ជនជាតិដើមភាគតិចដាក់សំណើទៅក្រសួងពាក់ព័ន្ធ ៥ ឲ្យដោះស្រាយបញ្ហាប្រឈមរបស់ពួកគេ
កិច្ចពិគ្រោះយោបល់ថ្នាក់ជាតិស្តីពីបញ្ហាប្រឈមនានារបស់ស្ត្រីជនជាតិដើមភាគតិចបានបិទបញ្ចប់ហើយនៅថ្ងៃសុក្រ ទី ៦ មិថុនា នេះ ដែលបានចាប់ផ្តើមកាលពីថ្ងៃទី ៤ មិថុនានៅមជ្ឈមណ្ឌលកិច្ចសហប្រតិបត្តិការកម្ពុជា-កូរ៉េ។ ប្រជាពលរដ្ឋជនជាតិដើមភាគតិចបានធ្វើសន្និសីទកាសែត និង ចេញសេចក្តីថ្លែងការណ៍រួមមួយដែលបរិយាយពីទុក្ខលំបាកនានា ពិសេសបញ្ហាដីធ្លី និង ការបាត់បង់ធនធានធម្មជាតិដែលបានប៉ះពាល់យ៉ាងខ្លាំងដល់ការរស់នៅរបស់ពួកគេ។ ប្រជាពលរដ្ឋជនជាតិដើមភាគតិចទាំងនេះក៏នឹងនាំយកសេចក្តីថ្លែងការណ៍រួមដែលមានបញ្ចូលទាំងសំណើ និងការទាមទារផ្សេងៗផង ដាក់ជូនក្រសួងពាក់ព័ន្ធចំនួន៥ ដើម្បីស្វែងរកការជួយអន្តរាគមន៍ និង ដោះស្រាយ។
ចុះផ្សាយនៅថ្ងៃ៖
ស្តាប់ - ០១:៤៩
សេចក្តីថ្លែងការណ៍រួមនេះនឹងត្រូវដាក់ជូនក្រសួងពាក់ព័ន្ធចំនួន ៥ រួមមានក្រសួងដែនដី នគរូបនីយកម្ម និង សំណង់ ក្រសួងបរិស្ថាន ក្រសួងរ៉ែ និង ថាមពល ក្រសួងអភិវឌ្ឈន៍ជនបទ និង ក្រសួងកិច្ចការនារី។គោលបំណងនៃការដាក់ជូនសេចក្តីថ្លែងការណ៍រួមនេះ គឺ ដើម្បីឲ្យក្រសួងពាក់ព័ន្ធទាំងនេះបានដឹងពីទុក្ខលំបាកផ្សេងៗរបស់ជនជាតិដើមភាគតិច និង ជួយអន្តរាគមន៍ និង ស្វែងរកដំណោះស្រាយជូនពូកគេផងដែរ។
សេចក្តីថ្លែងការណ៍រួមកម្រាស់ ៧ទំព័រនេះ ក៏ដូចទៅនឹងការថ្លែងរៀបរាប់ដោយផ្ទាល់ពីប្រជាពលរដ្ឋជនជាតិភាគតិចដែរ គឺបង្ហាញពីបញ្ហាប្រឈមមួយចំនួនដែលនៅតែជះឥទ្ធិពលកាន់តែធ្ងន់ធ្ងរទៅលើជនជាតិដើមភាគតិចនៅក្នុងប្រទេសកម្ពុជា។បញ្ហាចម្បងៗដែលសហគមន៍ជនជាតិដើមភាគតិចកំពុងជួបប្រទះរួមមានដូចជា បញ្ហាសាងសង់ទំនប់វារីអគ្គិសនី ការផ្ដល់ដីសម្បទានសេដ្ឋកិច្ច ការកាប់បំផ្លាញព្រៃឈើ កង្វះសេវាសាធារណៈ ការរើសអើង ការផ្តល់ដីសម្បទានសង្គមកិច្ច និង បញ្ហាទាញយករ៉ែជាដើម។
ក្រៅពីលើកឡើងពីបញ្ហាប្រឈមទាំងនេះ ប្រជាពលរដ្ឋជនជាតិដើមភាគតិចក៏ស្នើឲ្យរដ្ឋាភិបាលកម្ពុជាបញ្ឈប់ជាបន្ទាន់រាល់គម្រោងអភិវឌ្ឈន៍ទាំងឡាយណាដែលប៉ះពាល់ដល់សហគមន៍ជនជាតិដើមភាគតិច។ហើយប្រជាពលរដ្ឋទាំងនេះ ក៏បានព្រមានផងដែរថា ប្រសិនបើនៅតែមានគម្រោងអភិវឌ្ឈន៍ណាមួយពីរដ្ឋាភិបាលដែលផ្ទុយពីឆន្ទៈរបស់ជនជាតិភាគតិចនោះ ពួកគេនឹងធ្វើការប្តឹងទៅតុលាការជាតិ និង អន្តរជាតិដើម្បីរកដំណោះស្រាយ ព្រមទាំងមានវិធានការផ្សេងៗផងដែរដើម្បីការពារសហគមន៍ជនជាតិដើមភាគតិចរបស់ពួកគេ។
សូមបញ្ជាក់ឡើងវិញថា ប្រជាពលរដ្ឋជនជាតិដើមភាគតិចដែលភាគច្រើនជាស្ត្រីដែលបានមកជួបប្រជុំគ្នារយៈពេលពីរថ្ងៃនៅរាជធានីភ្នំពេញនេះ បានធ្វើដំណើរមកពីខេត្តចំនួនផ្សេងៗគ្នា។ជាខេត្តដែលហ៊ុំព័ន្ធទៅដោយការរំលោភសិទ្ធ ការរងគ្រោះដោយគម្រោងសាងសង់ទំនប់វារីអគ្គិសនី ការកាប់បំផ្លាញព្រៃឈើ និងបញ្ហាជម្លោះដីធ្លី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ