ជនជាតិដើមភាគតិចជួបប្រជុំគ្នានិយាយរឿងដីធ្លី និង ការកាប់បំផ្លាញព្រៃឈើ
ជនជាតិដើមភាគតិចប្រមាណ ៥០នាក់មកពីបណ្តា៨ ខេត្តផ្សេងគ្នានៅថ្ងៃទី ០៥ មិថុនា នេះបានជួបប្រជុំគ្នាដើម្បីពិភាក្សាលើបញ្ហាប្រឈមមួយចំនួនដែលជនជាតិដើមភាគតិចបានជួបប្រទះពិសេសបញ្ហាបណ្តេញចេញពីដីធ្លី និង ការកាប់បំផ្លាញព្រៃឈើ។ ជនជាតិភាគតិចទាំងនេះបានជួបប្រជុំគ្នានៅក្នុងកិច្ចពិគ្រោះយោបល់ថ្នាក់ជាតិស្តីពីបញ្ហាជនជាតិភាគតិចដែលរៀបចំឡើងដោយសហគមន៍យុវជនជនជាតិដើមភាគតិចកម្ពុជា និង អ្នកការពារសិទ្ធជនជាតិដើមភាគតិច(IPHRDA)នៅមជ្ឈមណ្ឌលកិច្ចសហប្រតិបត្តិការកម្ពុជា-កូរ៉េ ក្នុងរាជធានីភ្នំពេញ។
ចុះផ្សាយនៅថ្ងៃ៖
ស្តាប់ - ០២:០៥
នៅក្នុងកិច្ចពិគ្រោះយោបល់ថ្នាក់ជាតិនេះ ប្រជាពលរដ្ឋដែលជាជនជាតិដើមភាគតិចហើយភាគច្រើនជាស្ត្រីបានរៀបរាប់ពីបញ្ហាប្រឈមនានាដែលពួកគេបានជួបប្រទះនៅក្នុងសហគមន៍។ ក្នុងនោះមាន ដូចជា ការរើសអើង ការកេងប្រវ័ញ្ញ និងការរំលោភសិទ្ធជនជាតិដើមភាគតិច ។ ក៏មានផងដែរ ការរៀបរាប់ពីការអភិវឌ្ឃ ការផ្តល់ដីសម្បទានសេដ្ឋកិច្ច និង ការកាប់បំផ្លាញព្រៃឈើ ដែលធ្វើឲ្យជនជាតិដើមភាគតិចរងការបណ្តេញចេញ និងការគម្រាមកំហែង។
ប្រជាពលរដ្ឋជនជាតិដើមភាគតិចទាំងនេះភាគច្រើនជាជនជាតិដើមកួយ ពូនង ជង ព័រ ក្រឹង ស្ទៀង និង ព្រៅ ដែលមកពី ៨ ខេត្ត ផ្សេងគ្នា គឺ ខេត្តមណ្ឌលគិរី រតនគីរី ស្ទឹងត្រែង ព្រះវិហារ បន្ទាយមានជ័យ កោះកុង កំពង់ធំ និង ក្រចេះ។ ហើយប្រជាពលរដ្ឋទាំងនេះក៏ជាអ្នកមានបទពិសោធន៍ដោយផ្ទាល់ក្នុងការចូលរួម និង ដឹកនាំសមាជិកសហគមន៍ក្នុងការតស៊ូមតិដើម្បីការពារដីធ្លី និង ធនធានធម្មជាតិនៅក្នុងប្រទេសកម្ពុជានាពេលកន្លងមកផងដែរ។
ក្រៅពីរៀបរាប់ពីបញ្ហាប្រឈមដែលពួកគេបានជួបប្រទះ ប្រជាពលរដ្ឋជនជាតិដើមភាគតិចក៏បានចោទសួរទៅកាន់តំណាងក្រសួងពាក់ព័ន្ធនានាដូចជាក្រសួងបរិស្ថាន ក្រសួងធនធានរ៉ែ និង ថាមពល ក្រសួងរៀបចំដែនដី នគរូបនីយកម្ម និង សំណង់ និង ក្រសួងអភិវឌ្ឃន៍ជនបទជាដើម។ ក៏ប៉ុន្តែតំណាងមួយចំនួនមិនបានឆ្លើយតបនោះទេ ខណៈតំណាងផ្សេងទៀតឆ្លើថា នឹងពាំនាំយកទុក្ខលំបាក និង បញ្ហាប្រឈមទាំងឡាយរបស់ពួកគេទៅជំរាបជូនថ្នាក់លើ។
ជាមួយគ្នានេះ ប្រជាពលរដ្ឋជនជាតិដើមភាគតិចទាំងនេះ តាមរយៈសេចក្តីថ្លែងការណ៍រួមមួយបានស្នើឲ្យបញ្ឃប់គម្រោងសាងសង់វារីអគ្គិសនីសេសានក្រោម២ និង ស្ទឹងអារ៉ែង ស្នើឲ្យរដ្ឋាភិបាលពង្រឹងការអនុវត្តច្បាប់ឲ្យមានប្រសិទ្ធភាពក្នុងការរក្សាការពារព្រៃឈើ និង ធនធានធម្មជាតិ បញ្ឈប់ការផ្តល់ដីសម្បទានសេដ្ឋកិច្ច ផ្តល់សេវាសុខភាព និង សេវាអប់រំនៅក្នុងសហគមន៍ជនជាតិដើមភាគតិច និង លុបបំបាត់ការរើសអើងជាដើម។
ដោយឡែកនៅថ្ងៃសុក្រ ទី ០៦ មិថុនា ស្អែកនេះ ក្រុមប្រជាពលរដ្ឋជនជាតិដើមភាគតិចទាំងនេះក៏នឹងធ្វើសន្និទកាសែតមួយដើម្បីបង្ហាញឲ្យបានកាន់ច្បាស់ទាក់ទងទៅនឹងបញ្ហាប្រឈមនានាដែលជនជាតិដើមភាគតិចបាន និង កំពុងជួបប្រទះផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ