បំណុលបច្ចុប្បន្ន? អាល្លឺម៉ង់ទាមទារឲ្យរដ្ឋជាសមាជិកទាំងអស់ផ្តោតលើការកាត់បន្ថយការចំណាយសាធារណៈ។ ចំណែកលោក François Hollande វិញ ដែលជាប្រធានាធិបតីបារាំង ទើបនឹងជាប់ឆ្នោតថ្មី ទាមទារឲ្យអឺរ៉ុបផ្តោតលើការជំរុញកំណើនសេដ្ឋកិច្ច។ តើអឺរ៉ុបត្រូវជ្រើសរើសយកផ្លូវមួយណា?
ចុះផ្សាយនៅថ្ងៃ៖
ស្តាប់ - ០៨:៤៧
ហេតុផលរបស់អ្នកគាំទ្រការកាត់បន្ថយការចំណាយសាធារណៈ
ការកាត់បន្ថយការចំណាយសាធារណៈ ក៏អាចមានផងដែរ ការដំឡើងពន្ធដារ ដើម្បីដំឡើងលុយចំណូលរដ្ឋ។ វិធានការទាំងនេះអាចជួយឲ្យរដ្ឋកាត់បន្ថយឧនភាពថវិកាជាតិ ពោលគឺ ការចំណាយប្រចាំឆ្នាំ ដែលមានបរិមាណហួសពីប្រាក់ចំណូល។
អស់រយៈពេលជាច្រើនឆ្នាំមកហើយ ដែលរដ្ឋាភិបាលនៅក្នុងតំបន់ចាយលុយអឺរ៉ូនាំគ្នាចាយលុយច្រើនហួសពីចំណូល ដែលបានមកពីការប្រមូលពន្ធ ហើយត្រូវខ្ចីលុយគេ ដើម្បីបង្រ្គប់ការចំណាយ។ គេចេះតែនាំគ្នាបន្តធ្វើបែបនេះជារៀងរាល់ឆ្នាំ។ បំណុលចាស់មិនទាន់សងរួច ហើយត្រូវខ្ចីបំណុលថ្មីបន្ថែមទៀត ធ្វើឲ្យបំណុលត្រូវកើនឡើងកប់ពពក។ បូករួមជាមួយនឹងវិបត្តិសេដ្ឋកិច្ចពិភពលោក ឆ្នាំ២០០៨ ដែលធ្វើឲ្យកំណើនសេដ្ឋកិច្ចធ្លាក់ចុះ ហើយរដ្ឋត្រូវបាត់បង់ចំណូលពីការប្រមូលពន្ធ ឧនភាពថវិកាជាតិក៏កាន់តែកើនឡើងថែមទៀត។ អ្នកវិនិយោគក៏ចាប់ផ្តើមរារែកលែងហ៊ានប្រថុយប្រថានឲ្យលុយរដ្ឋខ្ចី ឬឲ្យខ្ចីដោយយកអត្រាការប្រាក់ខ្ពស់។ តំបន់ចាយលុយអឺរ៉ូទាំងមូលត្រូវធ្លាក់ក្នុងវិបត្តិប្រាក់បំណុល។
ដូច្នេះ ដើម្បីងើបផុតពីវិបត្តិប្រាក់បំណុល ហើយអាចខ្ចីលុយពីទីផ្សារហិរញ្ញវត្ថុ ក្នុងអត្រាការប្រាក់ទាបសមរម្យឡើងវិញ ប្រទេសក្នុងតំបន់ចាយលុយអឺរ៉ូ ចាំបាច់ត្រូវតែនាំគ្នាកាត់បន្ថយការចំណាយសាធារណៈ។
ហេតុផលរបស់អ្នកប្រឆាំងនឹងការកាត់បន្ថយការចំណាយសាធារណៈ
ការកាត់បន្ថយការចំណាយសាធារណៈធ្វើឲ្យប្រជាជននាំគ្នាបះបោរតវ៉ា ពីព្រោះថា វិធានការទាំងនេះភាគច្រើននាំទៅរកការកាត់បន្ថយសេវាកម្មសាធារណៈ កាត់បន្ថយប្រាក់ខែ និងចំនួនបុគ្គលិករដ្ឋ កាត់បន្ថយប្រាក់សោធននិវត្តន៍ ឬដំឡើងអាយុចូលនិវត្តន៍ ។ល។
ម្យ៉ាងទៀត ការកាត់បន្ថយការចំណាយសាធារណៈនឹងនាំទៅរកការធ្លាក់ចុះនៃការចំណាយរបស់ប្រជាជនជាទូទៅ។ តម្រូវការទីផ្សារក្នុងស្រុកធ្លាក់ចុះ ដែលជាហេតុនាំឲ្យប៉ះពាល់ដល់សកម្មភាពសេដ្ឋកិច្ច។ ក្រុមហ៊ុន សហគ្រាសត្រូវកាត់បន្ថយបុគ្គលិក ឬបិទទ្វារឈប់រកស៊ី។ អ្នកអត់ការងារធ្វើត្រូវកើនឡើង។ អ្នកដែលនៅមានការងារធ្វើ ហើយមានប្រាក់ចំណូល ក៏នាំគ្នាទុកលុយមិនហ៊ានចាយ ដោយសារតែបារម្ភខ្លាចថ្ងៃណាមួយត្រូវបាត់បង់ការងារធ្វើដែរ។
ទាំងនេះបង្កជាឧបសគ្គរារាំងសេដ្ឋកិច្ចមិនឲ្យមានកំណើន។ នៅពេលផលិតផលក្នុងស្រុកសរុបធ្លាក់ចុះ ប្រាក់ចំណូលរបស់រដ្ឋ ដែលបានពីការប្រមូលពន្ធក៏ត្រូវធ្លាក់ចុះដែរ។ លើសពីនេះទៅទៀត ចំនួនអ្នកអត់ការងារធ្វើកើនឡើងខ្លាំង ត្រូវក្លាយជាបន្ទុករបស់រដ្ឋ ដែលត្រូវបង្កើនការចំណាយផ្នែកសង្គមកិច្ច។
លទ្ធផលចុងក្រោយ ឧនភាពថវិកាជាតិមិនអាចកាត់បន្ថយបាន ហើយបំណុលក៏នៅតែមិនអាចកាត់បន្ថយបានដដែល។ រីឯស្ថានភាពសេដ្ឋកិច្ចវិញ កាន់តែអាក្រក់ឡើង ពីមួយថ្ងៃ ទៅមួយថ្ងៃ។
តើមានផ្លូវណាផ្សេង?
ដោយមើលទៅលើទំហំនៃប្រាក់បំណុលរដ្ឋ ដែលមានទំហំច្រើនសន្ធឹកសន្ធាប់ នៅពេលនេះ ប្រទេសក្នុងតំបន់ចាយលុយអឺរ៉ូចៀសមិនរួចពីការកាត់បន្ថយការចំណាយសាធារណៈនោះទេ។ ក៏ប៉ុន្តែ គេក៏មិនអាចផ្តោតតែទៅលើការកាត់បន្ថយការចំណាយសាធារណៈនេះដែរ។
អឺរ៉ុបក៏ត្រូវគិតគូរផងដែរ ក្នុងការចាត់វិធានការជំរុញកំណើនសេដ្ឋកិច្ច ពីព្រោះថា នៅពេលណាសេដ្ឋកិច្ចកើនឡើង ចំណូលរដ្ឋ ដែលបានពីការប្រមូលពន្ធក៏អាចកើនឡើងដែរ។ ដូច្នេះ វាអាចជួយឲ្យរដ្ឋអាចកាត់បន្ថយឧនភាពថវិកាជាតិបាន។
និយាយជារួម អឺរ៉ុបត្រូវស្វែងរកចំណុចកណ្តាលមួយ ដោយមិនត្រូវកាត់បន្ថយការចំណាយច្រើនហួសហេតុពេក រហូតដល់ធ្វើឲ្យរារាំងដល់កំណើនសេដ្ឋកិច្ចនោះទេ។ មុខចំណាយមួយចំនួន ដែលមានប្រយោជន៍ក្នុងការវិនិយោគជំរុញកំណើនសេដ្ឋកិច្ច គេគួរតែរក្សាទុក។
តើរដ្ឋបានលុយមកពីណាមកចំណាយ ដើម្បីជំរុញកំណើនសេដ្ឋកិច្ច?
តាមសំណើរបស់លោក François Hollande លុយចំណាយក្នុងការធ្វើវិនិយោគ ដើម្បីជំរុញកំណើនសេដ្ឋកិច្ច គួរត្រូវផ្តល់ដោយអឺរ៉ុប តាមរយៈធនាគារវិនិយោគរបស់សហភាពអឺរ៉ុប (European Investment Bank) និងតាមរយៈការចុះមូលបត្របំណុលរួម (Eurobond)។
ធនាគារកណ្តាលអឺរ៉ុបក៏ត្រូវតែចេញមុខធ្វើអន្តរាគមន៍ដែរ ដើម្បីជួយដល់ប្រទេសជាសមាជិកណា ដែលជួបបញ្ហាហិរញ្ញវត្ថុ។
គួរបញ្ជាក់ថា ខុសពីធនាគារកណ្តាលជាទូទៅ ដូចជា នៅអាមេរិក អង់គ្លេស និងជប៉ុន ជាដើម ធនាគារកណ្តាលអឺរ៉ុបមិនអាចបញ្ចេញលុយមកឲ្យរដ្ឋជាសមាជិកខ្ចីនោះទេ ទោះបីជារដ្ឋទាំងនោះជួបបញ្ហាមិនអាចខ្ចីលុយពីទីផ្សារហិរញ្ញវត្ថុបានក៏ដោយ។ នេះ គឺដោយសារតែមានការជំទាស់ពីសំណាក់រដ្ឋាភិបាលអាល្លឺម៉ង់។
អាល្លឺម៉ង់តែងតែប្រកាន់ខ្ជាប់នូវគោលការណ៍ថា ធនាគារកណ្តាលអឺរ៉ុបមានតួនាទីតែមួយគត់ ទៅតាមការចែងរបស់សន្ធិសញ្ញាអឺរ៉ុប (Maastrich) គឺរក្សាស្ថិរភាពតម្លៃទំនិញ ដើម្បីទប់ស្កាត់អតិផរណា។ បើទោះជាពេលនេះ គេមិនឃើញមានចរន្តណាមួយ ដែលទាញអតិផរណានៅអឺរ៉ុបឲ្យកើនឡើង ក៏អាល្លឺម៉ង់នៅតែមិនសុខចិត្តឲ្យធនាគារកណ្តាលបញ្ចេញលុយមកឲ្យរដ្ឋជាសមាជិកខ្ចីដែរ។
ដើម្បីវៀងពីការជំទាស់របស់អាល្លឺម៉ង់ និងពីការហាមប្រាមដោយសន្ធិសញ្ញាអឺរ៉ុប កន្លងទៅនេះ ធនាគារកណ្តាលអឺរ៉ុបបានបញ្ចេញលុយរាប់ពាន់លានអឺរ៉ូទៅឲ្យធនាគារឯកជនខ្ចី ក្នុងអត្រាការប្រាក់ទាបបំផុត (ត្រឹម ១%) ដោយរំពឹងថា ធនាគារឯកជនទាំងនេះផ្តល់កម្ចីបន្តទៅឲ្យរដ្ឋាភិបាល។
ក៏ប៉ុន្តែ បញ្ហាដែលចោទ គឺនៅត្រង់ថា ធនាគារឯកជនមិនប្រាកដថានឹងយកលុយនេះទៅឲ្យរដ្ឋខ្ចីបន្តនោះទេ។ ពួកគេអាចយកនេះបង្វែរទៅរកស៊ីអ្វីផ្សេងវិញ ដែលអាចផ្តល់ផលចំណេញច្រើនជាង។ ម្យ៉ាងទៀត បើទោះជាពួកគេផ្តល់លុយនេះបន្តទៅឲ្យរដ្ឋខ្ចី ក៏ទាមទារអត្រាការប្រាក់ខ្ពស់ដែរ ពោលគឺ ៣% ឬរហូតដល់ជាង ៦%។ លុយដែលចំណេញ គឺចូលទៅក្នុងហៅប៉ៅធនាគារឯកជន ក្នុងពេលដែលរដ្ឋជាសមាជិកកំពុងត្រដរខ្យល់។ នេះគឺដោយសារតែអាល្លឺម៉ង់ងប់តែនឹងការទប់ស្កាត់បញ្ហាអតិផរណា ដែលមានត្រឹមតែស្រមោល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ