កម្ពុជា

គ្រោះថ្នាក់ចរាចរណ៍ឆ្នាំ២០១៣ កម្ពុជាខាតបង់ប្រាក់៣២៩លានដុល្លា និងស្លាប់មនុស្សជិត២ពាន់នាក់

គណៈកម្មាធិការសុវត្ថិភាពចរាចរណ៍ផ្លូវគោកកម្ពុជា នៅថ្ងៃចន្ទទី១៧វិច្ឆិការនេះ បានចេញផ្សាយរបាយការណ៍ស្តីពីគ្រោះថ្នាក់ឆ្នាំ២០១៣នៅទូទាំងប្រទេស ដែលមានអ្នកស្លាប់ចំនួន១៩៥០នាក់។ ចំនួននេះ ថយចុះ១៦នាក់ បើធៀបនឹងឆ្នាំ២០១២ តែប្រធានគណៈកម្មាធិការសុវត្ថិភាពចរាចរណ៍ផ្លូវគោក លោក ត្រាំ អ៊ីវតឹក កំពុងព្រួយបារម្ភថា ចំនួនអ្នកស្លាប់ នឹងកើនឡើងខ្ពស់នៅឆ្នាំ២០១៤។

ចុះផ្សាយនៅថ្ងៃ៖ 17/11/2014 - 09:15

ដោយ៖ វ៉ា សំណព្វ

ផ្សាយពាណិជ្ជកម្ម

មានកត្តាច្រើនយ៉ាង ដែលនាំអោយមានគ្រោះថ្នាក់ចរាចរណ៍នៅក្នុងប្រទេសកម្ពុជាសព្វថ្ងៃ នោះមកពីកត្តាមនុស្សនិងកត្តាយានយន្ត ការបើកបរហួសល្បឿនកំណត់ និងការបើកបរដែលស្ថិតនៅក្រោមឥទ្ធិពលគ្រឿងស្រវឹងជាដើម។

បើតាមរបាយការណ៍គ្រោះថ្នាក់ចរាចរណ៍ឆ្នាំ២០១៣ ដែលចេញផ្សាយដោយគណៈកម្មាធិការជាតិសុវត្ថិភាពចរាចរណ៍ផ្លូវគោកកម្ពុជា ដែលប្រមូលចេញពីប្រភពពីក្រសួងមហាផ្ទៃ និងក្រសួងសុខាភិបាលបានបង្ហាញថា ប្រជាពលរដ្ឋកម្ពុជាចំនួន១៩៥០នាក់បានស្លាប់បាត់បង់ជីវិត ក្នុងករណីគ្រោះថ្នាក់ចរាចរណ៍នៅទូទាំងប្រទេសចំនួន៤៣៥៣ករណី និងរបួសធ្ងន់៥៣៤៩នាក់ ដែលគិតជាមធ្យមប្រជាពលរដ្ឋកម្ពុជា៥នាក់បានស្លាប់ និងរបួស១៥នាក់ក្នុងមួយថ្ងៃ។

តែរបាយការណ៍បង្ហាញថា ចំនួនអ្នកស្លាប់នៅឆ្នាំ២០១៣ បានថយចុះ១៦នាក់ បើប្រៀបធៀបនឹងឆ្នាំ២០១២ ដែលមានចំនួន១៩៦៦នាក់។ ប៉ុន្តែលោក ត្រាំ អ៊ីវតឹក រដ្ឋមន្ត្រីក្រសួងសាធារណៈការនិងដឹកជញ្ជូន និងជាប្រធានគណៈកម្មាធិការសុវត្ថិភាពចរាចរណ៍ផ្លូវគោកកម្ពុជាបានដាក់ការព្រួយបារម្ភថា នៅឆ្នាំ២០១៤នេះ ចំនួនអ្នកស្លាប់នឹងកើនឡើងខ្ពស់ជាងឆ្នាំណាៗទាំងអស់ ពោលគឺគ្រាន់តែរយៈពេល១០ខែ ឆ្នាំ២០១៤នេះ ចំនួនអ្នកស្លាប់មានដល់ទៅ១៧៧២នាក់ទៅហើយ ហើយចំនួននេះ នៅមិនទាន់បូកបញ្ចូលករណីថ្មីៗ ដែលបានកើនឡើងនៅក្នុងខែតុលា និងខែវិច្ឆិការនៅឡើយទេ។

បើតាម លោករដ្ឋមន្ត្រី ការកើនឡើងនៃការចុះបញ្ជីយានយន្ត១៤%ក្នុង១ឆ្នាំ កំណើនផលិតផលសរុបក្នុងស្រុកក្នុងរង្វង់៧%ជារៀងរាល់ឆ្នាំ រួមទាំងការរីកចំរើនខាងផ្លូវថ្នល់ បានបង្ករឱកាសអោយប្រជាពលរដ្ឋខ្មែរធ្វើដំណើរកំសាន្តកាន់តែច្រើន ដែលនេះ ក៍ជាមូលហេតុដែលនាំអោយមានឱកាសនៃគ្រោះថ្នាក់ចរាចរណ៍ច្រើនផងដែរ។

គ្រោះថ្នាក់ចរាចរណ៍ឆ្នាំ២០១៣ ដែលបានធ្វើអោយកម្ពុជាខាតបង់សេដ្ឋកិច្ចប្រមាណជា ៣២៩លានដុល្លាអាមេរិក ហើយភាគច្រើននៃអ្នកបង្ករគ្រោះថ្នាក់ គឺភាគច្រើនជាយុវជននិងមនុស្សពេញកំលាំងរកលុយ ដែលមានអាយុចាប់ពី១៥ដល់៤០ឆ្នាំ៕