សង្គមស៊ីវិលផ្នែកបរិស្ថានទាញអារម្មណ៍រដ្ឋាភិបាលឲ្យងាកមកអភិវឌ្ឍសេដ្ឋកិច្ចភ្ជាប់ជាមួយបរិស្ថាន
ក្រុមអង្គការសង្គមស៊ីវិលដែលធ្វើការខាងបរិស្ថាន រួមមាន អង្គការរុក្ខជាតិសត្វព្រៃអន្តរជាតិ FFI អង្គការ WWF អង្គការ CI រួមជាមួយនឹងមន្ត្រីរដ្ឋាភិបាលមកពីក្រសួងបរិស្ថាន និងក្រសួងកសិកម្មផង បានចូលរួមនៅក្នុងសិក្ខាសាលាស្តីពី ហិរញ្ញប្បទានប្រកបដោយចីរភាពសម្រាប់ការអភិរក្ស និងគ្រប់គ្រងធនធានធម្មជាតិ។ នៅក្នុងសិក្ខាសាលានេះ អង្គការសង្គមស៊ីវិល ដែលធ្វើការខាងបរិស្ថាន បានទាញអារម្មណ៍របស់រដ្ឋាភិបាល ឲ្យងាកមករកការអភិវឌ្ឍន៍សេដ្ឋកិច្ច ដោយភ្ជាប់ជាមួយបរិស្ថាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
សិក្ខាសាលាដែលធ្វើឡើងពេញមួយថ្ងៃទី៦មិថុនា នៅឯសណ្ឋាគាសាន់វេនេះ បានទាញអារម្មណ៍របស់រដ្ឋាភិបាលកម្ពុជាឲ្យងាកមកធ្វើការអភិវឌ្ឍន៍សេដ្ឋកិច្ច ដោយមិនបំភ្លេចពីបញ្ហាបរិស្ថាន និងបញ្ហាសង្គមនោះទេ។ មានន័យថា បើរដ្ឋាភិបាលអភិវឌ្ឍន៍លឿនពេកតែលើបញ្ហាសេដ្ឋកិច្ច ដោយមិនខ្វល់ពីបញ្ហាបរិស្ថាន ឬបញ្ហាសង្គម និងវប្បធម៌ នោះការអភិវឌ្ឍន៍ដែលកើតឡើងនេះ នឹងមិនមាននិរន្តរភាពយូរអង្វែងនោះទេ។
លោក ជួប ប៉ារីស៍ អគ្គលេខាធិការរង នៃអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍បៃតង បានធ្វើបទបង្ហាញថា ការអភិវឌ្ឍន៍ត្រូវដើរទន្ទឹមគ្នារវាងសេដ្ឋកិច្ច បរិស្ថាន សង្គម និងវប្បធម៌។ ហើយការប្រកាន់យកគំនិតថា អភិវឌ្ឍន៍ជាមុនសិន ចាំសំអាតតាមក្រោយ នោះវានឹងបណ្តាលអោយរេចរឹលធនធានធម្មជាតិ និងបង្ករគ្រោះថ្នាក់ដល់អាកាសធាតុ។
ដោយឡែកលោក ទុយ សេរីវឌ្ឍនា នាយកអង្គការរុក្ខជាតិសត្វព្រៃអន្តរជាតិ FFI បានថ្លែងនៅក្នុងសិក្ខាសាលាដោយមានការចូលរួមពីមន្ត្រីរដ្ឋាភិបាលមកពីក្រសួងបរិស្ថាន និងក្រសួងកសិកម្មនោះថា ការអភិវឌ្ឍន៍សេដ្ឋកិច្ចមួយផ្នែកធំនៅក្នុងប្រទេសកម្ពុជា គឺពឹងផ្អែកលើធនធានធម្មជាតិ ហើយប្រសិនបើរដ្ឋាភិបាលមិនបានថ្លឹងអោយមានតុល្យភាពរវាងមុំទាំង៤ទេ នោះការអភិវឌ្ឍន៍នេះនឹងមិនមាននិរន្តរភាពនោះទេ។
សូមបញ្ជាក់ថា នេះគឺជាសិក្ខាសាលាលើកទី២ហើយ ដែលក្រុមអង្គការសង្គមស៊ីវិលដែលធ្វើការផ្នែកបរិស្ថានដូចជា អង្គការរុក្ខជាតិសត្វព្រៃអន្តរជាតិFFI អង្គការWWF អង្គការCI បានជួបគ្នា ដើម្បីប្រមូលផ្តុំមតិ សំរេចជាគោលការណ៍ដាក់ជូនរដ្ឋាភិបាលពិនិត្យ ដោយមានការគៀងគររកហិរញ្ញវត្ថុពីគ្រប់ផ្នែកសំរាប់ការងារអភិរក្ស និងគ្រប់គ្រងធនធានធម្មជាតិនៅកម្ពុជាផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ