គ.ជ.ប៖គ្មានការពន្យាពេលចុះឈ្មោះគណបក្សនយោបាយ ខណៈផុតកំណត់ត្រឹមល្ងាចនេះ
គិតត្រឹមព្រឹកថ្ងៃចន្ទនេះ មានគណបក្សនយោបាយចំនួន១២បានទៅចុះឈ្មោះចូលរួមប្រកួតប្រជែងការបោះឆ្នោតថ្ងៃទី២៩ខែកក្កដាខាងមុខ ខណៈគ.ជ.បឈប់ទទួលពាក្យត្រឹមម៉ោង៥កន្លះល្ងាចនេះ។ អ្នកនាំពាក្យគ.ជ.ប បានបញ្ជាក់ថា មានគណបក្សនយោបាយចំនួន៤ត្រូវបានគ.ជ.បទទួលស្គាល់ជាផ្លូវការថាមានលក្ខណៈសម្បត្តិគ្រប់គ្រាន់ក្នុងការចូលប្រកួត នោះគឺគណបក្សប្រជាជនកម្ពុជា និងតាមពីក្រោយដោយគណបក្សតូចៗចំនួន៣ទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣២
អ្នកនាំពាក្យគណៈកម្មាធិការជាតិរៀបចំការបោះឆ្នោត(គ.ជ.ប) លោក ហង្ស ពុទ្ធា ប្រាប់វិទ្យុបារាំងអន្តរជាតិRFIថា គ្មានឡើយការពន្យាពេលចុះឈ្មោះគណបក្សនយោបាយសម្រាប់ចូលរួមការបោះឆ្នោតថ្ងៃទី២៩ខែកក្កដា ខាងមុខ ខណៈគ.ជ.ប ឈប់ទទួលពាក្យត្រឹមម៉ោង៥កន្លះល្ងាចនេះ។
ការបញ្ជាក់របស់ លោក ហង្ស ពុទ្ធា ធ្វើឡើងបន្ទាប់ពីកាសែតភ្នំពេញប៉ុស្តិ៍បានឡើងចំណងជើងធំនៅទំព័រមុខចេញផ្សាយនៅថ្ងៃចន្ទនេះថា គ.ជ.ប ពន្យាពេលការចុះឈ្មោះគណបក្សចូលរួមបោះឆ្នោតក្រោយពីមានបក្សតែ៤។
យ៉ាងណាក៏ដោយ លោក ហង្ស ពុទ្ធា បានបញ្ជាក់ថា គណបក្សចំនួន៤នោះគឺត្រូវបានគ.ជ.បទទួលស្គាល់ជាផ្លូវការថាមានលក្ខណៈសម្បត្តិគ្រប់គ្រាន់ក្នុងការចូលរួមប្រកួត ខណៈគណបក្សផ្សេងទៀត គ.ជ.ប កំពុងតែពិនិត្យលក្ខណៈសម្បត្តិ។ គណបក្សចំនួន៤នោះ មានគណបក្សប្រជាជនកម្ពុជាកំពុងកាន់អំណាច គណបក្សយុវជនកម្ពុជា គណបក្សសញ្ជាតិកម្ពុជា និងគណបក្សខ្មែររួបរួមជាតិ។
បើតាម លោក ហង្ស ពុទ្ធា ថ្វីត្បិតតែគ.ជ.ប បិទទ្វារឈប់ទទួលពាក្យសុំចុះបញ្ជីគណបក្សនយោបាយត្រឹមម៉ោង៥កន្លះល្ងាចនេះក៏ពិតមែន តែ គ.ជ.ប ទុកពេលឲ្យ៥ថ្ងៃទៀតសម្រាប់គណបក្សដែលបានដាក់ពាក្យរួចហើយ ដោយមិនទាន់បានបំពេញលក្ខខណ្ឌគ្រប់គ្រាន់នោះគឺត្រូវយកឯកសារមកបំពេញបន្ថែម។
សូមបញ្ជាក់ថា មានគណបក្សនយោបាយចំនួន៤១ត្រូវបានក្រសួងមហាផ្ទៃទទួលស្គាល់ក្នុងការចុះបញ្ជីជាផ្លូវការស្របច្បាប់ គិតត្រឹមថ្ងៃទី១១ខែឧសភានេះ ខណៈគណបក្សសង្រ្គោះជាតិដែលជាបក្សប្រឆាំងធំជាងគេនោះ ត្រូវបានតុលាការកំពូលរំលាយកាលពីខែវិច្ឆិកាឆ្នាំមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ